(14) 4. сантха̄раваггаван̣н̣ана̄

152. чатуттхасса пат̣хаме чатӯхи паччайехи аттано ча парасса ча антарапат̣иччха̄данавасена сантхаран̣ам̣ а̄мисасантха̄ро, дхаммена сантхаран̣ам̣ дхаммасантха̄ро. дутийе упасаггаматтам̣ висесо.

154. татийе вуттаппака̄расса а̄мисасса есана̄ а̄мисесана̄, дхаммасса есана̄ дхаммесана̄. чатуттхе упасаггаматтамева висесо.

156. пан̃чаме маттхакаппатта̄ а̄мисапарийесана̄ а̄мисапарийет̣т̣хи, маттхакаппатта̄ва дхаммапарийесана̄ дхаммапарийет̣т̣хӣти вутта̄.

157. чхат̣т̣хе а̄мисена пӯджанам̣ а̄мисапӯджа̄, дхаммена пӯджанам̣ дхаммапӯджа̄.

158. саттаме а̄титхеййа̄нӣти а̄гантукада̄на̄ни. атитхеййа̄нӣтипи па̄т̣хо.

159. ат̣т̣хаме а̄мисам̣ иджджханакасамиджджханакавасена а̄мисиддхи, дхаммопи иджджханакасамиджджханакавасена дхаммиддхи.

160. наваме а̄мисена вад̣д̣ханам̣ а̄мисавуддхи, дхаммена вад̣д̣ханам̣ дхаммавуддхи.

161. дасаме ратикаран̣ат̣т̣хена а̄мисам̣ а̄мисаратанам̣, дхаммо дхаммаратанам̣.

162. ека̄дасаме а̄мисасса чинанам̣ вад̣д̣ханам̣ а̄мисасанничайо, дхаммасса чинанам̣ вад̣д̣ханам̣ дхаммасанничайо.

163. два̄дасаме а̄мисасса випулабха̄во а̄мисавепуллам̣, дхаммасса випулабха̄во дхаммавепулланти.

сантха̄равагго чатуттхо.