5. рун̣н̣асуттаван̣н̣ана̄

108. пан̃чамам̣ аттхуппаттийа̄ никкхиттам̣. катара̄йа аттхуппаттийа̄? чхаббаггийа̄нам̣ ана̄ча̄ре. те кира га̄йанта̄ наччанта̄ хасанта̄ вичарим̣су. бхиккхӯ дасабаласса а̄рочайим̣су. саттха̄ те паккоса̄петва̄ тесам̣ ова̄даттха̄йа идам̣ суттам̣ а̄рабхи. таттха рун̣н̣анти родитам̣. умматтаканти умматтакакирийа̄. кома̄раканти кума̄ракехи каттаббакиччам̣. дантавидам̣сакахаситанти данте дассетва̄ па̄н̣им̣ пахаранта̄нам̣ маха̄саддена хаситам̣. сетугха̄то гӣтети гӣте во паччайагха̄то хоту, сахетукам̣ гӣтам̣ паджахатха̄ти дӣпети. наччепи есева найо. аланти йуттам̣. дхаммаппамодита̄нам̣ сатанти еттха дхаммо вуччати ка̄ран̣ам̣, кеначидева ка̄ран̣ена памудита̄нам̣ санта̄нам̣. ситам̣ ситаматта̄йа̄ти тасмим̣ ситака̄ран̣е сати йам̣ ситам̣ каротха, там̣ во ситаматта̄йа аггаданте дассетва̄ пахат̣т̣ха̄ка̄раматтадассана̄йайева йуттанти вуттам̣ хоти.