6. севитаббасуттаван̣н̣ана̄

26. чхат̣т̣хе севитабботи упасан̇камитаббо. бхаджитабботи аллӣйитаббо. пайирупа̄ситабботи сантике нисӣданавасена пунаппунам̣ упа̄ситаббо. саккатва̄ гарум̣ катва̄ти сакка̄ран̃чева гарука̄ран̃ча катва̄. хӣно хоти сӣлена̄тиа̄дӣсу упа̄да̄йупа̄да̄йа хӣната̄ ведитабба̄. таттха йо хи пан̃ча сӣла̄ни раккхати, со даса сӣла̄ни раккхантена на севитаббо. йо даса сӣла̄ни раккхати, со чатупа̄рисуддхисӣлам̣ раккхантена на севитаббо. ан̃н̃атра ануддайа̄ ан̃н̃атра анукампа̄ти т̣хапетва̄ ануддайан̃ча анукампан̃ча. аттано аттха̄йева хи еварӯпо пуггало на севитаббо, ануддайа̄нукампа̄васена пана там̣ упасан̇камитум̣ ват̣т̣ати.

сӣласа̄ман̃н̃агата̄нам̣ сатанти сӣлена сама̄набха̄вам̣ гата̄нам̣ санта̄нам̣. сӣлакатха̄ ча но бхависсатӣти евам̣ сама̄насӣла̄нам̣ амха̄кам̣ сӣламева а̄раббха катха̄ бхависсати. са̄ ча но паваттинӣ бхависсатӣти са̄ ча амха̄кам̣ катха̄ дивасампи катхента̄нам̣ паваттиссати на пат̣ихан̃н̃иссати. са̄ ча но пха̄су бхависсатӣти са̄ ча дивасампи паваттама̄на̄ сӣлакатха̄ амха̄кам̣ пха̄сувиха̄ро сукхавиха̄ро бхависсати. сама̄дхипан̃н̃а̄катха̄супи есева найо.

сӣлаккхандханти сӣлара̄сим̣. таттха таттха пан̃н̃а̄йа ануггахесса̄мӣти еттха сӣласса асаппа̄йе анупака̄радхамме ваджджетва̄ саппа̄йе упака̄радхамме севанто тасмим̣ тасмим̣ т̣ха̄не сӣлаккхандхам̣ пан̃н̃а̄йа анугган̣ха̄ти на̄ма. сама̄дхипан̃н̃а̄ккхандхесупи есева найо. нихӣйатӣти аттано хӣнатарам̣ пуггалам̣ севанто кха̄рапарисса̄ване а̄ситтаудакам̣ вийа сататам̣ самитам̣ ха̄йати париха̄йати. тулйасевӣти аттана̄ сама̄насевӣ. сет̣т̣хамупанаманти сет̣т̣хам̣ пуггалам̣ он̣аманто. удети кхиппанти кхиппамева вад̣д̣хати. тасма̄ аттано уттарим̣ бхаджетха̄ти йасма̄ сет̣т̣хам̣ пуггалам̣ упанаманто удети кхиппам̣, тасма̄ аттано уттаритарам̣ висит̣т̣хатарам̣ бхаджетха.