сӣлат̣т̣хитивагга

чират̣т̣хитисутта

пуччха̄ – таттхева а̄вусо татийе сӣлат̣т̣хитивагге пора̄н̣акехи дхаммасам̣га̄хакамаха̄тхерехи дутийам̣ сам̣гӣтам̣ чират̣т̣хитисуттам̣ каттха кам̣ а̄раббха кисмим̣ ваттхусмим̣ кена катхан̃ча бха̄ситам̣.

виссаджджана̄ – па̄т̣алипутте бханте а̄йасмантам̣ бхаддам̣ а̄раббха а̄йасмата̄ а̄нандаттхерена дхаммабхан̣д̣а̄га̄рикена бха̄ситам̣. а̄йасма̄ бханте бхаддо са̄йанхасамайам̣ пат̣исалла̄на̄ вут̣т̣хито йена̄йасма̄ а̄нандо тенупасан̇ками, упасан̇камитва̄ а̄йасмантам̣ а̄нандам̣ етадавоча ‘‘ко ну кхо а̄вусо а̄нанда хету ко паччайо, йена татха̄гате париниббуте саддхаммо на чират̣т̣хитико хоти, ко пана̄вусо а̄нанда хету ко паччайо, йена татха̄гате париниббуте саддхаммо чират̣т̣хитико хотӣ’’ти. тасмим̣ бханте ваттхусмим̣ ‘‘са̄дху са̄дху а̄вусо бхадда, бхаддако кхо те а̄вусо бхадда умман̇го’’ти евама̄дина̄ а̄йасмата̄ а̄нандаттхерена дхаммабхан̣д̣а̄га̄рикена бха̄ситам̣.

бхаддако те а̄вусо бхадда умман̇го.

‘‘чатуннам̣ кхо а̄вусо сатипат̣т̣ха̄на̄нам̣ абха̄витатта̄ абахулӣкататта̄ татха̄гате париниббуте саддхаммо на чират̣т̣хитико хотӣ’’ –

сиривад̣д̣хасутта

пуччха̄ – тасса̄вусо бхагавата̄ арахато самма̄самбуддхасса па̄вачанасамудайабхӯта̄йа маха̄ваггапа̄л̣ийа̄ сатипат̣т̣ха̄насам̣йутте сӣлат̣т̣хитивагге навамам̣ сиривад̣д̣хасуттам̣ каттха кам̣ а̄раббха кисмим̣ ваттхусмим̣ кена катхан̃ча бха̄ситам̣.

виссаджджана̄ – ра̄джагахе бханте сиривад̣д̣хам̣ гахапатим̣ а̄раббха а̄йасмата̄ а̄нандаттхерена дхаммабхан̣д̣а̄га̄рикена бха̄ситам̣. сиривад̣д̣хо бханте гахапати а̄ба̄дхико хоти дуккхито ба̄л̣хагила̄но. атхакхо бханте а̄йасма̄ а̄нандо йенасиривад̣д̣хасса гахапатисса нивесанам̣ тенупасан̇ками, упасан̇камитва̄ пан̃н̃атте а̄сане нисӣди. нисаджджа кхо а̄йасма̄ а̄нандо сиривад̣д̣хам̣ гахапатим̣ етадавоча ‘‘каччи те гахапати кхаманӣйам̣, каччи йа̄панӣйам̣, каччи дуккха̄ ведана̄ пат̣иккаманти но абхиккаманти, пат̣иккамоса̄нам̣ пан̃н̃а̄йати но абхиккамо’’ти. на ме бханте кхаманӣйам̣, на йа̄панӣйам̣, ба̄л̣ха̄ ме дуккха̄ ведана̄ абхиккаманти но пат̣иккаманти, абхиккамоса̄нам̣ пан̃н̃а̄йати но пат̣иккамо’’ти. тасмим̣ бханте ваттхусмим̣ ‘‘тасма̄тиха те гахапати евам̣ сиккхитаббам̣ ‘ка̄йе ка̄йа̄нупассӣ вихарисса̄ми а̄та̄пӣ сампаджа̄но сатима̄ винеййа локе абхиджджха̄ доманассам̣. ведана̄су. читте. дхаммесу дхамма̄нупассӣ вихарисса̄ми а̄та̄пӣ сампаджа̄но сатима̄ винеййа локе абхиджджха̄ доманасса’нти. еван̃хи те гахапати сиккхитабба’’нти. евам̣ кхо а̄йасмата̄ а̄нандаттхерена дхаммабхан̣д̣а̄га̄рикена бха̄ситам̣.