5. чхава̄ла̄тасуттаван̣н̣ана̄

95. пан̃чаме чхава̄ла̄танти суса̄не ала̄там̣. маджджхе гӯтхагатанти маджджхат̣т̣ха̄не гӯтхамаккхитам̣. нева га̄ме кат̣т̣хаттхам̣ пхаратӣти кӯт̣агопа̄наситхамбхасопа̄на̄дӣнам̣ аттха̄йа анупанеййата̄йа га̄ме на кат̣т̣хаттхам̣ са̄дхети, кхеттакут̣ипа̄дам̣ ва̄ ман̃чапа̄дам̣ ва̄ ка̄тум̣ анупанеййата̄йа на аран̃н̃е кат̣т̣хаттхам̣ са̄дхети. двӣсу кот̣ӣсу гайхама̄нам̣ хаттхам̣ д̣ахати, маджджхе гайхама̄нам̣ гӯтхена маккхети. татхӯпаманти там̣сариккхакам̣. абхиккантатароти сундаратаро. пан̣ӣтатароти уттаматаро. гава̄ кхӣранти га̄вито кхӣрам̣. кхӣрамха̄ дадхӣтиа̄дӣсу парам̣ парам̣ пуримато пуримато аггам̣, саппиман̣д̣о пана тесу саббесупи аггамева. агготиа̄дӣсу гун̣ехи агго чева сет̣т̣хо ча памукхо ча уттамо ча паваро ча̄ти ведитаббо. чхава̄ла̄тӯпама̄йа на дуссӣло пуггало катхито, аппассуто пана виссат̣т̣хакамманто гон̣асадисо пуггало катхитоти ведитаббо. чхат̣т̣хе саббам̣ утта̄наттхамева.