9. ван̣иджджасуттаван̣н̣ана̄

79. наваме та̄диса̄ ва̄ти там̣садиса̄ва там̣сариккхака̄ва. чхедага̄минӣ хотӣти чхедам̣ гаччхати. йам̣ паттхитам̣, там̣ саббам̣ нассатӣти аттхо. на йатха̄дхиппа̄йа̄ хотӣти йатха̄джджха̄сайа̄ на хоти. пара̄дхиппа̄йа̄ хотӣти параджджха̄сайа̄ аджджха̄сайато адхикатарапхала̄ хоти. саман̣ам̣ ва̄ бра̄хман̣ам̣ ва̄ти еттха самитапа̄паба̄хитапа̄пата̄хи саман̣абра̄хман̣ата̄ ведитабба̄. вадату, бханте, паччайена̄ти, бханте, чатуббидхена чӣвара̄дина̄ паччайена вадеййа̄сӣти евам̣ пава̄рети нимантети. йена пава̄ретӣти париччхиндитва̄ йаттакена пава̄рети. там̣ на детӣти там̣ саббасова на дети. на йатха̄дхиппа̄йам̣ детӣти йатха̄ тасса аджджха̄сайо, евам̣ да̄тум̣ на саккоти, ха̄петва̄ аппакам̣ дети. йатха̄дхиппа̄йам̣ детӣти йаттакам̣ со иччхати, таттакамева дети. пара̄дхиппа̄йам̣ детӣти аппакам̣ пава̄ретва̄ аваттхаритва̄ бахум̣ дети.