(24. ка) асса̄дадит̣т̣хи

925. таттха катама̄ асса̄дадит̣т̣хи? идхекаччо саман̣о ва̄ бра̄хман̣о ва̄ евам̣ва̄дӣ хоти евам̣дит̣т̣хӣ – ‘‘наттхи ка̄месу досо’’ти. со ка̄месу па̄табйатам̣ а̄паджджати. айам̣ вуччати ‘‘асса̄дадит̣т̣хи’’.

(кха) атта̄нудит̣т̣хи

таттха катама̄ атта̄нудит̣т̣хи? идха ассутава̄ путхуджджано арийа̄нам̣ адасса̄вӣ арийадхаммасса аковидо арийадхамме авинӣто, саппуриса̄нам̣ адасса̄вӣ саппурисадхаммасса аковидо саппурисадхамме авинӣто – рӯпам̣ аттато саманупассати рӯпавантам̣ ва̄ атта̄нам̣ аттани ва̄ рӯпам̣ рӯпасмим̣ ва̄ атта̄нам̣. веданам̣…пе… сан̃н̃ам̣…пе… сан̇кха̄ре…пе… вин̃н̃а̄н̣ам̣ аттато саманупассати вин̃н̃а̄н̣авантам̣ ва̄ атта̄нам̣ аттани ва̄ вин̃н̃а̄н̣ам̣ вин̃н̃а̄н̣асмим̣ ва̄ атта̄нам̣. йа̄ еварӯпа̄ дит̣т̣хи дит̣т̣хигатам̣…пе… випарийа̄сагга̄хо – айам̣ вуччати ‘‘атта̄нудит̣т̣хи’’.

(га) миччха̄дит̣т̣хи

таттха катама̄ миччха̄дит̣т̣хи? ‘‘наттхи диннам̣, наттхи йит̣т̣хам̣…пе… йе иман̃ча локам̣ паран̃ча локам̣ сайам̣ абхин̃н̃а̄ саччхикатва̄ паведентӣ’’ти – йа̄ еварӯпа̄ дит̣т̣хи дит̣т̣хигатам̣…пе… випарийа̄сагга̄хо – айам̣ вуччати ‘‘миччха̄дит̣т̣хи’’. сассатадит̣т̣хи асса̄дадит̣т̣хи, сакка̄йадит̣т̣хи атта̄нудит̣т̣хи, уччхедадит̣т̣хи миччха̄дит̣т̣хи.