6. локуттаравипа̄ка̄

633. чатта̄ри джха̄на̄ни – пат̣хамам̣ джха̄нам̣, дутийам̣ джха̄нам̣, татийам̣ джха̄нам̣, чатуттхам̣ джха̄нам̣.

634. таттха катамам̣ пат̣хамам̣ джха̄нам̣? идха бхиккху йасмим̣ самайе локуттарам̣ джха̄нам̣ бха̄вети ниййа̄никам̣ апачайага̄мим̣ дит̣т̣хигата̄нам̣ паха̄на̄йа пат̣хама̄йа бхӯмийа̄ паттийа̄ вивиччева ка̄мехи…пе… пат̣хамам̣ джха̄нам̣ упасампаджджа вихарати дуккхапат̣ипадам̣ дандха̄бхин̃н̃ам̣, тасмим̣ самайе пхассо хоти…пе… авиккхепо хоти. име дхамма̄ кусала̄. тассева локуттарасса кусаласса джха̄насса кататта̄ бха̄витатта̄ випа̄кам̣ вивиччева ка̄мехи…пе… пат̣хамам̣ джха̄нам̣ упасампаджджа вихарати дуккхапат̣ипадам̣ дандха̄бхин̃н̃ам̣ сун̃н̃атам̣, тасмим̣ самайе пан̃чан̇гикам̣ джха̄нам̣ хоти – витакко, вича̄ро, пӣти, сукхам̣, читтассекаггата̄. идам̣ вуччати ‘‘пат̣хамам̣ джха̄нам̣’’. авасеса̄ дхамма̄ джха̄насампайутта̄.

таттха катамам̣ дутийам̣ джха̄нам̣? идха бхиккху йасмим̣ самайе локуттарам̣ джха̄нам̣ бха̄вети ниййа̄никам̣ апачайага̄мим̣ дит̣т̣хигата̄нам̣ паха̄на̄йа пат̣хама̄йа бхӯмийа̄ паттийа̄ витаккавича̄ра̄нам̣ вӯпасама̄…пе… дутийам̣ джха̄нам̣ упасампаджджа вихарати дуккхапат̣ипадам̣ дандха̄бхин̃н̃ам̣, тасмим̣ самайе пхассо хоти…пе… авиккхепо хоти. име дхамма̄ кусала̄. тассева локуттарасса кусаласса джха̄насса кататта̄ бха̄витатта̄ випа̄кам̣ витаккавича̄ра̄нам̣ вӯпасама̄…пе… дутийам̣ джха̄нам̣ …пе… татийам̣ джха̄нам̣…пе… чатуттхам̣ джха̄нам̣…пе… пат̣хамам̣ джха̄нам̣…пе… пан̃чамам̣ джха̄нам̣ упасампаджджа вихарати дуккхапат̣ипадам̣ дандха̄бхин̃н̃ам̣ сун̃н̃атам̣, тасмим̣ самайе дуван̇гикам̣ джха̄нам̣ хоти – упеккха̄, читтассекаггата̄. идам̣ вуччати ‘‘пан̃чамам̣ джха̄нам̣’’. авасеса̄ дхамма̄ джха̄насампайутта̄.