33. капан̣а̄йа ваттхумхи айама̄нупуббӣкатха̄

бхагавати париниббуте джамбудӣпе таттха таттха бхиккхубхиккхун̣ийо ча упа̄сакаупа̄сика̄йо ча джайамаха̄бодхим̣ вандисса̄мӣти йебхуййена гантва̄ ванданти. атха̄ парабха̄ге бахӯ бхиккхӯ сан̇гамма маха̄бодхим̣ ванданаттха̄йа гаччханта̄ ан̃н̃атарасмим̣ га̄маке бхиккха̄йа чаритва̄ а̄санаса̄лам̣ гантва̄ катабхаттакичча̄ тхокам̣ виссамим̣су, тада̄ таттха ека̄ капан̣а̄ дуггатиттхӣ татха̄ нисиннабхиккхӯ дисва̄ упасан̇камитва̄ пан̃чапатит̣т̣хитена вандитва̄ екаманте т̣хита̄ аййа̄ кухим̣ гаччхантӣти пуччхи. бхиккхӯ там̣ сутва̄ джайамаха̄бодхисса а̄нубха̄ван̃ча там̣ ванданаттха̄йа атта̄нам̣ гаманан̃ча катхента̄ евама̄хам̣су.

1. йаттха̄сӣно джино джеси, сасенам̣ макараддхаджам̣;

хантва̄ килесасенан̃ча, буддхо а̄си нируттаро.

2. йам̣ пӯджеси маха̄вӣро, т̣хито пада макопайам̣;

саттараттиндивам̣ нетта, нӣланӣраджарам̣сина̄.

3. сура̄суранара̄дӣнам̣, нетта̄ли па̄л̣ипа̄тана̄;

мечака̄ка̄рапаттехи, сикхан̣д̣ӣвийа бха̄ти йо.

4. сурапа̄дапова сатта̄нам̣, йам̣ тит̣т̣хати махӣтале;

иха локе паратте ча, даданто иччхитиччхитам̣.

5. йасса пура̄н̣апан̣н̣ампи, патитам̣ йо наро идха;

пӯджети тасса со дети, бхавабхогам̣ махӣрухо.

6. гандхама̄лехи салилехи, йамупа̄сати сада̄ наро;

аджджхаттан̃ча бахиддха̄ ча, дуритам̣ со нихан̃н̃ати.

7. йо дети ихалокаттхам̣,

йо дети па̄ралокикам̣,

сампадам̣ джайабодхим̣там̣,

бхоти гаччха̄ма вандитум̣.

там̣ сутва̄ удагга̄ соманассаджа̄та̄ бхиккхӯнам̣ евама̄ха. ахам̣ бханте паракуле бхатийа̄ каммам̣ каронтӣ дуккхена касирена джӣвикам̣ каппеми. сва̄тана̄йа ме тан̣д̣улана̄липи [бхан̣д̣улана̄мпа итисаббаттха] наттхи, пагева ан̃н̃ам̣ дханам̣, имам̣ вина̄ ан̃н̃ам̣ са̄т̣акампи наттхи, касма̄ пуббе акатапун̃н̃атта̄, тасма̄ имам̣ бханте са̄т̣акам̣ мама̄нуггаха̄йа бодхимхи дхаджам̣ бандхатха̄ти йа̄читва̄ са̄т̣акам̣ дховитва̄ тесам̣ ада̄си. бхиккхӯпи тасса̄нуггаха̄йа там̣ гахетва̄ агамам̣су. са̄ са̄т̣акам̣ датва̄ пӣтипа̄моджджама̄наса̄ гехам̣ гантва̄ тадахева раттийа̄ маджджхимайа̄ме саттхакава̄тена упахата̄ ка̄лам̣ катва̄ тесам̣ бхиккхӯнам̣ гаманамагге екасмим̣ раман̣ӣйе ванасан̣д̣е бхуммадевата̄ хутва̄ ниббаттӣ, атхасса̄ пун̃н̃а̄нубха̄вена тийоджанике т̣ха̄не диббакаппаруккха̄ па̄турахам̣су, татта татта на̄на̄вира̄гадхаджапата̄ка̄ оламбанти. девапутта̄ ча девадхӣтаро ча сабба̄бхаран̣авибхӯсита̄ татхева дхаджапата̄ка̄дайо гахетва̄ кӣл̣анти. наччагӣта̄динека̄ни аччхарийа̄ни пайодженти. атха дутийадивасе тепи бхиккхӯ бодхиман̣д̣алам̣ гаччханта̄ са̄йан̣хе там̣ т̣ха̄нам̣ патва̄ аджджа имасмим̣ ванасан̣д̣е васитва̄ гамисса̄ма̄ти таттха ва̄сам̣ упагамим̣су, тато те раттибха̄ге на̄на̄ван̣н̣адхадже ча девата̄хи пайоджийама̄на̄ гӣтава̄дита̄дайо ча тийоджанат̣т̣ха̄не каппаруккха̄ни ча идам̣ саббам̣ девиссарийам̣ тасса̄нубха̄вена ниббаттабха̄вам̣ дисва̄ вимхитама̄наса̄ девадхӣтарам̣ а̄мантетва̄ твам̣ кена каммена идха ниббатта̄ти пуччхим̣су. са̄ бхиккхӯ вандитва̄ ан̃джалим̣ паггайха т̣хита̄ бханте мам̣ на сан̃джа̄ниттха̄ти а̄ха. бхиккхӯхи на майам̣ сан̃джа̄на̄ма бхагинӣти вутте са̄ аттано сабха̄вам̣ катхентӣ евама̄ха.

8. хӣййо а̄санаса̄ла̄йа, нисӣдиттха сама̄гата̄;

тумхакам̣ сантикам̣ гамма, йа̄ вара̄кӣбхива̄дайи.

9. йа̄ бодхим̣ пӯджанаттха̄йа, ваттхакам̣ пат̣ипа̄дайи;

са̄хам̣ хӣййо чута̄ а̄сим̣, раттийам̣ бйа̄дхипӣл̣ита̄.

10. на̄на̄сампаттисам̣йутта̄, на̄на̄бхӯсанабхӯсита̄;

вима̄не ратана̄ кин̣н̣е, джа̄та̄хам̣ еттха ка̄нане.

11. хӣййо пасситтха ме гаттам̣, раджоджаллехи сам̣кулам̣;

аджджа пассатха ме гаттам̣, ван̣н̣авантам̣ пабхассарам̣.

12. хӣййо пасситтха ме бханте, ниваттхам̣ малинамбарам̣;

аджджа пассатха ме бханте, диббамамбарамуттамам̣.

13. викин̣н̣апхалитаггехи, кесехи вирала̄ кулам̣;

ӯка̄гӯтхапат̣иккӯлам̣, хӣййо а̄сисирам̣ мама.

14. аджджа там̣ париваттитва̄, мама пун̃н̃а̄нубха̄вато;

сунӣламудудхаммиллам̣, кусума̄ бхаран̣абхӯситам̣.

15. пура̄ ме сакасӣсена, вахитам̣ да̄рӯ дака̄дикам̣;

пун̃н̃ена̄хам̣ аджджа ма̄ла̄, бха̄рам̣ сӣсе самуббахе.

16. дхаджаттха̄йа майа̄ хӣййо, падиннам̣ тхӯласа̄т̣акам̣;

аджджа ниббатти ме бхонто, махантам̣ диббасампадам̣.

17. джа̄нама̄нена каттаббам̣, да̄на̄дӣсу махаппхалам̣;

девалоке мануссесу, сукхадам̣ да̄на муттаманти.

там̣ сутва̄ саббе бхиккхӯ аччхарийаббхутачитта̄ ахесум̣. са̄ девата̄ тасса̄ раттийа̄ аччайена бхиккхӯ нимантетва̄ диббехи кхаджджабходжджехи сахаттха̄ сантаппетва̄ техи саддхим̣ а̄гаччхантӣ антара̄магге да̄нам̣ дадама̄на̄ маха̄бодхим̣ гантва̄ саббехи дхаджапата̄ка̄ дӣхи ча на̄на̄видхаван̣н̣агандхасампаннапуппхехи ча дӣпадхӯпехи ча бодхим̣ пӯджетва̄ бхиккхӯнам̣ чӣвараттха̄йа диббаваттха̄ни датва̄ а̄гамма тасмим̣йева ванасан̣д̣е васантӣ на̄на̄видха̄ни пун̃н̃а̄ни катва̄ та̄ватим̣сабхаване ниббатти. бхиккхӯпи там̣ аччхарийам̣ таттха таттха пака̄сента̄ бахӯджане пун̃н̃акамме нийоджесум̣ти.

18. евам̣ видха̄пи капан̣а̄ джинаса̄санамхи,

катва̄ паса̄да матха тхӯлакучелакена;

пӯджетва диббавибхавам̣ алабхӣти н̃атва̄,

пӯджа̄пара̄ бхаватха ваттхусу тӣсу самма̄ти.

капан̣а̄йа ваттхум̣ татийам̣.