саран̣а̄нивагга

пат̣хама маха̄на̄масутта

пуччха̄ – таттхева а̄вусо татийе саран̣а̄нивагге пора̄н̣акехи дхаммасам̣га̄хакамаха̄тхерехи пат̣хамам̣ сам̣гӣтам̣ пат̣хамамаха̄на̄масуттам̣ бхагавата̄ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – саккесу бханте капилаваттхусмим̣ нигродха̄ра̄ме маха̄на̄мам̣ саккам̣ а̄раббха бха̄ситам̣. маха̄на̄мо бханте сакко бхагавантам̣ етадавоча ‘‘идам̣ бханте капилаваттху иддхан̃чева пхӣтан̃ча ба̄худжан̃н̃ам̣ а̄кин̣н̣амануссам̣ самба̄дхабйӯхам̣, со кхва̄хам̣ бханте бхагавантам̣ ва̄ пайирупа̄ситва̄ манобха̄ванӣйе ва̄ бхиккхӯ са̄йанхасамайам̣ капилаваттхум̣ пависанто бхантенапи хаттхина̄ сама̄гаччха̄ми, бхантенапи ассена сама̄гаччха̄ми, бхантенапи ратхена сама̄гаччха̄ми, бхантенапи сакат̣ена сама̄гаччха̄ми, бхантенапи пурисена сама̄гаччха̄ми, тасса майхам̣ бханте тасмим̣ самайе муссатева бхагавантам̣ а̄раббха сати, муссати дхаммам̣ а̄раббха сати, муссати сан̇гхам̣ а̄раббха сати, тасса майхам̣ бханте евам̣ хоти имамхи ча̄хам̣ самайе ка̄лам̣ кареййам̣, ка̄ майхам̣ гати, ко абхисампара̄йо’’ти. тасмим̣ бханте ваттхусмим̣ ‘‘ма̄ бха̄йи маха̄на̄ма, ма̄ бха̄йи маха̄на̄ма, апа̄пакам̣ те маран̣ам̣ бхависсати апа̄пика̄ ка̄лам̣ кирийа̄’’ти евама̄дина̄ бхагавата̄ бха̄ситам̣.

дутийа саран̣а̄нисаккасутта

пуччха̄ – таттхева а̄вусо дхаммасам̣га̄хакамаха̄тхерехи пан̃чамам̣ сам̣гӣтам̣ дутийасаран̣а̄нисаккасуттам̣ бхагавата̄ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – саккесу бханте капилаваттхусмим̣ нигродха̄ра̄ме маха̄на̄мам̣йева саккам̣ а̄раббха бха̄ситам̣.

маха̄на̄мо бханте сакко бхагавантам̣ етадавоча ‘‘идха бханте саран̣а̄ни сакко ка̄лан̇като, со бхагавата̄ бйа̄като ‘сота̄панно авинипа̄тадхаммо нийато самбодхипара̄йан̣о’ти. татра судам̣ бханте самбахула̄ сакка̄ сан̇гамма сама̄гамма уджджха̄йанти кхӣйанти випа̄ченти ‘аччхарийам̣ вата бхо, аббхутам̣ вата

бхо, еттха да̄ни ко на сота̄панно бхависсати, йатра хи на̄ма саран̣а̄ни сакко ка̄лан̇като, со бхагавата̄ бйа̄като ‘сота̄панно авинипа̄тадхаммо нийато самбодхипара̄йан̣о’ти, саран̣а̄ни сакко сиккха̄йа апарипӯрака̄рӣ ахосӣ’’ти тасмим̣ бханте ваттхусмим̣ ‘‘йо со маха̄на̄ма дӣгхараттам̣ упа̄сако буддхам̣ саран̣ам̣ гато, дхаммам̣ саран̣ам̣ гато, сан̇гхам̣ саран̣ам̣ гато, со катхам̣ винипа̄там̣ гаччхеййа̄’’ти евама̄дина̄ бхагавата̄ бха̄ситам̣.

пат̣хама ана̄тхапин̣д̣икасутта

пуччха̄ – таттхева а̄вусо пора̄н̣акехи дхаммасам̣га̄хакамаха̄тхерехи чхат̣т̣хам̣ сам̣гӣтам̣ пат̣хамаана̄тхапин̣д̣икасуттам̣ каттха кам̣ а̄раббха кисмим̣ ваттхусмим̣ кена катхан̃ча бха̄ситам̣.

виссаджджана̄ – са̄ваттхийам̣ бханте ана̄тхапин̣д̣икам̣ гахапатим̣ а̄раббха а̄йасмата̄ са̄рипуттаттхерена дхаммасена̄патина̄ бха̄ситам̣.

а̄йасма̄ бханте са̄рипуттаттхеро а̄йасмата̄ а̄нандаттхерена паччха̄саман̣ена саддхим̣ йена ана̄тхапин̣д̣икасса гахапатисса нивесанам̣ тенупасан̇ками, упасан̇камитва̄ пан̃н̃атте а̄сане нисӣди, нисаджджа кхо а̄йасма̄ са̄рипутто ана̄тхапин̣д̣икам̣ гахапатим̣ а̄ба̄дхикам̣ дуккхитам̣ ба̄л̣хагила̄нам̣ етадавоча ‘‘каччи те гахапати кхаманӣйам̣ каччи йа̄панӣйам̣, каччи дуккха̄ ведана̄ пат̣иккаманти, но абхиккаманти, пат̣иккамоса̄нам̣ пан̃н̃а̄йати, но абхиккамо’’ти, на ме бханте кхаманӣйам̣, на йа̄панӣйам̣, ба̄л̣ха̄ ме дуккха̄ ведана̄ абхиккаманти, но пат̣иккаманти, абхиккамоса̄нам̣ пан̃н̃а̄йати, но пат̣иккамоти. тасмим̣ бханте ваттхусмим̣ ‘‘йатха̄ рӯпена кхо гахапати буддхе аппаса̄дена саманна̄гато ассутава̄ путхуджджано ка̄йасса бхеда̄ парам̣ маран̣а̄ апа̄йам̣ дуггатим̣ винипа̄там̣ нийарам̣ упападжджати татха̄рӯпо те буддхе аппаса̄до наттхи, аттхи ча кхо те гахапати буддхе авеччаппаса̄до ‘итипи со бхагава̄ арахам̣ самма̄самбуддхо…пе… бхагава̄’ти тан̃ча пана те буддхе авеччаппаса̄дам̣ аттани саманупассато т̣ха̄насо ведана̄ пат̣иппассамбхеййа̄’’ти евама̄дина̄ а̄йасмата̄ са̄рипуттаттхерена дхаммасена̄патина̄ бха̄ситам̣.

йасса саддха̄ татха̄гате, ачала̄ суппатит̣т̣хита̄;

сӣлан̃ча йасса калйа̄н̣ам̣, арийакантам̣ пасам̣ситам̣.

сан̇гхе паса̄до йассаттхи, уджубхӯтан̃ча дассанам̣;

адалиддоти там̣ а̄ху, амогхам̣ тасса джӣвитам̣.

тасма̄ саддхан̃ча сӣлан̃ча, паса̄дам̣ дхаммадассанам̣;

ануйун̃джетха медха̄вӣ, сарам̣ буддха̄наса̄санам̣.