гахапативагга

бха̄радва̄джасутта

пуччха̄ – гахапативагге а̄вусо пора̄н̣акехи дхаммасам̣га̄хакамаха̄тхерехи чатуттхам̣ сам̣гӣтам̣ бха̄радва̄джасуттам̣ каттха кам̣ а̄раббха кисмим̣ ваттхусмим̣ кена катхан̃ча бха̄ситам̣.

виссаджджана̄ – косамбийам̣ бханте ра̄джа̄нам̣ уденам̣ а̄раббха а̄йасмата̄ пин̣д̣олабха̄радва̄джаттхерена бха̄ситам̣. ра̄джа̄ бханте удено а̄йасмантам̣ пин̣д̣олабха̄радва̄джам̣ етадавоча ‘‘ко ну кхо бхо бха̄радва̄джа хету ко паччайо, йениме дахара̄ бхиккхӯ сусӯ ка̄л̣акеса̄ бхадрена йоббанена саманна̄гата̄ пат̣хамена вайаса̄ аникӣл̣ита̄вино ка̄месу йа̄ваджӣвам̣ парипун̣н̣ам̣ парисуддхам̣ брахмачарийам̣ чаранти, аддха̄нан̃ча а̄па̄дентӣ’’ти. тасмим̣ ваттхусмим̣ ‘‘вуттам̣ кхо

етам̣ маха̄ра̄джа тена бхагавата̄ джа̄ната̄ пассата̄ арахата̄ самма̄самбуддхена етха тумхе бхиккхаве ма̄туматтӣсу ма̄тучиттам̣ упат̣т̣хапетха. бхаганиматтӣсу бхагиничиттам̣ упат̣т̣хапетха, дхӣтуматтӣсу дхӣтучиттам̣ упат̣т̣хапетха̄’’ти евама̄дина̄ бханте а̄йасмата̄ пин̣д̣ола бха̄радва̄джаттхерена бха̄ситам̣.

верахачча̄нисутта

пуччха̄ – таттхева а̄вусо пора̄н̣акехи дхаммасам̣га̄хакамаха̄тхерехи дасамам̣ сам̣гӣтам̣ верахачча̄нисуттам̣ каттха кам̣ а̄раббха кисмим̣ ваттхусмим̣ кена катхан̃ча бха̄ситам̣.

виссаджджана̄ – ка̄ман̣д̣а̄йам̣ бханте верахачча̄ниготтам̣ бра̄хман̣им̣ а̄раббха а̄йасмата̄ уда̄йиттхерена бха̄ситам̣. верахачча̄нӣготта̄ бханте бра̄хман̣ӣ а̄йасмантам̣ уда̄йиттхерам̣ етадавоча ‘‘кисмим̣ ну кхо бханте сати араханто сукхадуккхам̣ пан̃н̃апенти, кисмим̣ асати араханто сукхадуккхам̣ на пан̃н̃апентӣ’’ти. тасмим̣ ваттхусмим̣ ‘‘чаккхусмим̣ кхо бхагини сати араханто сукхадуккхам̣ пан̃н̃апенти, чаккхусмим̣ асати араханто сукхадуккхам̣ на пан̃н̃апентӣ’’ти евама̄дина̄ бханте а̄йасмата̄ уда̄йиттхерена бха̄ситам̣.