косаласам̣йутта

дахарасутта

пуччха̄ – дахарасуттам̣ пана̄вусо бхагавата̄ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – са̄ваттхийам̣ бханте ра̄джа̄нам̣ пасенадим̣ косалам̣ а̄раббха бха̄ситам̣. ра̄джа̄ бханте пасенади косало йена бхагава̄ тенупасан̇ками, упасан̇камитва̄ бхагавата̄ саддхим̣ саммоди, екамантам̣ нисинно кхо бханте ра̄джа̄ пасенади косало бхагавантам̣ етадавоча ‘‘бхавампи но готамо ‘ануттарам̣ самма̄самбодхим̣ абхисамбуддхо’ти пат̣иджа̄на̄тӣ’’ти. тасмим̣ бханте ваттхусмим̣ ‘‘йан̃хи там̣ маха̄ра̄джа самма̄ вадама̄новадеййа ‘ануттарам̣ самма̄самбодхим̣ абхисамбуддхо’ти, мамева там̣ самма̄ вадама̄но вадеййа̄’’ти евама̄дина̄ бханте бхагавата̄ бха̄ситам̣.

тасма̄ хи пан̣д̣ито посо, сампассам̣ аттхаматтано;

бхуджан̇гамам̣ па̄вакан̃ча, кхаттийан̃ча йасассинам̣;

бхиккхун̃ча сӣласампаннам̣, саммадева сама̄чаре–

аттараккхитасутта

пуччха̄ – аттараккхитасуттам̣ пана̄вусо бхагавата̄ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – са̄ваттхийам̣ бханте ра̄джа̄нам̣йева пасенадим̣ косалам̣ а̄раббха бха̄ситам̣. ра̄джа̄ бханте пасенади косало бхагавантам̣ упасан̇камитва̄ ‘‘идха майхам̣ бханте рахогатасса пат̣исаллӣнасса евам̣ четасо паривитакко удапа̄дӣ’’ти евама̄дикам̣ вачанам̣ авоча. бхагава̄ ча бханте еваметам̣ маха̄ра̄джа еваметам̣ маха̄ра̄джа̄ти евама̄дина̄ вибхаджитва̄ бха̄ситам̣.

ка̄йена сам̣варо са̄дху, са̄дху ва̄ча̄йа сам̣варо;

манаса̄ сам̣варо са̄дху, са̄дху, саббаттха сам̣варо;

саббаттха сам̣вуто ладжджӣ, раккхитоти павуччати.

аппакасутта

пуччха̄ – аппакасуттам̣ пана̄вусо бхагавата̄ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – са̄ваттхийам̣ бханте ра̄джа̄нам̣йева пасенадим̣ косалам̣ а̄раббха бха̄ситам̣. ра̄джа̄ бханте пасенади косало бхагавантам̣ упасан̇камитва̄ ‘‘идха майхам̣ бханте рахогатасса пат̣исаллӣнасса евам̣ четасо паривитакко удапа̄ди аппака̄ те сатта̄ локасмим̣, йе ул̣а̄ре ул̣а̄ре бхоге лабхитва̄ на чева маджджанти на ча памаджджанти, на ча ка̄месу гедхам̣ а̄паджджантӣ’’ти евама̄дикам̣ вачанам̣ авоча. бхагава̄ ча бханте ‘‘еваметам̣ маха̄ра̄джа еваметам̣ маха̄ра̄джа̄’’ти евама̄дина̄ аппакасуттам̣ бха̄ситам̣.

маллика̄сутта

пуччха̄ – маллика̄суттам̣ пана̄вусо бхагавата̄ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – са̄ваттхийам̣ бханте ра̄джа̄нам̣йева пасенадим̣ косалам̣ а̄раббха бха̄ситам̣. ра̄джа̄ бханте пасенади косало малликам̣ девим̣ етадавоча ‘‘аттхи ну кхо те маллике кочан̃н̃о аттана̄ пийатаро’’ти. тасмим̣ ваттхусмим̣ сабба̄диса̄ анупаригамма четаса̄ти евама̄дина̄ бханте бхагавата̄ бха̄ситам̣.

сабба̄ диса̄ анупаригамма четаса̄, неваджджхага̄ пийатараматтана̄ квачи. евам̣ пийо путху атта̄ паресам̣, тасма̄ на хим̣се параматтака̄мо–

саттаджат̣иласутта

пуччха̄ – тена̄вусо бхагавата̄…пе… самма̄самбуддхена саттаджат̣иласуттам̣ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – са̄ваттхийам̣ бханте ра̄джа̄нам̣ пасенадим̣ косалам̣ а̄раббха бха̄ситам̣. ра̄джа̄ бханте пасенади косало ачирапаккантесу саттасу ча джат̣илесу саттасу ча ниган̣т̣хесу саттасу ча ачелакесу саттасу ча екаса̄т̣акесу саттасу ча парибба̄джакесу йена бхагава̄ тенупасан̇ками, упасан̇камитва̄ бхагавантам̣ абхива̄детва̄ екамантам̣ нисӣди, екамантам̣ нисинно кхо бханте ра̄джа̄ пасенади косало бхагавантам̣ етадавоча ‘‘йе те бханте локе араханто ва̄ арахаттамаггам̣ ва̄ сама̄панна̄, ете тесам̣ ан̃н̃атара̄’’ти. тасмим̣ бханте ваттхусмим̣ ‘‘дуджджа̄нам̣ кхо етам̣ маха̄ра̄джа тайа̄ гихина̄ ка̄мабхогина̄ путтасамба̄дхасайанам̣ аджджха̄васантена ка̄син̣ачанданам̣ паччанубхонтена ма̄ла̄гандхавилепанам̣ дха̄райантена джа̄тарӯпараджатам̣ са̄дийантена ‘‘име ва̄ араханто, име ва̄ арахаттамаггам̣ сама̄панна̄’’ти евама̄дина̄ бханте бхагавата̄ бха̄ситам̣.

на ван̣н̣арӯпена наро суджа̄но, на виссасе иттарадассанена;

сусан̃н̃ата̄нан̃хи вийан̃джанена, асан̃н̃ата̄ локамимам̣ чаранти.

патирӯпако маттика̄кун̣д̣алова, лохад̣д̣хама̄сова суван̣н̣ачханно;

чаранти локе парива̄рачханна̄, анто асуддха̄ бахисобхама̄на̄-хӯ

пан̃чара̄джасутта

пуччха̄ – пан̃чара̄джасуттам̣ пана̄вусо бхагавата̄ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – са̄ваттхийам̣ бханте ра̄джа̄нам̣йева пасенадим̣ косалам̣ а̄раббха бха̄ситам̣. ра̄джа̄ бханте пасенади косало бхагавантам̣ етадавоча ‘‘ким̣ ну кхо бханте ка̄ма̄нам̣ агга’’нти. тасмим̣ бханте ваттхусмим̣ ‘‘мана̄папарийантам̣ кхва̄хам̣ маха̄ра̄джа пан̃часу ка̄магун̣есу агганти вада̄мӣ’’ти евама̄дина̄ бханте бхагавата̄ бха̄ситам̣.

идха бханте амха̄кам̣ пан̃чаннам̣ ра̄джӯнам̣ пан̃чахи ка̄магун̣ехи самаппита̄нам̣ саман̇гӣбхӯта̄нам̣ парича̄райама̄на̄нам̣ айамантара̄катха̄ удапа̄дим̣ ‘ким̣ ну кхо ка̄ма̄нам̣ агга’нти–

падумам̣ йатха̄ коканадам̣ сугандхам̣, па̄то сийа̄ пхулламавӣтагандхам̣. ан̇гӣрасам̣ пасса вирочама̄нам̣, тапантама̄диччамиванталиккхе–

дутийаапуттакасутта

пуччха̄ – дутийаапуттакасуттам̣ пана̄вусо бхагавата̄ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – са̄ваттхийам̣ бханте ра̄джа̄нам̣йева пасенадим̣ косалам̣ а̄раббха бха̄ситам̣. ра̄джа̄ бханте пасенади косало бхагавантам̣ упасан̇камитва̄ ‘‘идха бханте са̄ваттхийам̣ сет̣т̣хи гахапати ка̄лан̇като, тамахам̣ апуттакам̣ са̄патеййам̣ ра̄джантепурам̣ атихаритва̄ а̄гаччха̄мӣ’’ти евама̄дикам̣ вачанам̣ авоча. бхагава̄ ча бханте ‘‘еваметам̣ маха̄ра̄джа, еваметам̣ маха̄ра̄джа, бхӯтапуббам̣ со маха̄ра̄джа сет̣т̣хи гахапати таггарасикхим̣ на̄ма паччекасамбуддхам̣ пин̣д̣апа̄тена пат̣ипа̄десӣ’’ти евама̄дина̄ тасса сет̣т̣хисса гахапатисса атӣтам̣ ваттхум̣ а̄харитва̄ парийоса̄не чатӯхи га̄тха̄хи бха̄ситам̣.

дхан̃н̃ам̣ дханам̣ раджатам̣ джа̄тарӯпам̣, париггахам̣ ва̄пи йадаттхи кин̃чи,

да̄са̄ каммакара̄ песса̄, йе часса ануджӣвино.

саббам̣ на̄да̄йа гантаббам̣, саббам̣ никкхиппага̄минам̣;

йан̃ча кароти ка̄йена, ва̄ча̄йа удачетаса̄.

тан̃хи тасса сакам̣ хоти, там̣ва а̄да̄йа гаччхати;

там̣васса анугам̣ хоти, чха̄йа̄ва анапа̄йинӣ.

тасма̄ кареййа калйа̄н̣ам̣, ничайам̣ сампара̄йикам̣;

пун̃н̃а̄ни паралокасмим̣, патит̣т̣ха̄ хонти па̄н̣инам̣ –