(2-5) чатта̄ро гантха̄дӣ

938. таттха катаме чатта̄ро гантха̄ …пе… чатта̄ро огха̄…пе… чатта̄ро йога̄…пе… чатта̄ри упа̄да̄на̄ни? ка̄мупа̄да̄нам̣, дит̣т̣хупа̄да̄нам̣, сӣлаббатупа̄да̄нам̣, аттава̄дупа̄да̄нам̣.

(ка) ка̄мупа̄да̄нам̣

таттха катамам̣ ка̄мупа̄да̄нам̣? йо ка̄месу ка̄маччхандо…пе… ка̄маджджхоса̄нам̣ – идам̣ вуччати ‘‘ка̄мупа̄да̄нам̣’’.

(кха) дит̣т̣хупа̄да̄нам̣

таттха катамам̣ дит̣т̣хупа̄да̄нам̣? ‘‘наттхи диннам̣, наттхи йит̣т̣хам̣…пе… йе иман̃ча локам̣ паран̃ча локам̣ сайам̣ абхин̃н̃а̄ саччхикатва̄ паведентӣ’’ти. йа̄ еварӯпа̄ дит̣т̣хи дит̣т̣хигатам̣…пе… випарийа̄сагга̄хо – идам̣ вуччати ‘‘дит̣т̣хупа̄да̄нам̣’’. т̣хапетва̄ сӣлаббатупа̄да̄нан̃ча аттава̄дупа̄да̄нан̃ча сабба̄пи миччха̄дит̣т̣хи дит̣т̣хупа̄да̄нам̣.

(га) сӣлаббатупа̄да̄нам̣

таттха катамам̣ сӣлаббатупа̄да̄нам̣? ито бахиддха̄ саман̣абра̄хман̣а̄нам̣ сӣлена суддхи ватена суддхи сӣлаббатена суддхӣти. йа̄ еварӯпа̄ дит̣т̣хи дит̣т̣хигатам̣…пе… випарийа̄сагга̄хо – идам̣ вуччати ‘‘сӣлаббатупа̄да̄нам̣’’.

(гха) аттава̄дупа̄да̄нам̣

таттха катамам̣ аттава̄дупа̄да̄нам̣? идха ассутава̄ путхуджджано арийа̄нам̣ адасса̄вӣ арийадхаммасса аковидо арийадхамме авинӣто, саппуриса̄нам̣ адасса̄вӣ саппурисадхаммасса аковидо саппурисадхамме авинӣто – рӯпам̣ аттато саманупассати рӯпавантам̣ ва̄ атта̄нам̣ аттани ва̄ рӯпам̣ рӯпасмим̣ ва̄ атта̄нам̣. веданам̣…пе… сан̃н̃ам̣…пе… сан̇кха̄ре…пе… вин̃н̃а̄н̣ам̣ аттато саманупассати вин̃н̃а̄н̣авантам̣ ва̄ атта̄нам̣ аттани ва̄ вин̃н̃а̄н̣ам̣ вин̃н̃а̄н̣асмим̣ ва̄ атта̄нам̣. йа̄ еварӯпа̄ дит̣т̣хи дит̣т̣хигатам̣…пе… випарийа̄сагга̄хо – идам̣ вуччати ‘‘аттава̄дупа̄да̄нам̣’’. има̄ни чатта̄ри упа̄да̄на̄ни.