5. ека̄саникан̇гакатха̄

28. ека̄саникан̇гампи ‘‘на̄на̄санабходжанам̣ пат̣иккхипа̄ми, ека̄саникан̇гам̣ сама̄дийа̄мӣ’’ти имесам̣ ан̃н̃атаравачанена сама̄диннам̣ хоти.

тена пана ека̄саникена а̄санаса̄ла̄йам̣ нисӣдантена тхера̄сане анисӣдитва̄ ‘‘идам̣ майхам̣ па̄пун̣иссатӣ’’ти патирӯпам̣ а̄санам̣ саллаккхетва̄ нисӣдитаббам̣. сачасса виппакате бходжане а̄чарийо ва̄ упаджджха̄йо ва̄ а̄гаччхати, ут̣т̣ха̄йа ваттам̣ ка̄тум̣ ват̣т̣ати. типит̣акачӯл̣а̄бхайаттхеро пана̄ха ‘‘а̄санам̣ ва̄ раккхеййа бходжанам̣ ва̄, айан̃ча виппакатабходжано, тасма̄ ваттам̣ кароту, бходжанам̣ пана ма̄ бхун̃джатӯ’’ти. идамасса видха̄нам̣.

пабхедато пана айампи тивидхо хоти. таттха уккат̣т̣хо аппам̣ ва̄ хоту баху ва̄, йамхи бходжане хаттхам̣ ота̄рети, тато ан̃н̃ам̣ ган̣хитум̣ на лабхати. сачепи манусса̄ ‘‘тхерена на кин̃чи бхутта’’нти саппиа̄дӣни а̄харанти, бхесаджджаттхамева ват̣т̣анти, на а̄ха̄раттхам̣. маджджхимо йа̄ва патте бхаттам̣ на кхӣйати, та̄ва ан̃н̃ам̣ ган̣хитум̣ лабхати. айан̃хи бходжанапарийантико на̄ма хоти. мудуко йа̄ва а̄сана̄ на вут̣т̣ха̄ти та̄ва бхун̃джитум̣ лабхати. со хи удакапарийантико ва̄ хоти йа̄ва паттадхованам̣ на ган̣ха̄ти та̄ва бхун̃джанато, а̄санапарийантико ва̄ йа̄ва на вут̣т̣ха̄ти та̄ва бхун̃джанато.

имесам̣ пана тин̣н̣ампи на̄на̄санабходжанам̣ бхуттаккхан̣е дхутан̇гам̣ бхиджджати. айаметтха бхедо.

айам̣ пана̄нисам̣со, аппа̄ба̄дхата̄, аппа̄тан̇ката̄, лахут̣т̣ха̄нам̣, балам̣, пха̄сувиха̄ро, анатириттапаччайа̄ ана̄патти, расатан̣ха̄виноданам̣ аппиччхата̄дӣнам̣ ануломавуттита̄ти.

ека̄санабходжане ратам̣,

на йатим̣ бходжанапаччайа̄ руджа̄;

висаханти расе алолупо,

париха̄пети на каммаматтано.

ити пха̄сувиха̄рака̄ран̣е,

сучисаллекхаратӯпасевите;

джанайетха висуддхама̄насо,

ратимека̄санабходжане йатӣти.

айам̣ ека̄саникан̇ге сама̄да̄навидха̄наппабхедабхеда̄нисам̣саван̣н̣ана̄.