1. пам̣сукӯликан̇гакатха̄

24. ида̄ни екекасса сама̄да̄навидха̄наппабхедабхеда̄нисам̣се ван̣н̣айисса̄ма. пам̣сукӯликан̇гам̣ та̄ва ‘‘гахапатида̄начӣварам̣ пат̣иккхипа̄ми, пам̣сукӯликан̇гам̣ сама̄дийа̄мӣ’’ти имесу двӣсу вачанесу ан̃н̃атарена сама̄диннам̣ хоти. идам̣ та̄веттха сама̄да̄нам̣.

евам̣ сама̄диннадхутан̇гена пана тена соса̄никам̣, па̄пан̣икам̣, ратхийачол̣ам̣, сан̇ка̄рачол̣ам̣, соттхийам̣, нха̄начол̣ам̣, титтхачол̣ам̣, гатапачча̄гатам̣, аггид̣ад̣д̣хам̣, гокха̄йитам̣, упачика̄кха̄йитам̣, ундӯракха̄йитам̣, антаччхиннам̣, даса̄ччхиннам̣, дхаджа̄хат̣ам̣, тхӯпачӣварам̣, саман̣ачӣварам̣, а̄бхисекикам̣, иддхимайам̣, пантхикам̣, ва̄та̄хат̣ам̣, девадаттийам̣, са̄муддийантиетесу ан̃н̃атарам̣ чӣварам̣ гахетва̄ пха̄летва̄ дуббалат̣т̣ха̄нам̣ паха̄йа тхират̣т̣ха̄на̄ни дховитва̄ чӣварам̣ катва̄ пора̄н̣ам̣ гахапатичӣварам̣ апанетва̄ парибхун̃джитаббам̣.

таттха соса̄никанти суса̄не патитакам̣. па̄пан̣иканти а̄пан̣адва̄ре патитакам̣. ратхийачол̣анти пун̃н̃аттхикехи ва̄тапа̄нантарена ратхика̄йа чхад̣д̣итачол̣акам̣. сан̇ка̄рачол̣анти сан̇ка̄рат̣т̣ха̄не чхад̣д̣итачол̣акам̣. соттхийанти габбхамалам̣ пун̃чхитва̄ чхад̣д̣итаваттхам̣. тисса̄маччама̄та̄ кира сатаггханакена ваттхена габбхамалам̣ пун̃чха̄петва̄ пам̣сукӯлика̄ ган̣хиссантӣти та̄лавел̣имагге чхад̣д̣а̄песи. бхиккхӯ джин̣н̣акат̣т̣ха̄наттхамева ган̣ханти. нха̄начол̣анти йам̣ бхӯтаведжджехи сасӣсам̣ нха̄пита̄ ка̄л̣акан̣н̣ичол̣анти чхад̣д̣етва̄ гаччханти.

титтхачол̣анти нха̄натиттхе чхад̣д̣итапилотика̄. гатапачча̄гатанти йам̣ манусса̄ суса̄нам̣ гантва̄ пачча̄гата̄ нхатва̄ чхад̣д̣енти. аггид̣ад̣д̣ханти аггина̄ д̣ад̣д̣хаппадесам̣. тан̃хи манусса̄ чхад̣д̣енти. гокха̄йита̄дӣни па̄кат̣а̄нева. та̄диса̄нипи хи манусса̄ чхад̣д̣енти. дхаджа̄хат̣анти на̄вам̣ а̄роханта̄ дхаджам̣ бандхитва̄ а̄рӯханти. там̣ тесам̣ дассана̄тиккаме гахетум̣ ват̣т̣ати. йампи йуддхабхӯмийам̣ дхаджам̣ бандхитва̄ т̣хапитам̣, там̣ двиннампи сена̄нам̣ гатака̄ле гахетум̣ ват̣т̣ати.

тхӯпачӣваранти ваммикам̣ париккхипитва̄ баликаммам̣ катам̣. саман̣ачӣваранти бхиккхусантакам̣. а̄бхисекиканти ран̃н̃о абхисекат̣т̣ха̄не чхад̣д̣итачӣварам̣. иддхимайанти ехибхиккхучӣварам̣. пантхиканти антара̄магге патитакам̣. йам̣ пана са̄мика̄нам̣ сатисаммосена патитам̣, там̣ тхокам̣ раккхитва̄ гахетаббам̣. ва̄та̄хат̣анти ва̄тена пахаритва̄ дӯре па̄титам̣, там̣ пана са̄мике апассантена гахетум̣ ват̣т̣ати. девадаттийанти ануруддхаттхерасса вийа девата̄хи диннакам̣. са̄муддийанти самуддавӣчӣхи тхале усса̄ритам̣.

йам̣ пана сан̇гхасса дема̄ти диннам̣, чол̣акабхиккха̄йа ва̄ чарама̄нехи ладдхам̣, на там̣ пам̣сукӯлам̣. бхиккхудаттийепи йам̣ вассаггена га̄хетва̄ ва̄ дӣйати, сена̄саначӣварам̣ ва̄ хоти, на там̣ пам̣сукӯлам̣. но га̄ха̄петва̄ диннамева пам̣сукӯлам̣. татрапи йам̣ да̄йакехи бхиккхусса па̄дамӯле никкхиттам̣, тена пана бхиккхуна̄ пам̣сукӯликасса хаттхе т̣хапетва̄ диннам̣, там̣ екатосуддхикам̣ на̄ма. йам̣ бхиккхуно хаттхе т̣хапетва̄ диннам̣, тена пана па̄дамӯле т̣хапитам̣, тампи екатосуддхикам̣. йам̣ бхиккхунопи па̄дамӯле т̣хапитам̣, тена̄пи татхева диннам̣, там̣ убхатосуддхикам̣. йам̣ хаттхе т̣хапетва̄ ладдхам̣, хаттхейева т̣хапитам̣, там̣ ануккат̣т̣хачӣварам̣ на̄ма. ити имам̣ пам̣сукӯлабхедам̣ н̃атва̄ пам̣сукӯликена чӣварам̣ парибхун̃джитаббанти идаметтха видха̄нам̣.

айам̣ пана пабхедо, тайо пам̣сукӯлика̄ уккат̣т̣хо маджджхимо мудӯти. таттха соса̄никам̣йева ган̣ханто уккат̣т̣хо хоти. паббаджита̄ ган̣хиссантӣти т̣хапитакам̣ ган̣ханто маджджхимо. па̄дамӯле т̣хапетва̄ диннакам̣ ган̣ханто мудӯти.

тесу йасса кассачи аттано ручийа̄ гихидиннакам̣ са̄дитаккхан̣е дхутан̇гам̣ бхиджджати. айаметтха бхедо.

айам̣ пана̄нисам̣со, ‘‘пам̣сукӯлачӣварам̣ нисса̄йа паббаджджа̄’’ти (маха̄ва. 128) вачанато ниссайа̄нурӯпапат̣ипаттисаббха̄во, пат̣хаме арийавам̣се патит̣т̣ха̄нам̣, а̄раккхадуккха̄бха̄во, апара̄йаттавуттита̄, чорабхайена абхайата̄, парибхогатан̣ха̄йа абха̄во, саман̣аса̄руппапариккха̄рата̄, ‘‘аппа̄ни чева сулабха̄ни ча та̄ни ча анаваджджа̄нӣ’’ти (а. ни. 4.27; итиву. 101) бхагавата̄ сам̣ван̣н̣итапаччайата̄, па̄са̄диката̄, аппиччхата̄дӣнам̣ пхаланиппхатти, самма̄пат̣ипаттийа̄ анубрӯханам̣, паччхима̄йа джаната̄йа дит̣т̣ха̄нугатиа̄па̄дананти.

ма̄расенавигха̄та̄йа, пам̣сукӯладхаро йати;

саннаддхакавачо йуддхе, кхаттийо вийа собхати.

паха̄йа ка̄сика̄дӣни, вараваттха̄ни дха̄ритам̣;

йам̣ локагаруна̄ ко там̣, пам̣сукӯлам̣ на дха̄райе.

тасма̄ хи аттано бхиккху, пат̣ин̃н̃ам̣ самануссарам̣;

йога̄ча̄ра̄нукӯламхи, пам̣сукӯле рато сийа̄ти.

айам̣ та̄ва пам̣сукӯликан̇ге сама̄да̄навидха̄наппабхедабхеда̄нисам̣саван̣н̣ана̄.