2. вӣрийиддхипа̄до

448. катхан̃ча бхиккху вӣрийасама̄дхипадха̄насан̇кха̄расаманна̄гатам̣ иддхипа̄дам̣ бха̄вети? идха бхиккху йасмим̣ самайе локуттарам̣ джха̄нам̣ бха̄вети ниййа̄никам̣ апачайага̄мим̣ дит̣т̣хигата̄нам̣ паха̄на̄йа пат̣хама̄йа бхӯмийа̄ паттийа̄ вивиччева ка̄мехи…пе… пат̣хамам̣ джха̄нам̣ упасампаджджа вихарати дуккхапат̣ипадам̣ дандха̄бхин̃н̃ам̣, тасмим̣ самайе вӣрийасама̄дхипадха̄насан̇кха̄расаманна̄гатам̣ иддхипа̄дам̣ бха̄вети.

449. таттха катамам̣ вӣрийам̣? йо четасико вӣрийа̄рамбхо…пе… самма̄ва̄йа̄мо вӣрийасамбоджджхан̇го магган̇гам̣ маггапарийа̄паннам̣ – идам̣ вуччати ‘‘вӣрийам̣’’.

таттха катамо сама̄дхи? йа̄ читтасса т̣хити сан̣т̣хити…пе… самма̄сама̄дхи сама̄дхисамбоджджхан̇го магган̇гам̣ маггапарийа̄паннам̣ – айам̣ вуччати ‘‘сама̄дхи’’.

таттха катамо падха̄насан̇кха̄ро? йо четасико вӣрийа̄рамбхо…пе… самма̄ва̄йа̄мо вӣрийасамбоджджхан̇го магган̇гам̣ маггапарийа̄паннам̣ – айам̣ вуччати ‘‘падха̄насан̇кха̄ро’’. ити имина̄ ча вӣрийена, имина̄ ча сама̄дхина̄, имина̄ ча падха̄насан̇кха̄рена упето хоти…пе… саманна̄гато. тена вуччати ‘‘вӣрийасама̄дхипадха̄насан̇кха̄расаманна̄гато’’ти.

450. иддхӣти. йа̄ тесам̣ дхамма̄нам̣ иддхи самиддхи иджджхана̄ самиджджхана̄ ла̄бхо пат̣ила̄бхо патти сампатти пхусана̄ саччхикирийа̄ упасампада̄.

иддхипа̄доти. татха̄бхӯтаса пхассо…пе… пагга̄хо авиккхепо.

иддхипа̄дам̣ бха̄ветӣти. те дхамме а̄севати бха̄вети бахулӣкароти. тена вуччати ‘‘иддхипа̄дам̣ бха̄ветӣ’’ти.