11. маха̄чорасуттаван̣н̣ана̄

51. ека̄дасаме маха̄чороти маханто балавачоро. сандхинти гхарасандхим̣. ниллопанти маха̄вилопам̣. ека̄га̄риканти екамева гехам̣ парива̄ретва̄ вилумпанам̣. парипантхепи тит̣т̣хатӣти пантхадӯханакаммам̣ кароти. надӣвидугганти надӣнам̣ дуггамат̣т̣ха̄нам̣ антарадӣпакам̣, йаттха сакка̄ хоти двӣхипи тӣхипи джан̇гхасахассехи саддхим̣ нилӣйитум̣. паббатависаманти паббата̄нам̣ висамат̣т̣ха̄нам̣ паббатантарам̣, йаттха сакка̄ хоти саттахи ва̄ ат̣т̣хахи ва̄ джан̇гхасахассехи саддхим̣ нилӣйитум̣. тин̣агахананти тин̣ена вад̣д̣хитва̄ сан̃чханнам̣ дваттийоджанат̣т̣ха̄нам̣. родханти гханам̣ ан̃н̃аман̃н̃ам̣ сам̣сат̣т̣хаса̄кхам̣ ека̄баддхам̣ маха̄ванасан̣д̣ам̣. парийодха̄йа аттхам̣ бхан̣иссантӣти парийодахитва̄ там̣ там̣ ка̄ран̣ам̣ паккхипитва̄ аттхам̣ катхайиссанти. тйа̄сса̄ти те асса. парийодха̄йа аттхам̣ бхан̣антӣти кисмин̃чи кин̃чи ваттум̣ а̄раддхейева ‘‘ма̄ евам̣ авачуттха, майам̣ етам̣ кулапарампара̄йа джа̄на̄ма, на еса еварӯпам̣ кариссатӣ’’ти там̣ там̣ ка̄ран̣ам̣ паккхипитва̄ махантампи досам̣ харанта̄ аттхам̣ бхан̣анти. атха ва̄ парийодха̄йа̄ти пат̣иччха̄детва̄типи аттхо. те хи тассапи досам̣ пат̣иччха̄детва̄ аттхам̣ бхан̣анти. кхатам̣ упахатанти гун̣акхананена кхатам̣, гун̣упагха̄тена упахатам̣. висамена ка̄йакаммена̄ти сампаккхаланат̣т̣хена висамена ка̄йадва̄рикакаммена. вачӣманокаммесупи есева найо. антагга̄хика̄йа̄ти дасаваттхука̄йа антам̣ гахетва̄ т̣хитадит̣т̣хийа̄. сесам̣ саббаттха утта̄наттхамева̄ти.

чӯл̣авагго пан̃чамо.