5. айонисосуттаван̣н̣ана̄

5. пан̃чаме айонисо пан̃хам̣ катта̄ хотӣти ‘‘кати ну кхо, уда̄йи, ануссатит̣т̣ха̄на̄нӣ’’ти вутте ‘‘пуббенива̄со ануссатит̣т̣ха̄нам̣ бхависсатӣ’’ти чинтетва̄ ла̄л̣уда̄йиттхеро вийа анупа̄йачинта̄йа апан̃хамева пан̃ханти катта̄ хоти. айонисо пан̃хам̣ виссаджджета̄ хотӣти евам̣ чинтитам̣ пана пан̃хам̣ виссаджджентопи ‘‘идха, бханте, бхиккху анекавихитам̣ пуббенива̄сам̣ ануссарати. сеййатхидам̣, екампи джа̄ти’’нтиа̄дина̄ найена сойева тхеро вийа айонисо виссаджджета̄ хоти, апан̃хамева пан̃ханти катхети. париман̣д̣алехи падабйан̃джанехӣти еттха падамева аттхасса бйан̃джанато падабйан̃джанам̣. там̣ аккхарапа̄рипӯрим̣ катва̄ дасавидхам̣ бйан̃джанабуддхим̣ апариха̄петва̄ вуттам̣ париман̣д̣алам̣ на̄ма хоти, еварӯпехи падабйан̃джанехӣти аттхо. силит̣т̣хехӣти падасилит̣т̣хата̄йа силит̣т̣хехи. упагатехӣти аттхан̃ча ка̄ран̣ан̃ча упагатехи. на̄ббханумодита̄ти евам̣ йонисо саббам̣ ка̄ран̣асампаннам̣ катва̄пи виссаджджитам̣ парасса пан̃хам̣ на̄бхинумодати на̄бхинандати са̄рипуттаттхерасса пан̃хам̣ ла̄л̣уда̄йиттхеро вийа. йатха̄ха –

‘‘ат̣т̣ха̄нам̣ кхо етам̣, а̄вусо са̄рипутта, анавака̄со, йам̣ со атиккаммева кабал̣ӣка̄ра̄ха̄рабхаккха̄нам̣ дева̄нам̣ сахабйатам̣ ан̃н̃атарам̣ маномайам̣ ка̄йам̣ упапанно сан̃н̃а̄ведайитаниродхам̣ сама̄паджджеййа̄пи вут̣т̣хахеййа̄пи, наттхетам̣ т̣ха̄на’’нти (а. ни. 5.166).

йонисо пан̃хам̣ катта̄тиа̄дӣсу а̄нандаттхеро вийа йонисова пан̃хам̣ чинтетва̄ йонисо виссаджджита̄ хоти. тхеро хи ‘‘кати ну кхо, а̄нанда, ануссатит̣т̣ха̄на̄нӣ’’ти пуччхито ‘‘айам̣ пан̃хо бхависсатӣ’’ти йонисо чинтетва̄ йонисо виссадждженто а̄ха – ‘‘идха, бханте, бхиккху вивиччева ка̄мехи…пе… чатуттхаджджха̄нам̣ упасампаджджа вихарати. идам̣, бханте, ануссатит̣т̣ха̄нам̣ евам̣бха̄витам̣ евам̣бахулӣкатам̣ дит̣т̣хадхаммасукхавиха̄ра̄йа сам̣ваттатӣ’’ти. аббханумодита̄ хотӣти татха̄гато вийа йонисо аббханумодита̄ хоти. татха̄гато хи а̄нандаттхерена пан̃хе виссаджджите ‘‘са̄дху са̄дху, а̄нанда, тена хи твам̣, а̄нанда, имампи чхат̣т̣хам̣ ануссатит̣т̣ха̄нам̣ дха̄рехи. идха̄нанда, бхиккху сатова абхиккамати сатова пат̣иккаматӣ’’тиа̄дима̄ха. чхат̣т̣ха̄дӣни утта̄наттха̄нева.