3. тапанӣйасуттаван̣н̣ана̄

3. татийе тапанӣйа̄ти идха чева сампара̄йе ча тапантӣти тапанӣйа̄. таппатӣти читтасанта̄пена таппати анусочати ка̄йадуччаритам̣ катва̄ нандайаккхо вийа нандама̄н̣аво вийа нандагогха̄тако вийа девадатто вийа двебха̄тика̄ вийа ча. те кира га̄вам̣ вадхитва̄ мам̣сам̣ две кот̣т̣ха̄се акам̣су. тато канит̣т̣хо джет̣т̣хакам̣ а̄ха – ‘‘майхам̣ да̄рака̄ бахӯ, има̄ни ме анта̄ни дехӣ’’ти. атха нам̣ со ‘‘саббам̣ мам̣сам̣ дведха̄ вибхаттам̣, пуна ким̣ маггасӣ’’ти пахаритва̄ джӣвитаккхайам̣ па̄песи. ниваттитва̄ ча нам̣ олокенто матам̣ дисва̄ ‘‘бха̄рийам̣ ме каммам̣ ката’’нти читтам̣ уппа̄деси. атхасса балавасоко уппаджджи. со т̣хитат̣т̣ха̄непи нисиннат̣т̣ха̄непи тадева каммам̣ а̄ваджджети, читтасса̄дам̣ на лабхати. аситапӣтакха̄йитаса̄йитамписса сарӣре оджам̣ на пхарати, ат̣т̣хичаммаматтамева ахоси. атха нам̣ еко тхеро дисва̄ – ‘‘упа̄сака, твам̣ пахӯтааннапа̄но, ат̣т̣хичаммаматтамева те авасит̣т̣хам̣, аттхи ну кхо те кин̃чи тапанӣйакамма’’нти? со ‘‘а̄ма, бханте’’ти саббам̣ а̄рочеси. атха нам̣ тхеро ‘‘бха̄рийам̣ те упа̄сака каммам̣ катам̣, анапара̄дхат̣т̣ха̄не апараддха’’нти а̄ха. со тенева каммена ка̄лам̣ катва̄ нирайе ниббатто. вачӣдуччаритена суппабуддхасаккакока̄ликачин̃чама̄н̣авика̄дайо вийа таппати. сесаметтха чатуттхе ча утта̄наттхамева. татийам̣.