сота̄паттисам̣йутта

чаккаваттира̄джасутта

пуччха̄ – сота̄паттисам̣йутте а̄вусо пора̄н̣акехи дхаммасам̣га̄хакамаха̄тхерехи пат̣хамам̣ сам̣гӣтам̣ чаккаваттира̄джасуттам̣ бхагавата̄ каттха кам̣ а̄раббха катхан̃ча бха̄ситам̣.

виссаджджана̄ – са̄ваттхийам̣ бханте самбахуле бхиккхӯ а̄раббха ‘‘кин̃ча̄пи бхиккхаве ра̄джа̄ чаккаваттӣ чатуннам̣ дӣпа̄нам̣ иссарийа̄дхипаччам̣ раджджам̣ ка̄ретва̄ ка̄йасса бхеда̄ парам̣ маран̣а̄ сугатим̣ саггам̣ локам̣ упападжджати дева̄нам̣ та̄ватим̣са̄нам̣ сахабйатам̣, со таттха нандане ване аччхара̄сан̇гхапаривуто диббехи ча пан̃чахи ка̄магун̣ехи самаппито саман̇гӣбхӯто парича̄рети со чатӯхи дхаммехи асаманна̄гато, атха кхо со апаримуттова нирайа̄, апаримутто тираччха̄найонийа̄, апаримутто петтивисайа̄, апаримутто апа̄йадуггативинипа̄та̄’’ти евама̄дина̄ бханте бхагавата̄ бха̄ситам̣.

дӣгха̄ву упа̄сакасутта

пуччха̄ – таттхева а̄вусо пора̄н̣акехи дхаммасам̣га̄хакамаха̄тхерехи татийам̣ сам̣гӣтам̣ дӣгха̄вуупа̄сакасуттам̣ бхагавата̄ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – ра̄джагахе бханте дӣгха̄вум̣ упа̄сакам̣ а̄раббха бха̄ситам̣. бхагава̄ бханте дӣгха̄вум̣ упа̄сакам̣ а̄ба̄дхикам̣ дуккхитам̣ ба̄л̣хагила̄нам̣ етадавоча ‘‘каччи те дӣгха̄ву кхаманӣйам̣, каччи йа̄панӣйам̣, каччи дуккха̄ ведана̄ пат̣иккаманти но абхиккаманти, пат̣иккамоса̄нам̣ пан̃н̃а̄йати но абхиккамо’’ти. на ме бханте кхаманӣйам̣, на йа̄панӣйам̣ ба̄л̣ха̄ ме дуккха̄ ведана̄ абхиккаманти но пат̣иккаманти, абхиккамоса̄нам̣ пан̃н̃а̄йати но пат̣иккамоти. тасмим̣ бханте ваттхусмим̣ ‘‘тасма̄тиха те дӣгха̄ву евам̣ сиккхитаббам̣ буддхе авеччаппаса̄дена саманна̄гато бхависса̄мӣ’’ти евама̄дина̄ бхагавата̄ бха̄ситам̣.

йа̄нима̄ни бханте бхагавата̄ чатта̄ри сота̄паттийан̇га̄ни десита̄ни, сам̣виджджанте те дхамма̄ майи–

тасма̄тиха твам̣ дӣгха̄ву имесу чатӯсу сота̄паттийан̇гесу патит̣т̣ха̄йа чха виджджа̄бха̄гийе дхамме уттари бха̄веййа̄си–

ма̄ твам̣ та̄та дӣгха̄ву евам̣ манаса̄ка̄си.

ин̇гха твам̣ та̄та дӣгха̄ву йадева те бхагава̄ а̄ха, тадева твам̣ са̄дхукам̣ манасикарохи.

пан̣д̣ито бхиккхаве дӣгха̄ву упа̄сако.

паччапа̄ди дхаммасса̄нудхаммам̣.

на ча мам̣ дхамма̄дхикаран̣ам̣ вихет̣хеси.

дӣгха̄ву бхиккхаве упа̄сако пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ опапа̄тико таттха паринибба̄йӣ ана̄ваттидхаммо тасма̄ лока̄.

вел̣удва̄реййасутта

пуччха̄ – тена̄вусо бхагавата̄…пе… самма̄самбуддхена сота̄паттисам̣йутте саттамам̣ сам̣гӣтам̣ вел̣удва̄реййасуттам̣ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – косалесу бханте вел̣удва̄ре на̄ма косала̄нам̣ бра̄хман̣а га̄ме вел̣удва̄реййаке бра̄хман̣агахапатике а̄раббха бха̄ситам̣.

вел̣удва̄реййака̄ бханте бра̄хман̣агахапатика̄ бхагавантам̣ етадавочум̣ ‘‘майам̣ бхо готама евам̣ка̄ма̄ евам̣чханда̄ евам̣адхиппа̄йа̄ путтасамба̄дхасайанам̣ аджджха̄васеййа̄ма…пе… джа̄тарӯпараджатам̣ са̄дийеййа̄ма, ка̄йасса бхеда̄ парам̣ маран̣а̄ сугатим̣ саггам̣ локам̣ упападжджеййа̄ма, тесам̣ но бхавам̣ готамо амха̄кам̣ евам̣ка̄ма̄нам̣ евам̣чханда̄нам̣ евам̣адхиппа̄йа̄нам̣ татха̄ даммам̣ десету, йатха̄ майам̣ путтасамба̄дхасайанам̣ аджджха̄васеййа̄ма…пе… ка̄йасса бхеда̄ парам̣ маран̣а̄ сугатим̣ саггам̣ локам̣ упападжджеййа̄ма̄’’ти. тасмим̣ бханте ваттхусмим̣ ‘‘аттӯпана̄йикам̣ во гахапатайо дхаммапарийа̄йам̣ десесса̄ми, там̣ сун̣а̄тха са̄дхукам̣ манаси каротха, бха̄сисса̄мӣ’’ти евама̄дина̄ бхагавата̄ бха̄ситам̣.