(10) 5. ба̄лаваггаван̣н̣ана̄

99. пан̃чамасса пат̣хаме ана̄гатам̣ бха̄рам̣ вахатӣти ‘‘саммаджджанӣ падӣпо ча, удакам̣ а̄санена ча, чхандапа̄рисуддхиутуккха̄нам̣, бхиккхуган̣ана̄ ча ова̄до, па̄тимоккхам̣ тхерабха̄роти вуччатӣ’’ти имам̣ дасавидхам̣ тхерабха̄рам̣ навако хутва̄ тхерена анаджджхит̣т̣хо каронто ана̄гатам̣ бха̄рам̣ вахати на̄ма. а̄гатам̣ бха̄рам̣ на вахатӣти тхеро сама̄но тамева дасавидхам̣ бха̄рам̣ аттана̄ ва̄ акаронто парам̣ ва̄ асама̄дапенто а̄гатам̣ бха̄рам̣ на вахати на̄ма. дутийасуттепи имина̄ва найена аттхо ведитаббо.

101. татийе акаппийе каппийасан̃н̃ӣти акаппийе сӣхамам̣са̄димхи ‘‘каппийам̣ ида’’нти евам̣сан̃н̃ӣ. каппийе акаппийасан̃н̃ӣти кумбхӣламам̣сабил̣а̄рамам̣са̄димхи каппийе ‘‘акаппийам̣ ида’’нти евам̣сан̃н̃ӣ. чатуттхам̣ вуттанайенева ведитаббам̣.

103. пан̃чаме ана̄паттийа̄ а̄паттисан̃н̃ӣти а̄пуччхитва̄ бхан̣д̣акам̣ дховантасса, паттам̣ пачантасса, кесе чхиндантасса, га̄мам̣ пависантасса̄тиа̄дӣсу ана̄патти, таттха ‘‘а̄патти айа’’нти евам̣сан̃н̃ӣ. а̄паттийа̄ ана̄паттисан̃н̃ӣти тесан̃н̃ева ваттхӯнам̣ ана̄пуччха̄каран̣е а̄патти, таттха ‘‘ана̄паттӣ’’ти евам̣сан̃н̃ӣ. чхат̣т̣хепи вуттанайенева аттхо ведитаббо. саттама̄дӣни утта̄наттха̄нева.

109. ека̄дасаме а̄сава̄ти килеса̄. на куккучча̄йитаббанти сан̇гхабхогасса апат̣т̣хапанам̣ авича̄ран̣ам̣ на куккучча̄йитаббам̣ на̄ма, там̣ куккучча̄йати. куккучча̄йитаббанти тассева пат̣т̣хапанам̣ вича̄ран̣ам̣, там̣ на куккучча̄йати. два̄дасама̄дӣни хет̣т̣ха̄ вуттанайенева ведитабба̄нӣти.

ба̄лавагго пан̃чамо.