саккасам̣йутта

ватападасутта

пуччха̄ – саккасам̣йутте пана̄вусо ватападасуттам̣ бхагавата̄ каттха кам̣ а̄раббха катхан̃ча бха̄ситам̣.

виссаджджана̄ – са̄ваттхийам̣ бханте самбахуле бхиккхӯ а̄раббха саккасса бхиккхаве дева̄наминдасса пуббе мануссабхӯтасса сатта ватапада̄ни саматта̄ни сама̄динна̄ни ахесум̣, йесам̣ сама̄диннатта̄ сакко саккаттам̣ аджджхага̄ти евама̄дина̄ бханте бхагавата̄ бха̄ситам̣.

саккасса бхиккхаве дева̄наминдасса пуббе мануссабхӯтасса има̄ни сатта ватапада̄ни саматта̄ни сама̄динна̄ни ахесум̣.

ма̄та̄петтибхарам̣ джантум̣, куле джет̣т̣ха̄пача̄йинам̣;

сан̣хам̣ сакхиласамбха̄сам̣, песун̣еййаппаха̄йинам̣;

маччхеравинайе йуттам̣, саччам̣ кодха̄бхибхум̣ нарам̣;

там̣ ве дева̄ та̄ватим̣са̄, а̄ху ‘‘саппурисо’’ити.

далиддасутта

пуччха̄ – далиддасуттам̣ пана̄вусо каттха кам̣ а̄раббха катхан̃ча бха̄ситам̣. виссаджджана̄. ра̄джагахе бханте самбахуле бхиккхӯ а̄раббха ‘‘бхӯтапуббам̣ бхиккхаве ан̃н̃атаро пурисо имасмим̣йева ра̄джагахе мануссадалиддо ахоси мануссакапан̣о мануссавара̄ко, со татха̄гатаппаведите дхаммавинайе саддхам̣ сама̄дийи, сӣлам̣, сутам̣, ча̄гам̣, пан̃н̃ам̣ сама̄дийӣ’’ти евама̄дина̄ бханте бхагавата̄ бха̄ситам̣.

йасса саддха̄ татха̄гате, ачала̄ суппатит̣т̣хита̄;

сӣлан̃ча йасса калйа̄н̣ам̣, арийакантам̣ пасам̣ситам̣.

йаджама̄насутта

пуччха̄ – йаджама̄насуттам̣ пана̄вусо бхагавата̄ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – ра̄джагахе бханте саккам̣ дева̄наминдам̣ а̄раббха бха̄ситам̣. сакко бханте дева̄наминдо бхагавантам̣ га̄тха̄йа аджджхабха̄си–

‘‘йаджама̄на̄нам̣ манусса̄нам̣, пун̃н̃апеккха̄на па̄н̣инам̣;

каротам̣ опадхикам̣ пун̃н̃ам̣, каттха диннам̣ махаппхала’’нти.

тасмим̣ бханте ваттхусмим̣–

‘‘чатта̄ро ча пат̣ипанна̄, чатта̄роча пхале т̣хита̄;

еса сан̇гхо уджубхӯто, пан̃н̃а̄сӣласама̄хито;

йаджама̄на̄нам̣ манусса̄нам̣, пун̃н̃апеккха̄на па̄н̣инам̣;

каротам̣ опадхикам̣ пун̃н̃ам̣, сан̇гхе диннам̣ махаппхалам̣’’нти.

евам̣ кхо бханте бхагавата̄ бха̄ситам̣.

йаджама̄на̄нам̣ манусса̄нам̣, пун̃н̃апеккха̄на па̄н̣инам̣,

каротам̣ опадхитам̣ пун̃н̃ам̣, каттха диннам̣ махаппхалам̣–

чатта̄ро ча пат̣ипанна̄, чатта̄ро ча пхале т̣хита̄;

еса сан̇гхо уджубхӯто, пан̃н̃а̄сӣласама̄хито;

йаджама̄на̄нам̣ манусса̄нам̣, пун̃н̃апеккха̄на па̄н̣инам̣;

каротам̣ опадхикам̣ пун̃н̃ам̣, сан̇гхе диннам̣ махаппхалам̣–

гахат̣т̣хавандана̄сутта

пуччха̄ – гахат̣т̣хавандана̄суттам̣ пана̄вусо бхагавата̄ каттха кам̣ а̄раббха катхан̃ча бха̄ситам̣.

виссаджджана̄ – са̄ваттхийам̣ бханте самбахуле бхиккхӯ а̄раббха ‘‘бхӯтапуббам̣ бхиккхаве сакко дева̄наминдо ма̄талим̣ сан̇га̄хакам̣ а̄мантесӣ’’ти евама̄дина̄ бханте бхагавата̄ бха̄ситам̣.

там̣ намассанти тевиджджа̄, саббе бхумма̄ча кхаттийа̄;

чатта̄ро ча маха̄ра̄джа̄, тидаса̄ча йасассино;

атхако на̄ма со йаккхо, йам̣ твам̣ сакка намассаси–

ахан̃ча сӣласампанне, чирараттасама̄хите;

самма̄паббаджите ванде, брахмачарийапара̄йане.

йе гахат̣т̣ха̄ пун̃н̃акара̄, сӣлаванто упа̄сака̄;

дхаммена да̄рам̣ посенти, те намасса̄ми ма̄тали.