2. мигалуддакасса ваттхумхи айама̄нупуббикатха̄

ито кира ека тим̣сатиме каппе сикхӣна̄ма самма̄самбуддхо саматим̣са па̄рамийо пӯретва̄ парама̄тисамбодхим̣ патва̄ садевакам̣ локам̣ сам̣са̄раканта̄ра̄ утта̄ренто дхаммаратанавассам̣ васса̄пенто дхаммабхерим̣пахаранто дхаммакетум̣ усса̄пенто екасмим̣ самайе вивека манубрӯханто аран̃н̃а̄йатанам̣ па̄виси, пависитва̄ чапана супуппхитана̄гапунна̄га̄дина̄на̄тарусан̣д̣аман̣д̣ите супхулласуманама̄латиппабхутина̄на̄лата̄куле анекавидхадипадачатуппадасан̇гханисевите раман̣ӣйе сӣталасила̄тале чатуггун̣ам̣ сан̇гха̄т̣им̣пан̃н̃апетва̄ нисӣди чхаббан̣н̣арам̣сӣхи дисам̣ пӯрайанто, тада̄ таттха девабрахмана̄гасупан̣н̣а̄дайо саннипатитва̄ диббамайехи гандхама̄ла̄дӣхи бхагавантам̣ пӯджайама̄на̄ тхомайама̄на̄ намассама̄на̄ ат̣т̣хам̣су, тасмим̣ панасама̄гаме бхагава̄ мадхурассарам̣ ниччха̄ренто брахмагхосена чатусаччапат̣исам̣йуттам̣ дхаммам̣ десети аматавассам̣ васса̄пентовийа. тада̄ еко мигалуддако ванам̣ павит̣т̣хо мигасӯкаре хантва̄ мам̣сам̣ кха̄данто там̣ т̣ха̄нам̣ патва̄ аддаса бхагавантам̣ дхаммам̣ десентам̣. дисва̄ екамантам̣ т̣хито дхаммам̣ сутва̄ читтам̣ паса̄детва̄ тато чуто девалоке ниббаттитва̄ чхасу ка̄масаггесу мануссесуча апара̄парам̣ иссарийам̣ анубхаванто имасмим̣ буддхуппа̄де са̄ваттхийам̣ кулагехе ниббаттитва̄ вин̃н̃утам̣ патто бхагавато са̄сане паббаджитва̄ екадивасам̣ дхаммам̣ десентасса бхагавато чатусаччапати сам̣йуттам̣ дхаммакатхам̣ сутва̄ чатупат̣исамбхида̄хи арахаттам̣ патва̄ екадивасам̣ бхиккхусан̇гхамаджджхагато аттано катакаммаппака̄санена пӣтива̄чамуда̄хари.

1. е ка тим̣ се ито каппе,

локе уппаджджи на̄йако;

паттим̣са лаккхан̣а̄тин̣н̣о,

самбуддхо са сикхӣвхайо.

2. джаланто дӣпаруккхова, сӯрийова набха муггато;

мерура̄джа̄ва самбуддхо, джанесагго пата̄пава̄.

3. пӯретва̄ дхаммана̄ва̄йам̣, са на̄тхо сакалам̣ паджам̣;

патит̣т̣хапенто сам̣са̄ра, канта̄ра̄ сантибхӯмийам̣.

4. дхаммакетум̣ самуссенто, хананто дхаммадундубхим̣;

сатте дуккха̄ памоченто, васӣ таттха джино васӣ.

5. екасмим̣ самайе на̄тхо,

локападжджотако джино;

вивекака̄мо самбуддхо,

сураммам̣ ка̄нанам̣ гато.

6. пунна̄гана̄гапӯга̄ди, на̄на̄па̄дапасам̣кулам̣;

лата̄ лин̇гитаса̄кха̄хи, са̄ модакусума̄йутам̣.

7. кусума̄ модасамматта, чхаппада̄ли нисевитам̣;

на̄на̄мига ган̣а̄кин̣н̣ам̣, майӯраган̣а наччитам̣.

8. сӣталаччходика̄са̄дху, супатиттхаджала̄сайам̣;

а̄са̄ра са̄радха̄ра̄хи, ниджджхара̄сата сам̣кулам̣.

9. гантва̄на со маха̄ран̃н̃ам̣,

сӣталам̣ сиката̄талам̣;

сила̄тале нисинноси,

виссадждженто чхарам̣сийо.

10. дева̄ таттха сама̄гантва̄, пӯджесум̣ двипадуттамам̣;

диббехи гандхама̄ла̄хи, наччехи турийехича.

11. девадево тада̄ дева, сан̇гхамаджджхе нисӣдийа;

чатусачча мадесеси, ниччхарам̣ мадхурам̣ гирам̣.

12. тада̄хам̣ луддако а̄сим̣, мигасӯкарама̄рако;

мигамам̣сена джива̄ми, тена посеми да̄раке [посентопуттада̄раке итикаттхачи].

13. тада̄хам̣ мигавам̣ йа̄то,

саба̄н̣о сасара̄сано;

аддасам̣ вираджам̣ буддхам̣,

девасан̇гхапураккхатам̣.

14. чандам̣ва та̄рака̄кин̣н̣ам̣, мерум̣ван̣н̣авамаджджхагам̣;

вирочама̄на ма̄сӣнам̣, чатусаччаппака̄сакам̣.

15. екапассе т̣хито таттха, ассосим̣ дхаммамуттамам̣;

таттха читтам̣ паса̄детва̄, соманассам̣ паведайим̣.

16. екатим̣се ито каппе,

йам̣ пун̃н̃ам̣ пасутам̣ майа̄;

тена̄хам̣ пун̃н̃акаммена,

джа̄тосим̣ девайонийам̣.

17. сампаттиманубхутва̄на, чхака̄магге пара̄парам̣;

девасан̇гхапариббӯл̣хо, вима̄не ратана̄майе.

18. мануссесуча йам̣ аггам̣, тасса бха̄гӣ бхава̄махам̣;

бхоге ме ӯната̄ наттхи, саддхаммасаван̣е пхалам̣.

19. имасмим̣ бхаддаке каппе,

са̄ваттипурамуттаме;

ад̣д̣хе махаддхане са̄ле,

джа̄тохам̣ удите куле.

20. махата̄ парива̄рена, патто вуддхим̣ча вин̃н̃утам̣;

ча̄рикам̣ чарама̄нохам̣, патто джетаванам̣ варам̣.

21. аддасам̣ саха сиссехи, нисиннам̣ сугатам̣ тада̄;

ассосим̣ мадхурам̣ дхаммам̣, чатусаччаппака̄сакам̣.

22. сутва̄на мадхурам̣ дхаммам̣, паббаджитва̄на са̄сане;

а джара̄ марам̣ сӣтибхӯтам̣, патто нибба̄н̣амуттамам̣.

23. сутам̣ екамухуттам̣ ме, тада̄ дхаммам̣ судеситам̣;

тенамхи чатура̄па̄йе, на джа̄то на кутобхайам̣.

24. карамуккхиппа ваккха̄ми, каротхе кагирам̣ мама;

мамо памам̣ каритва̄на, дхаммам̣ сун̣а̄тха са̄дхуканти.

еван̃ча пана ватва̄ сатте дхаммасаван̣е нийоджесӣти.

25. ити танутарака̄лам̣ са̄дху дхаммам̣ сун̣итва̄,

адхигатавибхава̄нам̣ а̄нубха̄вам̣ сун̣итва̄;

бхававибхавасукхам̣ бхо паттхайанта̄ кусӣтам̣,

джахатха сун̣атха дхаммам̣ дуллабхам̣ дуллабхасса̄ти.

мигалуддакасса ваттхум̣ дутийам̣.