4. бхаран̣д̣ука̄ла̄масуттаван̣н̣ана̄

127. чатуттхе кевалакаппанти сакалакаппам̣. анва̄хин̣д̣антоти вичаранто. на̄ддаса̄ти ким̣ ка̄ран̣а̄ на аддаса? айам̣ кира бхаран̣д̣у ка̄ла̄мо сакйа̄нам̣ аггапин̣д̣ам̣ кха̄данто вичарати. тасса васанат̣т̣ха̄нам̣ сампаттака̄ле ека̄ дхаммадесана̄ самут̣т̣хахиссатӣти н̃атва̄ бхагава̄ евам̣ адхит̣т̣ха̄си, йатха̄ ан̃н̃о а̄васатхо на пан̃н̃а̄йиттха. тасма̄ на аддаса. пура̄н̣асабрахмача̄рӣти пора̄н̣ако сабрахмача̄рӣ. со кира а̄л̣а̄рака̄ла̄мака̄ле тасмим̣йева ассаме ахоси, там̣ сандха̄йевама̄ха. сантхарам̣ пан̃н̃а̄пехӣти сантхаритаббам̣ сантхара̄хӣти аттхо. сантхарам̣ пан̃н̃а̄петва̄ти каппийаман̃чаке паччаттхаран̣ам̣ пан̃н̃а̄петва̄. ка̄ма̄нам̣ парин̃н̃ам̣ пан̃н̃а̄петӣти еттха парин̃н̃а̄ на̄ма саматиккамо, тасма̄ ка̄ма̄нам̣ саматиккамам̣ пат̣хамаджджха̄нам̣ пан̃н̃а̄пети. на рӯпа̄нам̣ парин̃н̃анти рӯпа̄нам̣ саматиккамабхӯтам̣ арӯпа̄вачарасама̄паттим̣ на пан̃н̃а̄пети. на ведана̄нам̣ парин̃н̃анти ведана̄нам̣ саматиккамам̣ нибба̄нам̣ на пан̃н̃а̄пети. нит̣т̣ха̄ти гати ниппхатти. уда̄ху путхӯти уда̄ху на̄на̄.