3. пат̣хамакхатасуттаван̣н̣ана̄

3. татийам̣ дуканипа̄таван̣н̣ана̄йам̣ вуттамева. га̄тха̄су пана ниндийанти ниндитаббайуттакам̣. ниндатӣти гарахати. пасам̣сийоти пасам̣ситаббайутто. вичина̄ти мукхена со калинти йо евам̣ паватто, тена мукхена калим̣ вичина̄ти на̄ма. калина̄ тена сукхам̣ на виндатӣти тена ча калина̄ сукхам̣ на пат̣илабхати. саббасса̄пи саха̄пи аттана̄ти саббенапи сакена дханена чева аттана̄ ча саддхим̣ йо пара̄джайо, со аппаматтакова калӣти аттхо. йо сугатесӯти йо пана саммаггатесу пуггалесу читтам̣ падуссеййа, айам̣ читтападосова тато калито махантатаро кали. ида̄ни тасса махантатарабха̄вам̣ дассенто сатам̣ сахасса̄нантиа̄дима̄ха. таттха сатам̣ сахасса̄нанти нираббудаган̣ана̄йа сатасахассам̣. чхаттим̣сатӣти апара̄ни ча чхаттим̣сати нираббуда̄ни. пан̃ча ча̄ти аббудаган̣ана̄йа ча пан̃ча аббуда̄ни. йамарийагарахӣти йам̣ арийе гараханто нирайам̣ упападжджати, таттха еттакам̣ а̄йуппама̄н̣анти.