10. рӯпадевийа̄ ваттхумхи айама̄нупуббӣкатха̄

атӣте кира випассисса бхагавато ка̄ле тасмим̣ нагаре ека̄ га̄мада̄рика̄ виха̄ре а̄хин̣д̣антӣ екам̣ гила̄набхиккхум̣ дисва̄ кампама̄нахадайа̄ упасан̇камитва̄ вандитва̄ бханте коте а̄ба̄дхо сарӣрам̣ пӣл̣етӣти пуччхи. тена̄пи бхагини кхара̄ба̄дхо ме пӣл̣етӣти вутте са̄ тенахи бханте ахам̣ там̣ рогам̣ вӯпасамесса̄мӣти нимантетва̄ гехам̣ гантва̄ там̣ паваттим̣ ма̄та̄питуннам̣ катхетва̄ техи анун̃н̃а̄та̄ пуна дивасе на̄наггарасена бхесаджджа̄ха̄рам̣ сампа̄деси, тато со бхиккху пунадивасе чӣварам̣ па̄рупитва̄ бхиккха̄йа чаранто тасса̄ гехам̣ гантва̄ ат̣т̣ха̄си. са̄ тхерам̣ а̄гатам̣ дисва̄ соманассаджа̄та̄ паттам̣ гахетва̄ а̄санам̣ пан̃н̃а̄петва̄ ада̄си. таттха нисиннам̣ там̣ а̄ха̄рена са̄дхукам̣ паривиситва̄ сакка̄ра мака̄си. атхасса̄ саддха̄балена бхуттаматтейева со а̄ба̄дхо вӯпасами. тато со вӯпасантарого дутийадивасе тасса̄ гехам̣ на̄ гама̄си. атха са̄ виха̄рам̣ гантва̄ там̣ вандитва̄ касма̄на̄гататтха̄ти пуччхитва̄ тена ме бхагини бйа̄дхи вӯпасами, тасма̄ на̄гатосмӣти вутте са̄ са̄дху бхантети соманассаджа̄та̄ гехамева агама̄си. са̄ тена пун̃н̃акаммена ка̄лам̣ катва̄ девалоке ниббатти. тасса̄ таттха два̄дасайоджаникам̣ канакавима̄нам̣ ниббатти. са̄ таттха девиссарийам̣ анубхавантӣ чхабуддхантарам̣ кхепетва̄ амха̄кам̣ бхагавато ка̄ле джамбудӣпе девапуттанагаре удиччабрахман̣акуле джет̣т̣хабра̄хман̣асса бхарийа̄йа куччхимхи пат̣исандхим̣ ган̣хи, са̄ парипа̄ка манва̄йа ма̄тукуччхито никкхами. тасса̄ ма̄тукуччхито никкхантака̄лато пат̣т̣ха̄йа дивасе дивасе ат̣т̣хат̣т̣хана̄лиматтам̣ тан̣д̣улам̣ ниббаттати. тасса̄ рӯпасампаттим̣ дисва̄ пасанна̄ ма̄та̄питаро рӯпадевӣти на̄ма макам̣су. паччха̄ там̣ патирӯпена да̄ракена нийоджесум̣. атхасса̄ тан̣д̣ула- на̄лиматтам̣ гахетва̄ пачитум̣ а̄раддхе иччхитиччхитамам̣са̄дибйан̃джанан̃джа саппинаванӣтададхикхӣра̄дигорасан̃ча джӣрамарича̄дикат̣укабхан̣д̣ан̃ча кадалипанасамадхугул̣а̄диупакаран̣ан̃ча бха̄джана̄ни пӯретва̄ ниббаттати, та̄йа хаттхена гахитам̣ кин̃чи кха̄данӣйам̣ бходжанӣйам̣ва̄ пӯтибха̄вам̣ на гаччхати, бхаттуккхалим̣ гахетва̄ сакаланагарава̄сино бходжентийа̄пи екакат̣аччхуматтам̣ бхаттам̣ гахитат̣т̣ха̄нам̣ на пан̃н̃а̄йати. евам̣ апариккхайапун̃н̃а̄ ахоси, сакаладевапуттанагаре чандасурийа̄ва па̄кат̣а̄ ахоси, атха са̄ пан̃часатабхиккхӯ нимантетва̄ ниччам̣ саканивесанейева бходжети, тада̄ тесам̣ антаре пат̣исамбхида̄патто маха̄сан̇гхараккхитаттхерона̄ма имисса̄ пун̃н̃а̄нубха̄вам̣ диббачаккхуна̄ дисва̄ на джа̄на̄ти еса̄ аттхана̄ пуббе катакаммам̣. йаннӯна̄хам̣ асса̄ пака̄сеййанти екадивасам̣ тасса̄ нивесане бхун̃джитва̄ анумоданам̣ каронто джа̄на̄си бхагини тайа̄ пуббе катакамманти пуччхи, на джа̄на̄ми бханте. сотумиччха̄мӣти, атхасса̄ со пуббакаммам̣ пака̄сенто.

1. еканавуте ито каппе,

випассӣна̄ма на̄йако;

ахоси локе локека,

на̄йако чхиннабандхано.

2. тада̄ тасмим̣ пуре рамме, а̄си твам̣ га̄мада̄рика̄;

а̄хин̣д̣антӣ виха̄расмим̣, аддаккхи джинаса̄вакам̣.

3. рога̄турам̣ кисам̣ пан̣д̣ум̣, ассасантам̣ мухум̣ мухум̣;

дисва̄на кампита̄ читта̄, нимантетва̄на там̣ муним̣.

4. бхесаджджан̃чева бхаттан̃ча, ада̄ твам̣ тена со йати;

абйа̄ба̄дхо анӣгхоча, ахоси анупаддаво.

5. тато твам̣ тена каммена, сукатена тато чута̄;

джа̄та̄си девалокасмим̣, саббака̄масамиддхинӣ.

6. таттха те пун̃н̃атеджена, па̄са̄до ратана̄майо;

ман̣итхӯписата̄кин̣н̣о, кӯт̣а̄га̄рехи лан̇като.

7. некагаббхасата̄кин̣н̣о, сайана̄санаман̣д̣ито;

аччхара̄сатасам̣кин̣н̣о, наччагӣта̄дисам̣куло.

8. рамбха̄мбаджамбусаннӣра, пӯгапунна̄гапа̄т̣алӣ;

на̄га̄дитарусан̣д̣ехи, ман̣д̣итуййа̄напантихи.

9. падумуппалакал̣а̄ра, кундака̄нанаман̣д̣ите;

мадхуматта̄липа̄лӣхи, са̄расӣсарасам̣куле.

10. девапуттехи некехи, татха̄ деваччхара̄хича;

ниччуссаве маха̄бхоге, вима̄не мананандане.

11. твамевам̣ девалокамхи, виндама̄на̄ маха̄йасам̣;

аддха̄нам̣ вӣтина̄метва̄, ниббуте готаме джине.

12. джамбудӣпе ида̄ни твам̣, ниббатта̄ удите куле;

пун̃н̃апан̃н̃а̄гун̣а̄ва̄са̄, рӯпенагга̄ пийам̣вада̄.

13. етам̣ те девалокасмим̣, девиссарийамаббхутам̣,

имам̣ те идха локасмим̣, саббам̣ ма̄нусикам̣ сукхам̣.

14. випассимунино ка̄ле, твам̣ тассекасса бхиккхуно;

ада̄ да̄нам̣ гила̄насса, тасса там̣ пхаламӣдисам̣.

15. ка̄таббан̃хи сада̄ пун̃н̃ам̣, иччхантена сукхаппадам̣;

тасма̄ твам̣ саббада̄ бхадде, уссукка̄ кусале бхава̄ти.

евам̣ со тасса пуриматтабха̄ве катакаммам̣ пака̄сетва̄ ида̄ни пун̃н̃акамме аппама̄да̄ бхава̄ти ануса̄си. са̄ тхерасса дхаммадесанам̣ сутва̄ парамасоманасса̄ тато пат̣т̣ха̄йа да̄на̄дӣсу нирата̄ пун̃н̃а̄ни каронтӣ тенева соманассена сота̄панна̄ арийаса̄вика̄ ахосӣти.

16. ити тарун̣акума̄рӣ пун̃н̃акаммесу са̄рам̣,

авидитагун̣аматта̄ датва бхиккхусса да̄нам̣;

дивимануджасукхам̣ са̄латтха тумхе бхаванта̄,

видитакусалапа̄ка̄ ким̣ на лаббхетха сантим̣.

рӯпадевийа̄ ваттхум̣ дасамам̣.

дхаммасон̣д̣акавагго патхамо.