сатипат̣т̣ха̄насам̣йутта

сатисутта

пуччха̄ – сатипат̣т̣ха̄насам̣йутте а̄вусо пора̄н̣акехи дхаммасам̣га̄хака маха̄тхерехи дутийам̣ сам̣гӣтам̣ сатисуттам̣ бхагавата̄ каттха кам̣ ка̄раббха катхан̃ча бха̄ситам̣.

виссаджджана̄ – веса̄лийам̣ бханте амбапа̄ливане самбахуле бхиккхӯ а̄раббха ‘‘сато бхиккхаве бхиккху вихареййа сампаджа̄но айам̣ во амха̄кам̣ ануса̄санӣ’’ти евама̄дина̄ бхагавата̄ бха̄ситам̣.

са̄ласутта

пуччха̄ – таттхева а̄вусо пора̄н̣акехи дхаммасам̣га̄хакамаха̄тхерехи чатуттхам̣ сам̣гӣтам̣ са̄ласуттам̣ бхагавата̄ каттха кам̣ а̄раббха катхан̃ча бха̄ситам̣.

виссаджджана̄ – косалесу бханте са̄ла̄йана̄ма кесала̄нам̣ бра̄хман̣ага̄ме самбахуле бхиккхӯ а̄раббха ‘‘йе те бхиккхаве бхиккхӯ нава̄ ачирапаббаджита̄ адхуна̄гата̄ имам̣ дхаммавинайам̣, те во бхиккхаве бхиккхӯ чатуннам̣ сатипат̣т̣ха̄на̄нам̣ бха̄вана̄йа сама̄дапетабба̄ нивесетабба̄ патит̣т̣ха̄петабба̄’’ти евама̄дина̄ бханте бхагавата̄ бха̄ситам̣.

сакун̣аггхисутта

пуччха̄ – таттхева а̄вусо пора̄н̣акехи дхаммасам̣га̄хакамаха̄тхерехи чхат̣т̣хам̣ сам̣гӣтам̣ сакун̣аггхисуттам̣ бхагавата̄ каттха кам̣ а̄раббха катхан̃ча бха̄ситам̣.

виссаджджана̄ – са̄ваттхийам̣ бханте самбахуле бхиккхӯ а̄раббха ‘‘бхӯтапуббам̣ бхиккхаве сакун̣аггхи ла̄пам̣ сакун̣ам̣ сахаса̄ аджджхаппатта̄ аггахеси. атха кхо бхиккхаве ла̄по сакун̣о сакун̣аггхийа̄ харийама̄но евам̣ паридеваси майамевамха алаккхика̄, майам̣ аппапун̃н̃а̄, йе майам̣ агочаре чаримха парависайе, сачеджджа майам̣ гочаре чареййа̄ма саке петтике висайе, на мйа̄хам̣ сакун̣аггхи алам̣ абхависса йадидам̣ йуддха̄йа̄’’ти евама̄дина̄ бхагавата̄ бха̄ситам̣.

майамевамха алаккхика̄, майам̣ аппапун̃н̃а̄.

ко пана те ла̄па гочаро сако петтико висайо.

йадидам̣ нан̇галакат̣т̣хакаран̣ам̣ лед̣д̣ут̣т̣ха̄нам̣.

ехи кхо да̄ни ме сакун̣аггхи, ехи кхо да̄ни ме сакун̣аггхи,

(да̄ругул̣овийа виниваттитва̄ тассева лед̣д̣усса антаре паччупа̄ди. ат̣т̣хакатха̄)

еван̃хи там̣ бхиккхаве хоти йо агочаре чарати парависайе.

тасма̄тиха бхиккхаве ма̄ агочаре чариттха парависайе.

гочаре бхиккхаве чаратха саке петтике висайе.

гочаре бхиккхаве чаратам̣ саке петтике висайе на лаччхати ма̄ро ота̄рам̣, на лаччхати ма̄ро а̄рамман̣ам̣.

бхиккхунупассайасутта

пуччха̄ – таттхева а̄вусо пора̄н̣акехи дхаммасам̣га̄хакамаха̄тхерехи дасамам̣ сам̣гӣтам̣ бхиккхунупассайасуттам̣ бхагавата̄ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – са̄ваттхийам̣ бханте а̄йасмантам̣ а̄нандаттхерам̣ а̄раббха бха̄ситам̣. а̄йасма̄ бханте а̄нандо йа̄ваттако ахоси бхиккхунӣхи саддхим̣ катха̄салла̄по там̣ саббам̣ бхагавато а̄рочеси. тасмим̣ бханте ваттхусмим̣ ‘‘еваметам̣ а̄нанда, еваметам̣ а̄нанда, йохи кочи а̄нанда бхиккху ва̄ бхиккхунӣ ва̄ чатӯсу сатипат̣т̣ха̄несу суппатит̣т̣хитачитто вихарати, тассетам̣ па̄т̣икан̇кхам̣ ул̣а̄рам̣ пуббена̄парам̣ висесам̣ сан̃джа̄ниссатӣ’’ти евама̄дина̄ бхагавата̄ бха̄ситам̣.

чундасутта

пуччха̄ – таттхева а̄вусо дутийе на̄ландавагге пора̄н̣акехи дхаммасам̣га̄хакамаха̄тхерехи татийам̣ сам̣гӣтам̣ чундасуттам̣ бхагавата̄ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – са̄ваттхийам̣ бханте а̄йасмантам̣йева а̄нандаттхерам̣ а̄раббха бха̄ситам̣. а̄йасма̄ бханте а̄нандаттхеро чундена саман̣уддесена саддхим̣ йена бхагава̄ тенупасан̇ками. упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо бханте а̄йасма̄ а̄нандо бхагавантам̣ етадавоча ‘‘айам̣ бханте чундо саман̣уддесо евама̄ха ‘а̄йасма̄ бханте са̄рипутто париниббуто, идамасса паттачӣвара’нти. апи ча ме бханте мадхуракаджа̄то вийа ка̄йо, диса̄пи ме на паккха̄йанти, дхамма̄пи мам̣ наппат̣ибханти ‘а̄йасма̄ са̄рипутто париниббуто’ти сутва̄’’ти. тасмим̣ бханте ваттхусмим̣ ‘‘ким̣ ну кхо те а̄нанда са̄рипутто сӣлаккхандхам̣ ва̄ а̄да̄йа париниббуто, сама̄дхиккхандхам̣ ва̄, пан̃н̃а̄ккхандхам̣ва̄, вимуттиккхандхам̣ва̄, вимуттин̃а̄н̣адассанаккхандхам̣ ва̄ а̄да̄йа париниббуто’’ти евама̄дина̄ бхагавата̄ бха̄ситам̣.

айам̣ бханте чундосаман̣уддесо евама̄ха.

тасма̄тиха̄нанда аттадӣпа̄ вихаратха аттасаран̣а̄ анан̃н̃асаран̣а̄ дхаммадӣпа̄ дхаммасаран̣а̄ анан̃н̃асаран̣а̄.

ба̄хийасутта

пуччха̄ – таттхева а̄вусо пора̄н̣акехи дхаммасам̣га̄хакамаха̄тхерехи пан̃чамам̣ сам̣гӣтам̣ ба̄хийасуттам̣ бхагавата̄ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – са̄ваттхийам̣ бханте а̄йасмантам̣ ба̄хийам̣ а̄раббха бха̄ситам̣. а̄йасма̄ бханте ба̄хийо бхагавантам̣ етадавоча ‘‘са̄дху ме бханте бхагава̄ сам̣кхиттена дхаммам̣ десету, йамахам̣ бхагавато дхаммам̣ сутва̄ еко вӯпакат̣т̣хо аппаматто а̄та̄пӣ пахитатто вихареййа’’нти. тасмим̣ бханте ваттхусмим̣ ‘‘тасма̄тиха твам̣ ба̄хийа а̄димева висодхехи кусалесу дхаммесу. ко ча̄дикусала̄нам̣ дхамма̄нам̣, сӣлан̃ча сувисуддхам̣ дит̣т̣хича уджука̄’’ти евама̄дина̄ бхагавата̄ бха̄ситам̣.