9. андхасуттаван̣н̣ана̄

29. наваме чаккху на хотӣти пан̃н̃а̄чаккху на хоти. пха̄тим̣ кареййа̄ти пхӣтам̣ вад̣д̣хитам̣ кареййа. са̄ваджджа̄наваджджети садосаниддосе. хӣнаппан̣ӣтети адхамуттаме. кан̣хасуккасаппат̣ибха̄гети кан̣хасукка̄йева ан̃н̃аман̃н̃ам̣ пат̣иба̄ханато пат̣ипаккхавасена саппат̣ибха̄га̄ти вуччанти. айам̣ панеттха сан̇кхепо – кусале дхамме ‘‘кусала̄ дхамма̄’’ти джа̄неййа, акусале дхамме ‘‘акусала̄ дхамма̄’’ти джа̄неййа. са̄ваджджа̄дӣсупи есева найо. кан̣хасуккасаппат̣ибха̄гесу пана кан̣хадхамме ‘‘суккасаппат̣ибха̄га̄’’ти джа̄неййа, суккадхамме ‘‘кан̣хасаппат̣ибха̄га̄’’ти йена пан̃н̃а̄чаккхуна̄ джа̄неййа, татха̄рӯпамписса чаккху на хотӣти. имина̄ найена сесава̄ресупи аттхо ведитаббо.

на чева бхога̄ татха̄рӯпа̄ти татха̄джа̄тика̄ бхога̄писса на хонти. на ча пун̃н̃а̄ни куббатӣти пун̃н̃а̄ни ча на кароти. етта̄вата̄ бхогуппа̄даначаккхуно ча пун̃н̃акаран̣ачаккхуно ча абха̄во вутто. убхайаттха калигга̄хоти идхалоке ча паралоке ча̄ти убхайасмимпи апараддхагга̄хо, пара̄джайагга̄хо хотӣти аттхо. атха ва̄ убхайаттха калигга̄хоти убхайесампи дит̣т̣хадхаммикасампара̄йика̄нам̣ аттха̄нам̣ калигга̄хо, пара̄джайагга̄хоти аттхо. дхамма̄дхаммена̄ти дасакусалакаммапатхадхамменапи дасаакусалакаммапатхаадхамменапи. сат̣хоти кера̄т̣ико. бхога̄ни парийесатӣти бхоге гавесати. тхеййена кӯт̣акаммена, муса̄ва̄дена чӯбхайанти тхеййа̄дӣсу убхайена парийесатӣти аттхо. катхам̣? тхеййена кӯт̣акаммена ча парийесати, тхеййена муса̄ва̄дена ча парийесати, кӯт̣акаммена муса̄ва̄дена ча парийесати. сан̇гха̄тунти сан̇гхаритум̣. дхаммаладдхехӣти дасакусалакаммапатхадхаммам̣ акопетва̄ ладдхехи. ут̣т̣ха̄на̄дхигатанти вӣрийена адхигатам̣. абйаггхама̄насоти ниббичикиччхачитто. бхаддакам̣ т̣ха̄нанти сет̣т̣хам̣ деват̣т̣ха̄нам̣. на сочатӣти йасмим̣ т̣ха̄не антосокена на сочати.