37. путтаваттхумхи айама̄нупуббӣкатха̄

екасмим̣ кира самайе лан̇ка̄дӣпава̄сино сат̣т̣химатта̄ бхиккхӯ джайамаха̄бодхим̣ вандитука̄ма̄ екато мантетва̄ маха̄титтхена на̄вам̣ а̄руйха джамбудӣпам̣ патва̄ та̄малиттипат̣т̣хене [тамалиттапат̣т̣ане итикаттхачи] отаритва̄ ануккамена па̄т̣алипуттанагарам̣ па̄пун̣им̣су. атха тасмим̣ нагаре пин̣д̣а̄йа чаранте те бхиккхӯ еко дуггатамануссо дисва̄ чирена [чирена̄хам̣дит̣т̣ха̄ итисаббаттха] майа̄ дит̣т̣ха̄ буддхапутта̄ти соманассо бхарийам̣ паккоситва̄ бхадде имесам̣ аййа̄нам̣ да̄нам̣ да̄тука̄момхи, пуббе но акатапун̃н̃атта̄ ида̄ни дуггата̄ джа̄та̄, имесу пун̃н̃аккхеттесу бӣджам̣ но че ропесса̄ма, пунапи евамева бхависса̄ма̄ти ватва̄ ким̣ ме гехе деййадхаммам̣ аттхӣти пуччхи. са̄ там̣ сутва̄ гхаре но са̄ми аййа̄нам̣ кин̃чи да̄таббам̣ на пасса̄ми. апи ча мама путтам̣ ма̄ретва̄ да̄нам̣ да̄тум̣ сакка̄ти. со тасса̄ катхам̣ сутва̄ бхадде путтам̣ ма̄ретва̄ ким̣ да̄нам̣ дема̄ти а̄ха. та̄йа там̣ сутва̄ са̄ми ким̣ на джа̄на̄си, путте но мате сандит̣т̣хасамбхатта̄ н̃а̄тимиттасухаджджа̄ ча амха̄кам̣ сантикам̣ а̄гаччха̄нта̄ кин̃чи пан̣н̣а̄ка̄рам̣ гахетва̄ а̄гаччханти. майам̣ тена пан̣н̣а̄ка̄рена да̄нам̣ дасса̄ма̄ти вутте упа̄сако са̄дху татха̄ карохӣти ма̄туйа̄ ева бха̄рамака̄си, са̄ путтам̣ ма̄ретум̣ ависахантӣ а̄ха. татха̄ хи.

1. киччха̄ ладдхам̣ пийам̣ путтам̣, аммамма̄ти пийам̣ вадам̣;

сунӣланеттам̣ субхамум̣, ко паккамитумиччхати.

2. ма̄тара̄ ма̄рийантопи, ма̄тарамева родати;

ма̄ретум̣ там̣ на саккоми, хадайам̣ ме паведхатӣти.

еван̃ча пана ватва̄ ахам̣ са̄ми на саккоми путтам̣ ма̄ретум̣. твам̣ ма̄рехӣти путтам̣ питусантикам̣ песеси. атха сопи там̣ ма̄рету масакконто евама̄ха. вуттан̃хи.

3. та̄йанти питуно дуккхам̣, путта̄ путта̄ти киттита̄;

питу дуккхам̣ сукхам̣ путта̄, да̄йа̄да̄ хонти саббада̄.

4. тасма̄ ме садисам̣ путтам̣, пиллакам̣ ман̃джубха̄санам̣;

на саккоми ахам̣ бхадде, джӣвита̄ там̣ вийоджитум̣.

5. айасан̃ча акиттин̃ча, паппоти путтагха̄тако;

па̄н̣а̄типа̄такаммампи, ка̄мам̣ со пхусате нароти.

еван̃ча пана ватва̄ со твамева тава путтам̣ ма̄рехӣти песеси, евам̣ тена вутте путтхасса ма̄рапа̄н̣ӯпа̄йам̣ парийесанта̄ евама̄хам̣су, амхе панимам̣ ма̄ретум̣ на саккоми, амха̄кам̣ паччха̄гехе маханто ваммико аттхи, тасмим̣ еко на̄гара̄джа̄ пат̣ивасати. кума̄рам̣ таттха песесса̄ма, со там̣ д̣аситва̄ ма̄рессатӣти. иччете есо кхо упа̄йо ева̄ти чинтетва̄ кума̄рам̣ паккоситва̄ ан̃чана̄ валивалайа̄дӣхи ман̣д̣етва̄ тасса хаттхе ген̣д̣ум̣ [тен̣д̣ум̣ итисаббаттха] т̣хапетва̄ та̄та паччха̄гехе ваммикасамӣпам̣ гантва̄ кӣл̣а̄ти песесум̣. тато да̄рако гантва̄ ген̣д̣укена кӣл̣анто ваммикабиле ген̣д̣укам̣ па̄теси. атха со ген̣д̣укам̣ ган̣хисса̄мӣти ваммикасусире хаттхам̣ павесеси. тато саппо куджджхитва̄ сусӯтисаддам̣ каронто махантам̣ пхан̣ам̣ катва̄ билато сӣсам̣ уккхипитва̄ олокенто ат̣т̣ха̄си кума̄расса хаттхато паригалитапа̄сам̣вийа. атхасса кума̄ро кин̃чи аджа̄нанто саппасса гӣвам̣ дал̣хам̣ ган̣хи. атхасса ма̄та̄питуннам̣ саддха̄балена на̄гара̄джа̄ кума̄расса каратале ат̣т̣хам̣сам̣ иччха̄да̄йакам̣ кан̣т̣хаман̣иратанам̣ па̄теси. кума̄расса ма̄та̄питаро два̄рам̣ нисса̄йа т̣хита̄ тасса кирийам̣ олокенто там̣ ман̣иратанам̣ дисва̄ сӣгхам̣ гантва̄ путтам̣ уккхипитва̄ хаттхато ман̣иратанам̣ ган̣хим̣су. тато те там̣ ман̣иратанам̣ парисуддха̄сане т̣хапетва̄ упача̄рам̣ катва̄ амха̄кам̣ идан̃чидан̃ча детха̄ти аббхуккирим̣су. атха те ман̣иратана̄нубха̄вена гехадва̄ре махантам̣ ман̣д̣апам̣ ка̄ретва̄ вита̄на̄дина̄ ман̣д̣апам̣ алан̇каритва̄ бхиккхӯнам̣ а̄сана̄ни пан̃н̃а̄петва̄ те сат̣т̣химатте бхиккхӯ нисӣда̄петва̄ маха̄да̄нам̣ адам̣су. тато нагарава̄сино ман̣иратана̄нубха̄вам̣ сутва̄ саннипатим̣су. атха те тесам̣ маджджхе аттано саддха̄балена ман̣иратанасса ла̄бхам̣ пака̄сетва̄ иман̃хи да̄наттха̄йева париччаджджа̄ма̄ти екасмим̣ т̣ха̄не патит̣т̣ха̄петва̄ тена̄нубха̄вена йа̄ваджӣвам̣ да̄нам̣ даданта̄ сӣлам̣ раккханта̄ а̄йупарийоса̄не девалоке ниббаттим̣сӯти.

6. чхетва̄на пемам̣ апи атраджесу,

даданти да̄нам̣ идха ма̄нусевам̣;

на дада̄ти ко на̄ма наро самиддхо,

да̄нан̃хи да̄насса пхалам̣ сарантоти.

путтаваттхум̣ саттамам̣.