2. карун̣а̄

653. катхан̃ча бхиккху карун̣а̄сахагатена четаса̄ екам̣ дисам̣ пхаритва̄ вихарати? сеййатха̄пи на̄ма екам̣ пуггалам̣ дуггатам̣ дурӯпетам̣ дисва̄ карун̣а̄йеййа, евамева саббе сатте карун̣а̄йа пхарати.

таттха катама̄ карун̣а̄? йа̄ саттесу карун̣а̄ карун̣а̄йана̄ карун̣а̄йитаттам̣ карун̣а̄четовимутти – айам̣ вуччати ‘‘карун̣а̄’’.

таттха катамам̣ читтам̣? йам̣ читтам̣ мано ма̄насам̣…пе… таджджа̄мановин̃н̃а̄н̣адха̄ту – идам̣ вуччати ‘‘читтам̣’’. идам̣ читтам̣ има̄йа карун̣а̄йа сахагатам̣ хоти сахаджа̄там̣ сам̣сат̣т̣хам̣ сампайуттам̣. тена вуччати ‘‘карун̣а̄сахагатена четаса̄’’ти.

654. ‘‘екам̣ диса’’нти пураттхимам̣ ва̄ дисам̣ паччхимам̣ ва̄ дисам̣ уттарам̣ ва̄ дисам̣ даккхин̣ам̣ ва̄ дисам̣ уддхам̣ ва̄ адхо ва̄ тирийам̣ ва̄ видисам̣ ва̄.

655. ‘‘пхаритва̄’’ти пхаритва̄ адхимуччитва̄.

656. ‘‘вихаратӣ’’ти ирийати ваттати па̄лети йапети йа̄пети чарати вихарати. тена вуччати ‘‘вихаратӣ’’ти.

657. ‘‘татха̄ дутийа’’нти йатхева екам̣ дисам̣ татха̄ дутийам̣ дисам̣ татха̄ татийам̣ дисам̣ татха̄ чатуттхам̣ дисам̣ татха̄ уддхам̣ татха̄ адхо татха̄ тирийам̣ татха̄ видисам̣.

658. ‘‘саббадхи саббаттата̄йа сабба̄вантам̣ лока’’нти саббена саббам̣ саббатха̄ саббам̣ асесам̣ ниссесам̣. парийа̄да̄йавачанаметам̣ – ‘‘саббадхи саббаттата̄йа сабба̄вантам̣ лока’’нти.

659. ‘‘карун̣а̄сахагатена четаса̄’’ти таттха катама̄ карун̣а̄? йа̄ саттесу карун̣а̄ карун̣а̄йана̄ карун̣а̄йитаттам̣ карун̣а̄четовимутти – айам̣ вуччати ‘‘карун̣а̄’’.

таттха катамам̣ читтам̣? йам̣ читтам̣ мано ма̄насам̣…пе… таджджа̄мановин̃н̃а̄н̣адха̄ту – идам̣ вуччати ‘‘читтам̣’’. идам̣ читтам̣ има̄йа карун̣а̄йа сахагатам̣ хоти сахаджа̄там̣ сам̣сат̣т̣хам̣ сампайуттам̣. тена вуччати ‘‘карун̣а̄сахагатена четаса̄’’ти.

660. ‘‘випулена̄’’ти йам̣ випулам̣ там̣ махаггатам̣, йам̣ махаггатам̣ там̣ аппама̄н̣ам̣, йам̣ аппама̄н̣ам̣ со аверо, йо аверо со абйа̄паджджо.

661. ‘‘пхаритва̄’’ти пхаритва̄ адхимуччитва̄.

662. ‘‘вихаратӣ’’ти…пе… тена вуччати ‘‘вихаратӣ’’ти.