7. путтасуттаван̣н̣ана̄

87. саттаме саман̣амачалоти саман̣аачало, мака̄ро падасандхикаро, ниччаласаман̣оти аттхо. имина̄ саттавидхампи секхам̣ дассети. со хи са̄сане мӯладжа̄та̄йа саддха̄йа патит̣т̣хитатта̄ ачало на̄ма. саман̣апун̣д̣арӣкоти пун̣д̣арӣкасадисо саман̣о. пун̣д̣арӣкам̣ на̄ма ӯнасатапаттам̣ сарорухам̣. имина̄ суккхавипассакакхӣн̣а̄савам̣ дассети. со хи джха̄на̄бхин̃н̃а̄нам̣ абха̄вена апарипун̣н̣агун̣атта̄ саман̣апун̣д̣арӣко на̄ма хоти. саман̣ападумоти падумасадисо саман̣о. падумам̣ на̄ма парипун̣н̣асатапаттам̣ сарорухам̣. имина̄ убхатобха̄гавимуттам̣ кхӣн̣а̄савам̣ дассети. со хи джха̄на̄бхин̃н̃а̄нам̣ бха̄вена парипун̣н̣агун̣атта̄ саман̣ападумо на̄ма хоти. саман̣есу саман̣асукхума̄лоти саббесупи етесу саман̣есу сукхума̄ласаман̣о мудучиттасарӣро ка̄йикачетасикадуккхарахито екантасукхӣ. етена атта̄нан̃чева аттасадисе ча дассети.

евам̣ ма̄тикам̣ никкхипитва̄ ида̄ни пат̣ипа̄т̣ийа̄ вибхаджанто катхан̃ча, бхиккхаветиа̄дима̄ха. таттха секхоти саттавидхопи секхо. па̄т̣ипадоти пат̣ипаннако. ануттарам̣ йогаккхемам̣ паттхайама̄но вихаратӣти арахаттам̣ паттхайанто вихарати. муддха̄васиттасса̄ти муддхани аваситтасса, ката̄бхисекасса̄ти аттхо. а̄бхисекоти абхисекам̣ ка̄тум̣ йутто. анабхиситтоти на та̄ва абхиситто. мачалаппаттоти ран̃н̃о кхаттийасса муддха̄васиттасса путтабха̄вена чева путтесу джет̣т̣хакабха̄вена ча на та̄ва абхиситтабха̄вена ча абхисекаппаттиаттха̄йа ачалаппатто ниччалапатто. мака̄ро нипа̄таматтам̣. ка̄йена пхуситва̄ти на̄мака̄йена пхуситва̄.

йа̄читова бахулам̣ чӣварам̣ парибхун̃джатӣти ‘‘идам̣, бханте, парибхун̃джатха̄’’ти евам̣ да̄йакехи йа̄чама̄нехева упанӣтам̣ чӣварам̣ бахум̣ парибхун̃джати, кин̃чидева айа̄читам̣, ба̄кулаттхеро вийа. пин̣д̣апа̄там̣ кхадираванамагге сӣвалиттхеро вийа. сена̄санам̣ ат̣т̣хакана̄гарасутте (ма. ни. 2.17 а̄дайо; а. ни. 11.16 а̄дайо) а̄нандаттхеро вийа. гила̄напаччайам̣ пилиндаваччхатхеро вийа. тйасса̄ти те асса. мана̄пенева̄ти манам̣ аллӣйанакена. самуда̄чарантӣти каттаббакичча̄ни каронти паваттанти ва̄. упаха̄рам̣ упахарантӣти ка̄йикачетасикаупаха̄рам̣ упахаранти упанӣйанти. саннипа̄тика̄нӣти тин̣н̣ампи саннипа̄тена ниббатта̄ни. утупарин̣а̄маджа̄нӣти утупарин̣а̄мато атисӣтаатиун̣хаутуто джа̄та̄ни. висамапариха̄раджа̄нӣти ачча̄санаатит̣т̣ха̄на̄дика̄ висамапариха̄рато джа̄та̄ни. опаккамика̄нӣти вадхабандхана̄диупаккамена ниббатта̄ни. каммавипа̄каджа̄нӣти вина̄пи имехи ка̄ран̣ехи кевалам̣ пуббе катакаммавипа̄кавасенева джа̄та̄ни. чатуннам̣ джха̄на̄нанти еттха кхӣн̣а̄сава̄нампи буддха̄нампи кирийаджджха̄на̄нева адхиппета̄ни. сесам̣ утта̄наттхамева̄ти.