1. пат̣хамапун̃н̃а̄бхисандасуттаван̣н̣ана̄

51. дутийасса пат̣хаме пун̃н̃а̄бхисанда̄ти пун̃н̃асса абхисанда̄, пун̃н̃аппаттийоти аттхо. кусала̄бхисанда̄ти тассева вевачанам̣. те панете сукхам̣ а̄харантӣти сукхасса̄ха̄ра̄. сут̣т̣ху агга̄нам̣ рӯпа̄дӣнам̣ да̄йака̄ти соваггика̄. сукхо несам̣ випа̄коти сукхавипа̄ка̄. сагге упапатти сагго, сагга̄йа сам̣ваттантӣти саггасам̣ваттаника̄. чӣварам̣ парибхун̃джама̄ноти чӣвараттха̄йа ваттхам̣ лабхитва̄ сӯчисутта̄дӣнам̣ абха̄вена там̣ никкхипантопи каронтопи па̄рупантопи джин̣н̣ака̄ле паччаттхаран̣ам̣ каронтопи паччаттхаритумпи асаккун̣еййам̣ бхӯматтхаран̣ам̣ каронтопи бхӯматтхаран̣асса анануччхавикам̣ пха̄летва̄ па̄дапун̃чханам̣ каронтопи ‘‘парибхун̃джама̄но’’твева вуччати. йада̄ пана ‘‘па̄дапун̃чханампи на сакка̄ ида’’нти саммаджджитва̄ чхад̣д̣итам̣ хоти, тада̄ парибхун̃джама̄но на̄ма на хоти. аппама̄н̣ам̣ четосама̄дхинти арахаттапхаласама̄дхим̣. аппама̄н̣о тасса пун̃н̃а̄бхисандоти имина̄ да̄йакасса пун̃н̃ачетана̄йа аппама̄н̣атам̣ катхети. тасса хи ‘‘кхӣн̣а̄саво ме чӣварам̣ парибхун̃джатӣ’’ти пунаппунам̣ ануссаран̣авасена паватта̄ пун̃н̃ачетана̄ аппама̄н̣а̄ хоти. там̣ сандха̄йетам̣ вуттам̣. пин̣д̣апа̄та̄дӣсу пана йо пин̣д̣апа̄там̣ парибхун̃джитва̄ сатта̄хампи тенева йа̄пети, ан̃н̃ам̣ на парибхун̃джати, со сатта̄хампи там̣йева пин̣д̣апа̄там̣ парибхун̃джама̄но на̄ма хоти. екасмим̣ пана сена̄сане раттит̣т̣ха̄надива̄т̣т̣ха̄на̄дӣсу чан̇камантопи йа̄ва там̣ сена̄санам̣ паха̄йа ан̃н̃ам̣ на ган̣ха̄ти, та̄ва парибхун̃джама̄но на̄ма хоти. екена пана бхесаджджена бйа̄дхимхи вӯпасанте йа̄ва ан̃н̃ам̣ бхесаджджам̣ на парибхун̃джати, та̄вадева парибхун̃джама̄но на̄ма хоти.

бахубхераванти бахӯхи бхерава̄рамман̣ехи саманна̄гатам̣. ратанавара̄нанти саттаннампи вараратана̄нам̣. а̄лайанти нива̄сат̣т̣ха̄нам̣. путхӯ савантӣти бахука̄ хутва̄ сандама̄на̄. сесаметтха утта̄намева.