5. касин̣асуттаван̣н̣ана̄

25. пан̃чаме сакалат̣т̣хена касин̣а̄ни, тада̄рамман̣а̄нам̣ дхамма̄нам̣ кхеттат̣т̣хена адхит̣т̣ха̄нат̣т̣хена ва̄ а̄йатана̄нӣти касин̣а̄йатана̄ни. уддханти упари гаган̣атала̄бхимукхам̣. адхоти хет̣т̣ха̄ бхӯмитала̄бхимукхам̣. тирийанти кхеттаман̣д̣алам̣ вийа саманта̄ париччхиндитва̄. екаччо хи уддхамева касин̣ам̣ вад̣д̣хети, екаччо адхо, екаччо самантато. тена тена ва̄ ка̄ран̣ена евам̣ паса̄рети а̄локамива рӯпадассанака̄мо. тена вуттам̣ – ‘‘патхавӣкасин̣амеко сан̃джа̄на̄ти уддхам̣ адхо тирийа’’нти. адвайанти идам̣ пана екасса ан̃н̃абха̄ва̄нупагаманаттхам̣ вуттам̣. йатха̄ хи удакам̣ павит̣т̣хасса саббадиса̄су удакамева хоти на ан̃н̃ам̣, евамева патхавӣкасин̣ам̣ патхавӣкасин̣амева хоти. наттхи тасса ан̃н̃акасин̣асамбхедоти. есева найо саббаттха. аппама̄н̣анти идам̣ тасса тасса пхаран̣ааппама̄н̣авасена вуттам̣. тан̃хи четаса̄ пхаранто сакаламева пхарати, ‘‘айамасса а̄ди, идам̣ маджджха’’нти пама̄н̣ам̣ на ган̣ха̄ти. вин̃н̃а̄н̣акасин̣анти четтха касин̣уггха̄т̣има̄ка̄се паваттавин̃н̃а̄н̣ам̣. таттха касин̣авасена касин̣уггха̄т̣има̄ка̄се, касин̣уггха̄т̣има̄ка̄савасена таттха паваттавин̃н̃а̄н̣е уддхам̣адхотирийата̄ ведитабба̄. айаметтха сан̇кхепо, каммат̣т̣ха̄набха̄вана̄найена панета̄ни патхавӣкасин̣а̄дӣни виттха̄рато висуддхимагге (висуддхи. 1.51 а̄дайо) вутта̄нева.