(13) тӣн̣и бхайа̄ни

921. таттха катама̄ни тӣн̣и бхайа̄ни? джа̄тибхайам̣, джара̄бхайам̣, маран̣абхайам̣.

(ка) таттха катамам̣ джа̄тибхайам̣? джа̄тим̣ пат̣ичча бхайам̣ бхайа̄накам̣ чхамбхитаттам̣ ломахам̣со четасо утра̄со – идам̣ вуччати ‘‘джа̄тибхайам̣’’.

(кха) таттха катамам̣ джара̄бхайам̣? джарам̣ пат̣ичча бхайам̣ бхайа̄накам̣ чхамбхитаттам̣ ломахам̣со четасо утра̄со – идам̣ вуччати ‘‘джара̄бхайам̣’’.

(га) таттха катамам̣ маран̣абхайам̣? маран̣ам̣ пат̣ичча бхайам̣ бхайа̄накам̣ чхамбхитаттам̣ ломахам̣со четасо утра̄со – идам̣ вуччати ‘‘маран̣абхайам̣’’. има̄ни тӣн̣и бхайа̄ни.