1. ваджджасуттаван̣н̣ана̄

1. дуканипа̄тасса пат̣хаме ваджджа̄нӣти доса̄ апара̄дха̄. дит̣т̣хадхаммиканти дит̣т̣хева дхамме имасмим̣йева аттабха̄ве уппаннапхалам̣. сампара̄йиканти сампара̄йе ана̄гате аттабха̄ве уппаннапхалам̣. а̄гуча̄ринти па̄пака̄рим̣ апара̄дхака̄ракам̣. ра̄джа̄но гахетва̄ вивидха̄ каммака̄ран̣а̄ ка̄рентети чорам̣ гахетва̄ вивидха̄ каммака̄ран̣а̄ ра̄джапуриса̄ каронти, ра̄джа̄но пана та̄ ка̄ренти на̄ма. там̣ чорам̣ евам̣ каммака̄ран̣а̄ ка̄рийама̄нам̣ еса пассати. тена вуттам̣ – ‘‘пассати чорам̣ а̄гуча̄рим̣ ра̄джа̄но гахетва̄ вивидха̄ каммака̄ран̣а̄ ка̄ренте’’ти. аддхадан̣д̣акехӣти муггарехи, паха̄раса̄дханаттхам̣ ва̄ чатухаттхадан̣д̣ам̣ дведха̄ чхетва̄ гахитадан̣д̣акехи. билан̇гатха̄ликанти кан̃джийауккхаликакаммака̄ран̣ам̣. там̣ каронта̄ сӣсакат̣а̄хам̣ уппа̄т̣етва̄ таттам̣ айогул̣ам̣ сан̣д̣а̄сена гахетва̄ таттха паккхипанти, тена маттхалун̇гам̣ паккутхитва̄ уттарати. сан̇кхамун̣д̣иканти сан̇кхамун̣д̣акаммака̄ран̣ам̣. там̣ каронта̄ уттарот̣т̣хаубхатокан̣н̣ачӯл̣икагалава̄т̣акапариччхедена чаммам̣ чхиндитва̄ саббакесе екато ган̣т̣хим̣ катва̄ дан̣д̣акена вет̣хетва̄ уппа̄т̣енти, саха кесехи чаммам̣ ут̣т̣хахати. тато сӣсакат̣а̄хам̣ тхӯласаккхара̄хи гхам̣ситва̄ дхованта̄ сан̇кхаван̣н̣ам̣ каронти. ра̄хумукханти ра̄хумукхакаммака̄ран̣ам̣. там̣ каронта̄ сан̇куна̄ мукхам̣ виваритва̄ антомукхе дӣпам̣ джа̄ленти, кан̣н̣ачӯл̣ика̄хи ва̄ пат̣т̣ха̄йа мукхам̣ никха̄данена кхананти, лохитам̣ паггхаритва̄ мукхам̣ пӯрети.

джотима̄ликанти сакаласарӣрам̣ телапилотика̄йа вет̣хетва̄ а̄лимпенти. хаттхападжджотиканти хаттхе телапилотика̄йа вет̣хетва̄ дӣпам̣ вийа паджджа̄ленти. еракаваттиканти еракаваттакаммака̄ран̣ам̣. там̣ каронта̄ хет̣т̣ха̄гӣвато пат̣т̣ха̄йа чаммават̣т̣е кантитва̄ гоппхаке т̣хапенти, атха нам̣ йоттехи бандхитва̄ кад̣д̣ханти. со аттано чаммават̣т̣е аккамитва̄ аккамитва̄ патати. чӣракава̄сиканти чӣракава̄сикакаммака̄ран̣ам̣. там̣ каронта̄ татхева чаммават̣т̣е кантитва̄ кат̣ийам̣ т̣хапенти, кат̣ито пат̣т̣ха̄йа кантитва̄ гоппхакесу т̣хапенти, упаримехи хет̣т̣химасарӣрам̣ чӣраканива̄сананиваттхам̣ вийа хоти. ен̣еййаканти ен̣еййакакаммака̄ран̣ам̣. там̣ каронта̄ убхосу каппаресу ча убхосу джа̄н̣укесу ча айавалайа̄ни датва̄ айасӯла̄ни кот̣т̣енти. со чатӯхи айасӯлехи бхӯмийам̣ патит̣т̣хахати. атха нам̣ парива̄ретва̄ аггим̣ каронти. ‘‘ен̣еййако джотипариггахо йатха̄’’ти а̄гатат̣т̣ха̄непи идамева вуттам̣. там̣ ка̄лена ка̄лам̣ сӯла̄ни апанетва̄ чатӯхи ат̣т̣хикот̣ӣхийева т̣хапенти. еварӯпа̄ каммака̄ран̣а̄ на̄ма наттхи.

бал̣исамам̣сиканти убхатомукхехи бал̣исехи пахаритва̄ чаммамам̣санха̄рӯни уппа̄т̣енти. каха̄пан̣иканти сакаласарӣрам̣ тин̣ха̄хи ва̄сӣхи кот̣ито пат̣т̣ха̄йа каха̄пан̣аматтам̣, каха̄пан̣аматтам̣ па̄тента̄ кот̣т̣енти. кха̄ра̄патаччхиканти сарӣрам̣ таттха таттха а̄вудхехи пахаритва̄ коччхехи кха̄рам̣ гхам̣санти, чаммамам̣санха̄рӯни паггхаритва̄ ат̣т̣хикасан̇кхалика̄ва тит̣т̣хати. палигхапариваттиканти екена пассена нипаджджа̄петва̄ кан̣н̣аччхиддена айасӯлам̣ кот̣т̣етва̄ патхавийа̄ ека̄баддхам̣ каронти. атха нам̣ па̄де гахетва̄ а̄вин̃чханти. пала̄лапӣт̣хаканти чхеко ка̄ран̣ико чхавичаммам̣ аччхиндитва̄ нисадапотехи ат̣т̣хӣни бхиндитва̄ кесесу гахетва̄ уккхипати, мам̣сара̄сийева хоти. атха нам̣ кесехева парийонандхитва̄ ган̣ханти, пала̄лават̣т̣им̣ вийа катва̄ пуна вет̣хенти. сунакхехипӣти катипайа̄ни диваса̄ни а̄ха̄рам̣ адатва̄ чха̄такасунакхехи кха̄да̄пенти. те мухуттена ат̣т̣хикасан̇кхаликамева каронти. сӯле утта̄сентети сӯле а̄ропенте.

на паресам̣ па̄бхатам̣ вилумпанто чаратӣти паресам̣ сантакам̣ бхан̣д̣ам̣ параммукхам̣ а̄бхатам̣ антамасо антаравӣтхийам̣ патитам̣ сахассабхан̣д̣икампи дисва̄ ‘‘имина̄ джӣвисса̄мӣ’’ти вилумпанто на вичарати, ко имина̄ аттхоти пит̣т̣хипа̄дена ва̄ пават̣т̣етва̄ гаччхати.

па̄пакоти ла̄мако. дуккхоти анит̣т̣хо. кин̃ча танти ким̣ на̄ма там̣ ка̄ран̣ам̣ бхавеййа. йа̄ханти йена ахам̣. ка̄йадуччаританти па̄н̣а̄типа̄та̄ди тивидхам̣ акусалам̣ ка̄йакаммам̣. ка̄йасучаританти тасса пат̣ипаккхабхӯтам̣ тивидхам̣ кусалакаммам̣. вачӣдуччаританти муса̄ва̄да̄ди чатуббидхам̣ акусалам̣ вачӣкаммам̣. вачӣсучаританти тасса пат̣ипаккхабхӯтам̣ чатуббидхам̣ кусалакаммам̣. манодуччаританти абхиджджха̄ди тивидхам̣ акусалакаммам̣. маносучаританти тасса пат̣ипаккхабхӯтам̣ тивидхам̣ кусалакаммам̣. суддхам̣ атта̄нам̣ парихаратӣти еттха дувидха̄ суддхи – парийа̄йато ча ниппарийа̄йато ча. саран̣агаманена хи парийа̄йена суддхам̣ атта̄нам̣ парихарати на̄ма. татха̄ пан̃чахи сӣлехи, дасахи сӣлехи – чатупа̄рисуддхисӣлена, пат̣хамаджджха̄нена…пе… невасан̃н̃а̄на̄сан̃н̃а̄йатанена, сота̄паттимаггена, сота̄паттипхалена…пе… арахаттамаггена парийа̄йена суддхам̣ атта̄нам̣ парихарати на̄ма. арахаттапхале патит̣т̣хито пана кхӣн̣а̄саво чхиннамӯлаке пан̃чаккхандхе нха̄пентопи кха̄да̄пентопи бхун̃джа̄пентопи нисӣда̄пентопи нипаджджа̄пентопи ниппарийа̄йенева суддхам̣ ниммалам̣ атта̄нам̣ парихарати пат̣иджаггатӣти ведитаббо.

тасма̄ти йасма̄ има̄ни две ваджджа̄нева, но на ваджджа̄ни, тасма̄. ваджджабхӣруноти ваджджабхӣрука̄. ваджджабхайадасса̄виноти ваджджа̄ни бхайато дассанасӣла̄. етам̣ па̄т̣икан̇кханти етам̣ иччхитаббам̣, етам̣ авассам̣бха̄вӣти аттхо. йанти нипа̄таматтам̣, ка̄ран̣авачанам̣ ва̄ йена ка̄ран̣ена паримуччиссати саббаваджджехи. кена пана ка̄ран̣ена паримуччиссатӣти? чатуттхамаггена чева чатуттхапхалена ча. маггена хи паримуччати на̄ма, пхалам̣ патто паримутто на̄ма хотӣти. ким̣ пана кхӣн̣а̄савасса акусалам̣ на випаччатӣти? випаччати, там̣ пана кхӣн̣а̄савабха̄вато пуббе катам̣. тан̃ча кхо имасмим̣йева аттабха̄ве, сампара̄йе панасса каммапхалам̣ на̄ма наттхӣти. пат̣хамам̣.