а̄сӣвисавагга

пат̣хамада̄руккхандхопамасутта

пуччха̄ – а̄сӣвисавагге а̄вусо пора̄н̣акехи дхаммасам̣га̄хакамаха̄тхерехи чатуттхам̣ сам̣гӣтам̣ пат̣хамада̄руккхандхопамасуттам̣ бхагавата̄ каттха кам̣ а̄раббха катхан̃ча бха̄ситам̣.

виссаджджана̄ – косамбийам̣ бханте ган̇га̄йа надийа̄ тӣре самбахуле бхиккхӯ а̄раббха ‘‘пассатха но тумхе бхиккхаве амхам̣ махантам̣ да̄руккхандхам̣ ган̇га̄йа надийа̄ сотена вуйхама̄на’’нти евама̄дина̄ бхагавата̄ бха̄сита̄.

упача̄равачанам̣

пуччха̄ – катхан̃ча̄вусо таттха бхагавата̄ ориматӣра̄дӣнам̣ упача̄равачана̄нам̣ аттхо виттха̄рена вибхаджитва̄ пака̄сито.

виссаджджана̄ – оримам̣ тӣранти кхо бхиккху чханнетам̣ аджджхаттика̄нам̣ а̄йатана̄нам̣ адхивачанам̣. па̄римам̣ тӣранти кхо бхиккху чханнетам̣ ба̄хира̄нам̣ а̄йатана̄нам̣ адхивачанам̣. маджджхе сам̣сӣдоти кхо бхиккху нандира̄гассетам̣ адхивачанам̣. тхале усса̄доти кхо бхиккху асмима̄нассетам̣ адхивачананти евама̄дина̄ бханте бхагавата̄ таттха ориматӣра̄дӣнам̣ упача̄равачана̄нам̣ аттхо виттха̄рена вибхаджитва̄ пака̄сито.

пуччха̄ – имасмим̣ кхо пана а̄вусо сутте бхагавата̄ бха̄сите висесато касса кӣдисо аттхо катхан̃ча пат̣иладдхо.

виссаджджана̄ – имасмим̣ бханте сутте бхагавата̄ бха̄сите висесато нандасса гопа̄лакасса паббаджджа̄ ча упасампада̄ ча йа̄ва арахатта̄ча висесато аттхо адхигато.

лабхеййа̄хам̣ бханте бхагавато сантике паббаджджам̣, лабхеййам̣ упасампадам̣.

тена хи твам̣ нанда са̄мика̄нам̣ га̄во ниййа̄техи.

гамиссанти бханте га̄во ваччхагиддхинийо.

ким̣сукопамасутта

пуччха̄ – таттхева а̄вусо пора̄н̣акехи дхаммасам̣га̄хакамаха̄тхерехи ат̣т̣хамам̣ сам̣гӣтам̣ ким̣сукопамасуттам̣ бхагавата̄ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – саккесу бханте капилаваттхусмим̣ нигродха̄ра̄ме ан̃н̃атарам̣ ка̄ракам̣ бхиккхум̣ а̄раббха бха̄ситам̣. ан̃н̃атаро бханте ка̄рако бхиккху чатта̄ро кха̄н̣а̄саве бхиккхӯ н̃а̄н̣адассанависуддхам̣ пуччхитва̄ асантут̣т̣хо тесам̣ бхиккхӯнам̣ пан̃ха̄веййа̄каран̣ена йена бхагава̄ тенупасан̇ками. упасан̇камитва̄ бхагавантам̣ етадавоча ‘‘китта̄вата̄ ну кхо бханте бхиккхуно дассанам̣ сувисуддхам̣ хотӣ’’ти. тасмим̣ ваттхусмим̣ ‘‘сеййатха̄пи бхиккху пурисасса ким̣суко адит̣т̣хапуббо асса, со йенан̃н̃атаро пурисо ким̣сукасса дасса̄вӣ тенупасан̇камеййа̄’’ти евама̄дина̄ бханте бхагавата̄ бха̄ситам̣.

чхаппа̄н̣акопамасутта

пуччха̄ – таттхева а̄вусо пора̄н̣акехи дхаммасам̣га̄хакамаха̄тхерехи дасамам̣ сам̣гӣтам̣ чхаппа̄н̣акопамасуттам̣ бхагавата̄ каттха кам̣ а̄раббха катхан̃ча бха̄ситам̣.

виссаджджана̄ – саккесуйева бханте самбахуле бхиккхӯ а̄раббха ‘‘сеййатха̄пи, бхиккхаве пурисо аругатто паккагатто сараванам̣ пависеййа̄’ти евама̄дина̄ бхагавата̄ бха̄ситам̣.

пуччха̄ – катхан̃ча̄вусо таттха бхагавата̄ асам̣варо виттха̄рена вибхаджитва̄ десито.

виссаджджана̄ – катхан̃ча бхиккхаве асам̣варо хоти, идха бхиккхаве бхиккху чаккхуна̄ рӯпам̣ дисва̄ пийарӯпе рӯпе адхимуччати, аппийарӯпе рӯпе бйа̄паджджати, анупат̣т̣хитака̄йассати ча вихарати париттачетасо. тан̃ча четовимуттим̣ пан̃н̃а̄вимуттим̣ йатха̄бхӯтам̣ наппаджа̄на̄ти, йаттхасса те уппанна̄ па̄пака̄ акусала̄ дхамма̄ апарисеса̄ нируджджхантӣти евама̄дина̄ бханте бхагавата̄ таттха асам̣варо виттха̄рена вибхаджитва̄ десито.

пуччха̄ – катхан̃ча̄вусо таттха бхагавата̄ сам̣варо вибхаджитва̄ виттха̄рена десито.

виссаджджана̄ – катхан̃ча бхиккхаве сам̣варо хоти, идха бхиккхаве бхиккху чаккхуна̄ рӯпам̣ дисва̄ пийарӯпе рӯпе на̄дхимуччати, аппийарӯпе рӯпе на бйа̄паджджатӣти, евама̄дина̄ бханте бхагавата̄ таттха сам̣варо вибхаджитва̄ виттха̄рена десито.