3. акамманийаваггаван̣н̣ана̄

21-22. татийасса пат̣хаме абха̄витанти авад̣д̣хитам̣ бха̄вана̄васена аппаваттитам̣. акамманийам̣ хотӣти каммаккхамам̣ каммайоггам̣ на хоти. дутийе вуттавипарийа̄йена аттхо ведитаббо. еттха ча пат̣хаме читтанти ват̣т̣авасена уппанначиттам̣, дутийе виват̣т̣авасена уппанначиттам̣. таттха ча ват̣т̣ам̣ ват̣т̣апа̄дам̣, виват̣т̣ам̣ виват̣т̣апа̄данти айам̣ пабхедо ведитаббо. ват̣т̣ам̣ на̄ма тебхӯмакават̣т̣ам̣, ват̣т̣апа̄дам̣ на̄ма ват̣т̣апат̣ила̄бха̄йа каммам̣, виват̣т̣ам̣ на̄ма нава локуттарадхамма̄, виват̣т̣апа̄дам̣ на̄ма виват̣т̣апат̣ила̄бха̄йа каммам̣. ити имесу суттесу ват̣т̣авиват̣т̣амева катхитанти.

23-24. татийе ват̣т̣авасенева уппанначиттам̣ ведитаббам̣. махато анаттха̄йа сам̣ваттатӣти девамануссасампаттийо ма̄рабрахмаиссарийа̄ни ча дадама̄нампи пунаппунам̣ джа̄тиджара̄бйа̄дхимаран̣асокапаридевадуккхадоманассупа̄йа̄се кхандхадха̄туа̄йатанапат̣иччасамуппа̄дават̣т̣а̄ни ча дадама̄нам̣ кевалам̣ дуккхаккхандхамева детӣти махато анаттха̄йа сам̣ваттати на̄ма̄ти. чатуттхе читтанти виват̣т̣авасенева уппанначиттам̣.

25-26. пан̃чамачхат̣т̣хесу абха̄витам̣ апа̄тубхӯтанти айам̣ висесо. татра̄майадхиппа̄йо – ват̣т̣авасена уппанначиттам̣ на̄ма уппаннампи абха̄витам̣ апа̄тубхӯтамева хоти. касма̄? локуттарапа̄дакаджджха̄навипассана̄маггапхаланибба̄несу паккхандитум̣ асаматтхатта̄. виват̣т̣авасена уппаннам̣ пана бха̄витам̣ па̄тубхӯтам̣ на̄ма хоти. касма̄? тесу дхаммесу паккхандитум̣ саматтхатта̄. курундакава̄сӣ пхуссамиттаттхеро пана̄ха – ‘‘маггачиттамева, а̄вусо, бха̄витам̣ па̄тубхӯтам̣ на̄ма хотӣ’’ти.

27-28. саттамат̣т̣хамесу абахулӣкатанти пунаппунам̣ акатам̣. има̄нипи две ват̣т̣авиват̣т̣авасена уппанначитта̄нева ведитабба̄нӣти.

29. наваме ‘‘джа̄типи дуккха̄’’тиа̄дина̄ найена вуттам̣ дуккхам̣ адхивахати а̄харатӣти дуккха̄дхивахам̣. дуккха̄дхива̄хантипи па̄т̣хо. тассаттхо – локуттарапа̄дакаджджха̄на̄ди арийадхамма̄бхимукхам̣ дуккхена адхива̄хӣйати песӣйатӣти дуккха̄дхива̄хам̣. идампи ват̣т̣авасена уппанначиттамева. тан̃хи вуттаппака̄ра̄ деваманусса̄дисампаттийо дадама̄нампи джа̄тиа̄дӣнам̣ адхиваханато дуккха̄дхивахам̣, арийадхамма̄дхигама̄йа дуппесанато дуккха̄дхива̄хан̃ча на̄ма хотӣти.

30. дасаме виват̣т̣авасена уппанначиттамева читтам̣. тан̃хи ма̄нусакасукхато диббасукхам̣, диббасукхато джха̄насукхам̣, джха̄насукхато випассана̄сукхам̣, випассана̄сукхато маггасукхам̣, маггасукхато пхаласукхам̣, пхаласукхато нибба̄насукхам̣ адхивахати а̄харатӣти сукха̄дхивахам̣ на̄ма хоти, сукха̄дхива̄хам̣ ва̄. тан̃хи локуттарапа̄дакаджджха̄на̄диарийадхамма̄бхимукхам̣ супесайам̣ виссат̣т̣хаиндаваджирасадисам̣ хотӣти сукха̄дхива̄хантипи вуччати. имасмимпи вагге ват̣т̣авиват̣т̣амева катхитанти.

акамманийаваггаван̣н̣ана̄.