9. пат̣хамапа̄пан̣икасуттаван̣н̣ана̄

19. наваме па̄пан̣икоти а̄пан̣ико, а̄пан̣ам̣ уггха̄т̣етва̄ бхан̣д̣авикка̄йакасса ва̄н̣иджассетам̣ адхивачанам̣. абхабботи абха̄джанабхӯто. на саккаччам̣ каммантам̣ адхит̣т̣ха̄тӣти йатха̄ адхит̣т̣хитам̣ суадхит̣т̣хитам̣ хоти, евам̣ сайам̣ аттапаччаккхам̣ каронто на̄дхит̣т̣ха̄ти. таттха паччӯсака̄ле падасаддена ут̣т̣ха̄йа дӣпам̣ джа̄летва̄ бхан̣д̣ам̣ паса̄ретва̄ анисӣданто пуббан̣хасамайам̣ на саккаччам̣ каммантам̣ адхит̣т̣ха̄ти на̄ма. айам̣ хи йам̣ чора̄ раттим̣ бхан̣д̣ам̣ харитва̄ ‘‘идам̣ амха̄кам̣ хаттхато виссаджджесса̄ма̄’’ти а̄пан̣ам̣ гантва̄ аппена аггхена денти, йампи бахуверино манусса̄ раттим̣ нагаре васитва̄ па̄това а̄пан̣ам̣ гантва̄ бхан̣д̣ам̣ ган̣ханти, йам̣ ва̄ пана джанападам̣ гантука̄ма̄ манусса̄ па̄това а̄пан̣ам̣ гантва̄ бхан̣д̣ам̣ кин̣анти, таппаччайасса ла̄бхасса асса̄мико хоти.

ан̃н̃есам̣ бходжанавела̄йа пана бхун̃джитум̣ а̄гантва̄ па̄това бхан̣д̣ам̣ пат̣иса̄метва̄ гхарам̣ гантва̄ бхун̃джитва̄ нидда̄йитва̄ са̄йам̣ пуна а̄пан̣ам̣ а̄гаччханто маджджханхикасамайам̣ на саккаччам̣ каммантам̣ адхит̣т̣ха̄ти на̄ма. со хи йам̣ чора̄ па̄това виссаджджетум̣ на сампа̄пун̣им̣су, дива̄ка̄ле пана паресам̣ асан̃ча̄раккхан̣е а̄пан̣ам̣ гантва̄ аппаггхена денти, йан̃ча бходжанавела̄йа пун̃н̃аванто иссара̄ ‘‘а̄пан̣ато идан̃чидан̃ча ладдхум̣ ват̣т̣атӣ’’ти пахин̣итва̄ а̄хара̄пенти, таппаччайасса ла̄бхасса асса̄мико хоти.

йа̄ва йа̄мабхериниккхамана̄ пана антоа̄пан̣е дӣпам̣ джа̄ла̄петва̄ анисӣданто са̄йанхасамайам̣ на саккаччам̣ каммантам̣ адхит̣т̣ха̄ти на̄ма. со хи йам̣ чора̄ па̄топи дива̄пи виссаджджетум̣ на сампа̄пун̣им̣су, са̄йам̣ пана а̄пан̣ам̣ гантва̄ аппаггхена денти, таппаччайасса ла̄бхасса асса̄мико хоти.

на саккаччам̣ сама̄дхинимиттам̣ адхит̣т̣ха̄тӣти саккаччакирийа̄йа сама̄дхим̣ на сама̄паджджати. еттха ча па̄това четийан̇ган̣абодхийан̇ган̣есу ваттам̣ катва̄ сена̄санам̣ пависитва̄ йа̄ва бхиккха̄ча̄равела̄, та̄ва сама̄паттим̣ аппетва̄ анисӣданто пуббан̣хасамайам̣ на саккаччам̣ сама̄дхинимиттам̣ адхит̣т̣ха̄ти на̄ма. паччха̄бхаттам̣ пана пин̣д̣апа̄тапат̣икканто раттит̣т̣ха̄надива̄т̣т̣ха̄нам̣ пависитва̄ йа̄ва са̄йанхасамайа̄ сама̄паттим̣ аппетва̄ анисӣданто маджджханхикасамайам̣ на саккаччам̣ сама̄дхинимиттам̣ адхит̣т̣ха̄ти на̄ма. са̄йам̣ пана четийам̣ вандитва̄ тхерӯпат̣т̣ха̄нам̣ катва̄ сена̄санам̣ пависитва̄ пат̣хамайа̄мам̣ сама̄паттим̣ сама̄паджджитва̄ анисӣданто са̄йанхасамайам̣ на саккаччам̣ сама̄дхинимиттам̣ адхит̣т̣ха̄ти на̄ма. суккапаккхо вуттапат̣ипаккханайенева ведитаббо. апичеттха ‘‘сама̄паттим̣ аппетва̄’’ти вуттат̣т̣ха̄не сама̄паттийа̄ асати випассана̄пи ват̣т̣ати, сама̄дхинимиттанти ча сама̄дхиа̄рамман̣ампи ват̣т̣атийева. вуттампи четам̣ – ‘‘сама̄дхипи сама̄дхинимиттам̣, сама̄дха̄рамман̣ампи сама̄дхинимитта’’нти.