(2) ат̣т̣ха кусӣтаваттхӯни

953. таттха катама̄ни ат̣т̣ха кусӣтаваттхӯни?

(ка) идха бхиккхуна̄ каммам̣ ка̄таббам̣ хоти. тасса евам̣ хоти – ‘‘каммам̣ кхо ме ка̄таббам̣ бхависсати. каммам̣ кхо пана ме каронтасса ка̄йо киламиссати. ханда̄хам̣ нипаджджа̄мӣ’’ти. со нипаджджати; на вӣрийам̣ а̄рабхати аппаттасса паттийа̄, анадхигатасса адхигама̄йа, асаччхикатасса саччхикирийа̄йа. идам̣ пат̣хамам̣ кусӣтаваттху.

(кха) пуна чапарам̣ бхиккхуна̄ каммам̣ катам̣ хоти. тасса евам̣ хоти – ‘‘ахам̣ кхо каммам̣ ака̄сим̣. каммам̣ кхо пана ме каронтасса ка̄йо киланто. ханда̄хам̣ нипаджджа̄мӣ’’ти. со нипаджджати; на вӣрийам̣ а̄рабхати аппаттасса паттийа̄, анадхигатасса адхигама̄йа, асаччхикатасса саччхикирийа̄йа. идам̣ дутийам̣ кусӣтаваттху.

(га) пуна чапарам̣ бхиккхуна̄ магго гантаббо хоти. тасса евам̣ хоти – ‘‘магго кхо ме гантаббо бхависсати. маггам̣ кхо пана ме гаччхантасса ка̄йо киламиссати. ханда̄хам̣ нипаджджа̄мӣ’’ти. со нипаджджати; на вӣрийам̣ а̄рабхати аппаттасса паттийа̄, анадхигатасса адхигама̄йа, асаччхикатасса саччхикирийа̄йа. идам̣ татийам̣ кусӣтаваттху.

(гха) пуна чапарам̣ бхиккхуна̄ магго гато хоти. тасса евам̣ хоти – ‘‘ахам̣ кхо маггам̣ агама̄сим̣. маггам̣ кхо пана ме гаччхантасса ка̄йо киланто. ханда̄хам̣ нипаджджа̄мӣ’’ти. со нипаджджати; на вӣрийам̣ а̄рабхати аппаттасса паттийа̄, анадхигатасса адхигама̄йа, асаччхикатасса саччхикирийа̄йа. идам̣ чатуттхам̣ кусӣтаваттху.

(н̇а) пуна чапарам̣ бхиккху га̄мам̣ ва̄ нигамам̣ ва̄ пин̣д̣а̄йа чаранто на лабхати лӯкхасса ва̄ пан̣ӣтасса ва̄ бходжанасса йа̄вадаттхам̣ па̄рипӯрим̣. тасса евам̣ хоти – ‘‘ахам̣ кхо га̄мам̣ ва̄ нигамам̣ ва̄ пин̣д̣а̄йа чаранто на̄латтхам̣ лӯкхасса ва̄ пан̣ӣтасса ва̄ бходжанасса йа̄вадаттхам̣ па̄рипӯрим̣. тасса ме ка̄йо киланто акамман̃н̃о. ханда̄хам̣ нипаджджа̄мӣ’’ти. со нипаджджати; на вӣрийам̣ а̄рабхати аппаттасса паттийа̄, анадхигатасса адхигама̄йа, асаччхикатасса саччхикирийа̄йа. идам̣ пан̃чамам̣ кусӣтаваттху.

(ча) пуна чапарам̣ бхиккху га̄мам̣ ва̄ нигамам̣ ва̄ пин̣д̣а̄йа чаранто лабхати лӯкхасса ва̄ пан̣ӣтасса ва̄ бходжанасса йа̄вадаттхам̣ па̄рипӯрим̣. тасса евам̣ хоти – ‘‘ахам̣ кхо га̄мам̣ ва̄ нигамам̣ ва̄ пин̣д̣а̄йа чаранто алаттхам̣ лӯкхасса ва̄ пан̣ӣтасса ва̄ бходжанасса йа̄вадаттхам̣ па̄рипӯрим̣. тасса ме ка̄йо киланто акамман̃н̃о ма̄са̄читам̣ ман̃н̃е. ханда̄хам̣ нипаджджа̄мӣ’’ти. со нипаджджати; на вӣрийам̣ а̄рабхати аппаттасса паттийа̄, анадхигатасса адхигама̄йа, асаччхикатасса саччхикирийа̄йа. идам̣ чхат̣т̣хам̣ кусӣтаваттху.

(чха) пуна чапарам̣ бхиккхуно уппанно хоти аппаматтако а̄ба̄дхо. тасса евам̣ хоти – ‘‘уппанно кхо ме айам̣ аппаматтако а̄ба̄дхо. аттхи каппо нипаджджитум̣. ханда̄хам̣ нипаджджа̄мӣ’’ти. со нипаджджати; на вӣрийам̣ а̄рабхати аппаттасса паттийа̄, анадхигатасса адхигама̄йа, асаччхикатасса саччхикирийа̄йа. идам̣ саттамам̣ кусӣтаваттху.

(джа) пуна чапарам̣ бхиккху гила̄на̄ вут̣т̣хито [гила̄навут̣т̣хито (садданӣбхи) а. ни. 6.16 па̄л̣ийа̄ т̣ӣка̄ пасситабба̄] хоти ачиравут̣т̣хито гелан̃н̃а̄. тасса евам̣ хоти – ‘‘ахам̣ кхо гила̄на̄ вут̣т̣хито ачиравут̣т̣хито гелан̃н̃а̄. тасса ме ка̄йо дуббало акамман̃н̃о. ханда̄хам̣ нипаджджа̄мӣ’’ти. со нипаджджати; на вӣрийам̣ а̄рабхати аппаттасса паттийа̄, анадхигатасса адхигама̄йа, асаччхикатасса саччхикирийа̄йа. идам̣ ат̣т̣хамам̣ кусӣтаваттху. има̄ни ат̣т̣ха кусӣтаваттхӯни.