6. ка̄л̣ӣсуттаван̣н̣ана̄

26. чхат̣т̣хе кума̄рипан̃хесӯти кума̄рӣнам̣ ма̄радхӣта̄нам̣ пуччха̄су. аттхасса паттим̣ хадайасса сантинти двӣхипи падехи арахаттамева катхитам̣. сенанти ра̄га̄дикилесасенам̣. пийаса̄тарӯпанти пийаджа̄тикесу ча са̄таджа̄тикесу ча ваттхӯсу уппаджджанато евам̣ладдхана̄мам̣. екохам̣ джха̄йам̣ сукхаманубодхинти евам̣ килесасенам̣ джинитва̄ ахам̣ екакова джха̄йанто сукхам̣ анубуджджхим̣ саччхиака̄сим̣. саккхинти саккхибха̄ваппаттам̣ дхаммасаккхим̣. на сампаджджати кеначи мети майхам̣ кеначи саддхим̣ миттадхаммо на̄ма наттхи. патхавӣкасин̣асама̄паттипарама̄ кхо, бхагини, еке саман̣абра̄хман̣а̄ аттхоти абхиниббаттесунти патхавӣкасин̣асама̄паттипарамо уттамо аттхоти гахетва̄ абхиниббаттесум̣. йа̄вата̄ кхо, бхагини, патхавӣкасин̣асама̄паттипарамата̄ти йаттака̄ патхавӣкасин̣асама̄паттийа̄ уттамакот̣и. тадабхин̃н̃а̄си бхагава̄ти там̣ бхагава̄ абхин̃н̃а̄пан̃н̃а̄йа абхин̃н̃а̄си. асса̄дамаддаса̄ти самудайасаччам̣ аддаса. а̄дӣнавамаддаса̄ти дуккхасаччам̣ аддаса. ниссаран̣амаддаса̄ти ниродхасаччам̣ аддаса. магга̄магган̃а̄н̣адассанамаддаса̄ти маггасаччам̣ аддаса. аттхасса паттӣти етесам̣ чатуннам̣ сачча̄нам̣ дит̣т̣хатта̄ арахаттасан̇кха̄тасса аттхасса патти, саббадаратхапарил̣а̄хавӯпасантата̄йа хадайасса сантӣти.