9. паббаджджа̄суттаван̣н̣ана̄

59. наваме тасма̄ти йасма̄ евам̣ апаричитачиттасса са̄ман̃н̃аттхо на сампаджджати, тасма̄. йатха̄паббаджджа̄паричитан̃ча но читтам̣ бхависсатӣти йатха̄ паббаджджа̄нурӯпена паричитам̣. йе хи кечи паббаджанти на̄ма, саббе те арахаттам̣ паттхетва̄. тасма̄ йам̣ читтам̣ арахатта̄дхигаматтха̄йа паричитам̣ вад̣д̣хитам̣, там̣ йатха̄паббаджджа̄паричитам̣ на̄ма̄ти ведитаббам̣. еварӯпам̣ пана читтам̣ бхависсатӣти сиккхитаббам̣. локасса саман̃ча висаман̃ча̄ти сатталокасса сучаритадуччарита̄ни. локасса бхаван̃ча вибхаван̃ча̄ти тасса вад̣д̣хин̃ча вина̄сан̃ча, татха̄ сампаттин̃ча випаттин̃ча. локасса самудайан̃ча аттхан̇гаман̃ча̄ти пана сан̇кха̄ралокам̣ сандха̄йа вуттам̣, кхандха̄нам̣ ниббаттин̃ча бхедан̃ча̄ти аттхо.