4. ниган̣т̣хасуттаван̣н̣ана̄

75. чатуттхе кӯт̣а̄га̄раса̄ла̄йанти две кан̣н̣ика̄ гахетва̄ хам̣сават̣т̣акаччханнена ката̄йа гандхакут̣ийа̄. апарисесам̣ н̃а̄н̣адассанам̣ пат̣иджа̄на̄тӣти аппаматтакампи асесетва̄ саббам̣ н̃а̄н̣адассанам̣ пат̣иджа̄на̄ти. сататам̣ самитанти саббака̄лам̣ нирантарам̣. н̃а̄н̣адассанам̣ паччупат̣т̣хитанти саббан̃н̃утан̃н̃а̄н̣ам̣ майхам̣ упат̣т̣хитамева̄ти дассети. пура̄н̣а̄нам̣ камма̄нанти а̄йӯхитакамма̄нам̣. тапаса̄ бйантӣбха̄ванти дуккаратапена вигатантакаран̣ам̣. нава̄нам̣ камма̄нанти ида̄ни а̄йӯхитаббакамма̄нам̣. акаран̣а̄ти ана̄йӯханена. сетугха̄танти падагха̄там̣ паччайагха̄там̣ катхети. каммаккхайа̄ дуккхаккхайоти каммават̣т̣аккхайена дуккхаккхайо. дуккхаккхайа̄ ведана̄ккхайоти дуккхават̣т̣аккхайена ведана̄ккхайо. дуккхават̣т̣асмин̃хи кхӣн̣е ведана̄ват̣т̣ампи кхӣн̣амева хоти. ведана̄ккхайа̄ саббам̣ дуккхам̣ ниджджин̣н̣ам̣ бхависсатӣти ведана̄ккхайена пана сакалават̣т̣адуккхам̣ ниджджин̣н̣амева бхависсати. сандит̣т̣хика̄йа̄ти са̄мам̣ пасситабба̄йа паччаккха̄йа. ниджджара̄йа висуддхийа̄ти килесаджӣран̣акапат̣ипада̄йа килесе ва̄ ниджджӣран̣ато ниджджара̄йа сатта̄нам̣ висуддхийа̄. саматиккамо хотӣти сакаласса ват̣т̣адуккхасса атиккамо хоти. идха, бханте, бхагава̄ кима̄ха̄ти, бханте, бхагава̄ има̄йа пат̣ипаттийа̄ кима̄ха, ким̣ етам̣йева килесаниджджӣран̣акапат̣ипадам̣ пан̃н̃апети, уда̄ху ан̃н̃анти пуччхати.

джа̄ната̄ти ана̄варан̣ан̃а̄н̣ена джа̄нантена. пассата̄ти самантачаккхуна̄ пассантена. висуддхийа̄ти висуддхисампа̄панаттха̄йа. саматиккама̄йа̄ти саматиккаманаттха̄йа. аттхан̇гама̄йа̄ти аттхам̣ гаманаттха̄йа. н̃а̄йасса адхигама̄йа̄ти саха випассана̄йа маггасса адхигаманаттха̄йа. нибба̄насса саччхикирийа̄йа̄ти апаччайанибба̄насса саччхикаран̣аттха̄йа. наван̃ча каммам̣ на каротӣти навам̣ каммам̣ на̄йӯхати. пура̄н̣ан̃ча камманти пуббе а̄йӯхитакаммам̣. пхусса пхусса бйантӣ каротӣти пхуситва̄ пхуситва̄ вигатантам̣ кароти, випа̄капхассам̣ пхуситва̄ пхуситва̄ там̣ каммам̣ кхепетӣти аттхо. сандит̣т̣хика̄ти са̄мам̣ пасситабба̄. ака̄лика̄ти на ка̄лантаре киччака̄рика̄. ехипассика̄ти ‘‘ехи пасса̄’’ти евам̣ дассетум̣ йутта̄. опанеййика̄ти упанайе йутта̄ аллӣйитаббайутта̄. паччаттам̣ ведитабба̄ вин̃н̃ӯхӣти пан̣д̣итехи аттано аттано санта̄нейева джа̄нитабба̄, ба̄лехи пана дуджджа̄на̄. ити сӣлавасена две магга̄, две ча пхала̄ни катхита̄ни. сота̄паннасакада̄га̄мино хи сӣлесу парипӯрака̄риноти. вивиччева ка̄мехӣтиа̄дика̄йа пана сама̄дхисампада̄йа тайо магга̄, тӣн̣и ча пхала̄ни катхита̄ни. ана̄га̄мӣ арийаса̄вако хи сама̄дхимхи парипӯрака̄рӣти вутто. а̄сава̄нам̣ кхайа̄тиа̄дӣхи арахаттапхалам̣ катхитам̣. кечи пана сӣласама̄дхайопи арахаттапхаласампайутта̄ва идха адхиппета̄. екекасса пана васена пат̣ипаттидассанаттхам̣ висум̣ висум̣ танти а̄ропита̄ти.