6. са̄л̣хасуттаван̣н̣ана̄

67. чхат̣т̣хе мига̄ранатта̄ти мига̄расет̣т̣хино натта̄. секхунийанатта̄ти секхунийасет̣т̣хино натта̄. упасан̇камим̣сӯти бхуттапа̄тара̄са̄ да̄сакаммакарапаривута̄ упасан̇камим̣су. тесам̣ кира пуребхатте пуббан̣хасамайейева гехе еко пан̃хо самут̣т̣хито, там̣ пана катхетум̣ ока̄со на̄хоси. те ‘‘там̣ пан̃хам̣ сосса̄ма̄’’ти тхерасса сантикам̣ гантва̄ вандитва̄ тун̣хӣ нисӣдим̣су. тхеро ‘‘га̄ме там̣ самут̣т̣хитам̣ пан̃хам̣ сотум̣ а̄гата̄ бхависсантӣ’’ти тесам̣ манам̣ н̃атва̄ тамева пан̃хам̣ а̄рабханто етха тумхе са̄л̣ха̄тиа̄дима̄ха. таттха аттхи лобхоти луббханасабха̄во лобхо на̄ма аттхӣти пуччхати. абхиджджха̄ти кхо ахам̣ са̄л̣ха̄ етаматтхам̣ вада̄мӣти етам̣ лобхасан̇кха̄там̣ аттхам̣ ахам̣ ‘‘абхиджджха̄’’ти вада̄ми, ‘‘тан̣ха̄’’ти вада̄мӣти самут̣т̣хитапан̃хасса аттхам̣ дӣпенто а̄ха. евам̣ саббава̄ресу найо нетаббо.

со евам̣ паджа̄на̄тӣти со чатта̄ро брахмавиха̄ре бха̄ветва̄ т̣хито арийаса̄вако сама̄паттито вут̣т̣ха̄йа випассанам̣ а̄рабханто евам̣ паджа̄на̄ти. аттхи иданти аттхи дуккхасаччасан̇кха̄там̣ кхандхапан̃чакам̣ на̄марӯпавасена париччхиндитва̄ паджа̄нанто еса ‘‘евам̣ паджа̄на̄ти аттхи ида’’нти вутто. хӣнанти самудайасаччам̣. пан̣ӣтанти маггасаччам̣. имасса сан̃н̃а̄гатасса уттари ниссаран̣анти имасса випассана̄сан̃н̃а̄сан̇кха̄тасса сан̃н̃а̄гатасса уттари ниссаран̣ам̣ на̄ма нибба̄нам̣, таматтхӣти имина̄ ниродхасаччам̣ дассети. вимуттасмим̣ вимуттамити н̃а̄н̣анти екӯнавӣсативидхам̣ паччавеккхан̣ан̃а̄н̣ам̣ катхитам̣. аху пуббе лобхоти пуббе ме лобхо ахоси. тадаху акусаланти там̣ акусалам̣ на̄ма ахоси, тада̄ ва̄ акусалам̣ на̄ма ахоси. иччетам̣ кусаланти ити етам̣ кусалам̣, тассева акусаласса наттхибха̄вам̣ кусалам̣ кхеманти сандха̄йа вадати. ниччха̄тоти ниттан̣хо. ниббутоти аббхантаре санта̄пакара̄нам̣ килеса̄нам̣ абха̄вена ниббуто. сӣтибхӯтоти сӣталӣбхӯто. сукхаппат̣исам̣ведӣти ка̄йикачетасикасса сукхасса пат̣исам̣ведита̄. брахмабхӯтена̄ти сет̣т̣хабхӯтена. сесам̣ саббаттха утта̄наттхамева̄ти.