31. маха̄сенаран̃н̃о ваттхумхи айама̄нупуббӣкатха̄

бхагавати париниббуте па̄т̣алипуттанагаре маха̄сено на̄ма ра̄джа̄ раджджам̣ ка̄реси дхаммико дхаммара̄джа̄. со пана питупита̄маха̄дӣнам̣ дханара̄сим̣ олокетва̄ име имам̣ са̄патеййам̣ паха̄йа маччуно мукхамупагата̄. ахо сам̣са̄рика̄нам̣ ан̃н̃а̄н̣ата̄. дханам̣ т̣хапетва̄ аттано вина̄сан̃ча атта̄нам̣ т̣хапетва̄ дханавина̄сан̃ча на джа̄нантӣти сампаттийа̄ адхигаман̃ча вина̄сам̣ ча̄ти саббам̣ чинтетва̄ дхамман̃ча сутва̄ пат̣иладдхасаддхо дивасе дивасе дасасахасса̄нам̣ бхиккхӯнам̣ мадхурена аннапа̄нена сантаппенто анека̄ни пун̃н̃а̄ни упачинанто екадивасам̣ рахо пат̣исаллино евам̣ чинтеси. евам̣ ра̄джанийогена джанасса пӣл̣анам̣ катва̄ диннада̄нато сахаттхена каммам̣ катва̄ ладдхена диннада̄нам̣ махаппхалам̣ маха̄нисам̣сам̣ бхависсати, евам̣ майа̄ ка̄таббанти со сухада̄ маччасса раджджам̣ нӣййа̄тетва̄ аттано кан̣ит̣т̣хикам̣ а̄да̄йа кин̃чи аджа̄на̄петва̄ ан̃н̃атаравесена нагара̄ никкхамма уттарамадхурам̣ на̄ма нагарам̣ агама̄си, таттха маха̄вибхаво еко сет̣т̣хи пат̣ивасати, те сет̣т̣хино самӣпа мупагамма т̣хита̄. тена киматтха̄йа̄гата̄ти вутте ра̄джа̄ тава гехе бхатийа̄ каммам̣ карисса̄мӣти ватва̄ тена̄нун̃н̃а̄то тӣн̣и васса̄ни камма мака̄си, тато екадивасам̣ сет̣т̣хи те дисва̄ паккоситва̄ атӣва тумхе сукхума̄латара̄. татха̄пи имасмим̣ гехе каммакаран̣ена чирам̣ васиттха, еттакам̣ ка̄лам̣ кисмин̃чи каммепи кусӣтаттам̣ на пан̃н̃а̄йати. пагева ана̄ча̄рампи, йа̄губхаттам̣ т̣хапетва̄ ан̃н̃ам̣ упака̄рампи мама сантика̄ наттхи, кенаттхена каммам̣ каротха̄ти пуччхи. ра̄джа̄ тасса вачанам̣ сутва̄ имасмим̣ джанападе са̄лино мана̄пабха̄во бахусо сӯйати. тасма̄ са̄лӣнаматтха̄йа идха̄ гатамха̄ти а̄ха, там̣ сутва̄ тесам̣ тут̣т̣хо сет̣т̣хи са̄лӣнам̣ сакат̣асахассам̣ ада̄си, ра̄джа̄ са̄лим̣лабхитва̄ сет̣т̣хино евама̄ха, бхо имам̣ амха̄кам̣ нагарам̣ па̄петха̄ти, там̣ сутва̄ сет̣т̣хи са̄дхӯти ватва̄ са̄липарипун̣н̣асакат̣асахассам̣ ран̃н̃о нагарам̣ па̄песи, ра̄джа̄ нагарам̣ гантва̄ сет̣т̣хисса на̄на̄ван̣н̣аваттхахиран̃н̃асуван̣н̣а̄дӣхи сакат̣е пӯретва̄ пат̣ипесетва̄ меттим̣ тхирам̣ катва̄ а̄бхатавӣхайо ра̄джагехе санничайамака̄си, атха ра̄джа̄ катипа̄хаччайена мусалам̣ паггайха сахаттхенева вӣхим̣ кот̣т̣ети, кот̣т̣итакот̣т̣итам̣ кан̣ит̣т̣хика̄ паппхот̣ети. евам̣ убхопи тан̣д̣ула̄нам̣ махантам̣ ра̄сим̣ катва̄ да̄рӯдака̄дайо а̄харитва̄ амбилабхаттам̣ пачитва̄ ра̄джагехе пан̃часатаа̄сана̄ни пан̃н̃а̄петва̄ ка̄лам̣ уггхосесум̣, а̄гаччханту аййа̄ анукампам̣ упа̄да̄йа мама гехе бхун̃джантӯти. там̣ сутва̄ пан̃часата̄ бхиккхӯ а̄ка̄сена а̄гамим̣су, ра̄джа̄ те йа̄вадаттхам̣ паривиси, тато тесам̣ антаре пийам̣гудӣпава̄сӣ еко маха̄сиваттхеро на̄ма бхаттам̣ гахетва̄ ете мам̣ пассантӯти адхит̣т̣хахитва̄ а̄ка̄сена пийам̣гудӣпам̣ гантва̄ бхаттам̣ пан̃часата̄нам̣ бхиккхӯнам̣ датва̄ парибхун̃чи. там̣ тасса̄нубха̄вена саббесам̣ йа̄вадаттхам̣ ахоси. евам̣ аппакена̄пи деййадхаммена саппуриса̄ да̄йака̄нам̣ манам̣ паса̄детва̄ патит̣т̣хам̣ каронтӣти. вуттан̃хи.

1. аппакенапи медха̄вӣ, да̄йака̄нам̣ манам̣ пати;

саддхам̣ вад̣д̣хенти чандова, рам̣сина̄ кхӣраса̄гарам̣.

2. ат̣т̣ха̄не на нийоджента̄, каронта̄ нева саннидхим̣;

парибхога макатва̄на, нева на̄сенти паччайам̣.

3. на па̄пента̄ча тхеййасса, на каронта̄ татхевин̣ам̣;

вибхаджанти сусӣлесу, сайам̣ бхутва̄на сӣлава̄ти.

атха ра̄джа̄ кан̣ит̣т̣хика̄йа саддхим̣ тхаттхева т̣хито пийам̣гудӣпе парибхун̃джанте пан̃часатабхиккхӯ дисва̄ хат̣т̣хо удагго ахоси. атха те апарабха̄ге аттана̄ катам̣ да̄наварам̣ ануссаранта̄ на чиренева убхопи сота̄панна̄ ахесум̣ти.

4. на ган̣ента̄ттано дуккхам̣, виха̄йа махатим̣ сирим̣;

а̄йатим̣бхавамиччханта̄, суджаневам̣ субхе рата̄.

5. а̄йа̄сена катам̣ пун̃н̃ам̣, махантапхалада̄йакам̣;

ити мантва̄на медха̄вӣ, сахаттхенева там̣ карети.

маха̄сенаран̃н̃о ваттхум̣ патхамам̣.