(15) пан̃ча дит̣т̣хадхамманибба̄нава̄да̄

943. таттха катаме пан̃ча дит̣т̣хадхамманибба̄нава̄да̄?

(ка) идхекаччо саман̣о ва̄ бра̄хман̣о ва̄ евам̣ва̄дӣ хоти евам̣дит̣т̣хи [евам̣дит̣т̣хи (сйа̄.)] – ‘‘йато кхо, бхо, айам̣ атта̄ пан̃чахи ка̄магун̣ехи самаппито саман̇гӣбхӯто парича̄рети, етта̄вата̄ кхо, бхо, айам̣ атта̄ парамадит̣т̣хадхамманибба̄наппатто хотӣ’’ти. иттхеке сато саттасса парамадит̣т̣хадхамманибба̄нам̣ пан̃н̃апенти.

(кха) таман̃н̃о евама̄ха – ‘‘аттхи кхо, бхо, есо атта̄ йам̣ твам̣ вадеси несо наттхӣти вада̄ми. но ча кхо, бхо, айам̣ атта̄ етта̄вата̄ парамадит̣т̣хадхамманибба̄наппатто хоти. там̣ кисса хету? ка̄ма̄ хи, бхо, аничча̄ дуккха̄ випарин̣а̄мадхамма̄. тесам̣ випарин̣а̄ман̃н̃атха̄бха̄ва̄ уппаджджанти сокапаридевадуккхадоманассупа̄йа̄са̄. йато кхо, бхо, айам̣ атта̄ вивиччева ка̄мехи…пе… пат̣хамам̣ джха̄нам̣ упасампаджджа вихарати, етта̄вата̄ кхо, бхо, айам̣ атта̄ парамадит̣т̣хадхамманибба̄наппатто хотӣ’’ти. иттхеке сато саттасса парамадит̣т̣хадхамманибба̄нам̣ пан̃н̃апенти.

(га) таман̃н̃о евама̄ха – ‘‘аттхи кхо, бхо, есо атта̄ йам̣ твам̣ вадеси. несо наттхӣти вада̄ми. но ча кхо, бхо, айам̣ атта̄ етта̄вата̄ парамадит̣т̣хадхамманибба̄наппатто хоти. там̣ кисса хету? йадева таттха витаккитам̣ вича̄ритам̣ етена етам̣ ол̣а̄рикам̣ аккха̄йати. йато кхо, бхо, айам̣ атта̄ витаккавича̄ра̄нам̣ вӯпасама̄…пе… дутийам̣ джха̄нам̣ упасампаджджа вихарати, етта̄вата̄ кхо, бхо, айам̣ атта̄ парамадит̣т̣хадхамманибба̄наппатто хотӣ’’ти. иттхеке сато саттасса парамадит̣т̣хадхамманибба̄нам̣ пан̃н̃апенти.

(гха) таман̃н̃о евама̄ха – ‘‘аттхи кхо, бхо, есо атта̄ йам̣ твам̣ вадеси. несо наттхӣти вада̄ми. но ча кхо, бхо, айам̣ атта̄ етта̄вата̄ парамадит̣т̣хадхамманибба̄наппатто хоти. там̣ кисса хету? йадева таттха пӣтигатам̣ четасо уппила̄витам̣, етена етам̣ ол̣а̄рикам̣ аккха̄йати. йато кхо, бхо, айам̣ атта̄ пӣтийа̄ ча вира̄га̄…пе… татийам̣ джха̄нам̣ упасампаджджа вихарати, етта̄вата̄ кхо, бхо, айам̣ атта̄ парамадит̣т̣хадхамманибба̄наппатто хотӣ’’ти. иттхеке сато саттасса парамадит̣т̣хадхамманибба̄нам̣ пан̃н̃апенти.

(н̇а) таман̃н̃о евама̄ха – ‘‘аттхи кхо, бхо, есо атта̄ йам̣ твам̣ вадеси. несо наттхӣти вада̄ми. но ча кхо, бхо, айам̣ атта̄ етта̄вата̄ парамадит̣т̣хадхамманибба̄наппатто хоти. там̣ кисса хету? йадева таттха сукхапӣти четасо а̄бхого, етена етам̣ ол̣а̄рикам̣ аккха̄йати. йато кхо, бхо, айам̣ атта̄ сукхасса ча паха̄на̄…пе… чатуттхам̣ джха̄нам̣ упасампаджджа вихарати, етта̄вата̄ кхо, бхо, айам̣ атта̄ парамадит̣т̣хадхамманибба̄наппатто хотӣ’’ти. иттхеке сато саттасса парамадит̣т̣хадхамманибба̄нам̣ пан̃н̃апенти. име пан̃ча дит̣т̣хадхамманибба̄нава̄да̄.

пан̃чакам̣.