10. монеййасуттаван̣н̣ана̄

123. дасаме монеййа̄нӣти мунибха̄ва̄. ка̄йамонеййанти ка̄йадва̄ре мунибха̄во са̄дхубха̄во пан̣д̣итабха̄во. сесадвайепи есева найо. идам̣ вуччати, бхиккхаве, ка̄йамонеййанти идам̣ тивидхака̄йадуччаритаппаха̄нам̣ ка̄йамонеййам̣ на̄ма. апича тивидхам̣ ка̄йасучаритампи ка̄йамонеййам̣, татха̄ ка̄йа̄рамман̣ам̣ н̃а̄н̣ам̣ ка̄йамонеййам̣, ка̄йапарин̃н̃а̄ ка̄йамонеййам̣, парин̃н̃а̄сахагато магго ка̄йамонеййам̣, ка̄йе чхандара̄гасса паха̄нам̣ ка̄йамонеййам̣, ка̄йасан̇кха̄раниродхо чатуттхаджджха̄насама̄патти ка̄йамонеййам̣. вачӣмонеййепи есева найо.

айам̣ панеттха висесо – йатха̄ идха чатуттхаджджха̄насама̄патти, евам̣ таттха вачӣсан̇кха̄раниродхо дутийаджджха̄насама̄патти вачӣмонеййанти ведитабба̄. маномонеййампи имина̄ва найена аттхам̣ н̃атва̄ читтасан̇кха̄раниродхо сан̃н̃а̄ведайитаниродхасама̄патти маномонеййанти ведитабба̄. ка̄йамунинти ка̄йадва̄ре муним̣ уттамам̣ парисуддхам̣, ка̄йена ва̄ муним̣. сесадвайепи есева найо. саббаппаха̄йинанти кхӣн̣а̄савам̣. кхӣн̣а̄саво хи саббаппаха̄йӣ на̄ма̄ти.

а̄па̄йикавагго дутийо.