нида̄наваггапа̄л̣и

нида̄насам̣йутта

пат̣иччасамуппа̄дасутта

пуччха̄ – тена̄вусо бхагавата̄…пе… самма̄самбуддхена нида̄наваггасам̣йутте пат̣хамам̣ сам̣гӣтам̣ пат̣иччасамуппа̄дасуттам̣ каттха там̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – са̄ваттхийам̣ бханте пан̃часате джанападава̄сино бхиккхӯ а̄раббха бха̄ситам̣. пан̃часата̄ бханте джанападава̄сино бхиккхӯ саббе уггха̄т̣итан̃н̃уно дхутан̇гадхара̄ а̄раддхавӣрийа̄ йуттайога̄ випассака̄ сан̣хам̣ сукхумам̣ сун̃н̃атам̣ паччайа̄ка̄радхаммадесанам̣ паттхайама̄на̄ бхагавантам̣ абхива̄детва̄ бхагавантам̣ парива̄ретва̄ нисӣдим̣су. тасмим̣ ваттхусмим̣ ‘‘пат̣иччасамуппа̄дам̣ во бхиккхаве десесса̄ми, там̣ сун̣а̄тха са̄дхукам̣ манаси каротха, бха̄сисса̄мӣ’’ти евама̄дина̄ бханте бхагавата̄ бха̄ситам̣.

катамо ча бхиккхаве пат̣иччасамуппа̄до. авиджджа̄паччайа̄ бхиккхаве сан̇кха̄ра̄, сан̇кха̄рапаччайа̄ вин̃н̃а̄н̣ам̣ (пеййа̄ла) джа̄типаччайа̄ джара̄маран̣ам̣ сокапаридевадуккхадоманассупа̄са̄ самбхаванти, еваметасса кеваласса дуккхандхасса самудайо хоти. айам̣ вуччати бхиккхаве пат̣иччасамуппа̄до.

авиджджа̄йа твева асесавира̄ганиродхо сан̇кха̄раниродхо (пеййа̄ла) джа̄тиниродха̄ джара̄маран̣ам̣ сокапаридевадуккхадоманассупа̄йа̄са̄ нируджджханти, еваметасса кеваласса дуккхаккхандхасса ниродхо хоти –

вибхан̇гасутта

пуччха̄ – таттха̄вусо дутийам̣ сам̣гӣтам̣ вибхан̇гасуттам̣ бхагавата̄ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – са̄ваттхийам̣ бханте пан̃часате джанападава̄сино випан̃читан̃н̃уно бхиккхӯ а̄раббха бха̄ситам̣. пан̃часата̄ бханте джанападава̄сика̄ бхиккхӯ випан̃читан̃н̃уно дхутан̇гадхара̄ а̄раддхавӣрийа̄ йуттайога̄ виссака̄ сан̣хам̣ сукхумам̣ сун̃н̃атапат̣исам̣йуттам̣ паччайа̄ка̄радхаммадесанам̣ паттхайама̄на̄ бхагавантам̣ парива̄ретва̄ нисӣдим̣су. тасмим̣ ваттхусмим̣ ‘‘пат̣ичча самуппа̄дам̣ во бхиккхаве дедесса̄ми вибхаджисса̄ми, там̣ сун̣а̄тха са̄дхукам̣ манасикаротха, бха̄сисса̄мӣ’’ти евама̄дина̄ бханте бхагавата̄ бха̄ситам̣.

пан̃чаверабхайасутта

пуччха̄ – пан̃чаверабхайасуттам̣ пана̄вусо бхагавата̄ каттха кам̣ а̄раббха катхан̃ча бха̄ситам̣.

виссаджджана̄ – са̄ваттхийам̣ бханте ана̄тхапин̣д̣икам̣ гахапатим̣ а̄раббха ‘‘йато кхо гахапати арийаса̄вакасса пан̃ча бхайа̄ни вера̄ни вӯпасанта̄ни хонти, чатӯхи ча сота̄паттийан̇гехи саманна̄гато хоти, арийо часса н̃а̄йо пан̃н̃а̄йа судит̣т̣хо хоти суппат̣ивиддхо, со а̄кан̇кхама̄но аттана̄ва атта̄нам̣ бйа̄кареййа кхӣн̣анирайоми кхӣн̣атираччха̄найони кхӣн̣апеттивисайо кхӣн̣а̄па̄йадуггативинипа̄то, сота̄паннохамасми авинипа̄тадхаммо нийато самбодхипара̄йано’’ти евам̣ кхо бханте бхагавата̄ бха̄ситам̣.

пуччха̄ – катхан̃ча̄вусотаттха бхагавата̄ арийаса̄вакасса пан̃чаннам̣ бхайа̄нам̣ вера̄нам̣ вӯпасантата̄ пака̄сита̄.

виссаджджана̄ – ‘‘катама̄ни пан̃ча бхайа̄ни вера̄ни вӯпасанта̄ни хонти. йам̣ гахапати па̄н̣а̄типа̄тӣ па̄н̣а̄типа̄тапаччайа̄ дит̣т̣хадхаммикампи бхайам̣ верам̣ пасавати, сампара̄йикампи бхайам̣ верам̣ пасавати, четасикампи дуккхам̣ доманассам̣ пат̣исам̣ведайати. па̄н̣а̄типа̄та̄ т̣ивиратасса евам̣ там̣ бхайам̣ верам̣ вӯпасантам̣ хотӣ’’ти евама̄дина̄ бханте таттха бхагавата̄ арийаса̄вакасса пан̃чаннам̣ бхайа̄нам̣ вера̄нам̣ вӯпасантата̄ пака̄сита̄.

пуччха̄ – катхан̃ча̄вусо таттха бхагавата̄ арийаса̄вакасса чатӯхи сота̄паттийан̇гехи саманна̄гатата̄ пака̄сита̄.

виссаджджана̄ – катамехи чатӯхи сота̄паттийан̇гехи саманна̄гато хоти. идха гахапати арийаса̄вако буддхе авеччаппаса̄дена саманна̄гато хоти ‘‘итиписо бхагава̄ арахам̣ самма̄самбуддхо виджджа̄чаран̣асампанно сугато локавидӯ ануттаропурисадаммаса̄ратхи саттха̄деваманусса̄нам̣ буддхо бхагава̄’’ти евама̄дина̄ бханте таттха бхагавата̄ арийаса̄вакасса чатӯхи сота̄паттийан̇гехи саманна̄гатата̄ пака̄сита̄.

пуччха̄ – катхан̃ча̄вусо таттха бхагавата̄ арийаса̄вакена арийасса н̃а̄йасса пан̃н̃а̄йа судит̣т̣хата̄ суппат̣ивиддхата̄ пака̄сита̄.

виссаджджана̄ – катамо часса арийо н̃а̄йо пан̃н̃а̄йа судит̣т̣хо хоти суппат̣ивиддхо. идха гахапати арийаса̄вако пат̣иччасамуппа̄дан̃н̃ева са̄дхукам̣ йонисо манаси кароти ‘‘ити имасмим̣ сати идам̣ хоти, имасмим̣ асати идам̣ на хоти, имассуппа̄да̄ идам̣ уппаджджати, имасса ниродха̄ идам̣ нируджджхати, йадидам̣ авиджджа̄паччайа̄ (пеййа̄ла) еваметасса кеваласса дуккхаккхандхасса ниродхо хотӣ’’ти, евам̣ кхо бханте бхагавата̄ таттха арийаса̄вакена арийасса н̃а̄йасса пан̃н̃а̄йа судит̣т̣хата̄ суппат̣ивиддхата̄ пака̄сита̄.

йато кхо гахапати арийаса̄вакасса има̄ни пан̃ча бхайа̄ни вера̄ни вӯпасанта̄ни хонти. имехи чатӯхи сота̄паттийан̇гехи саманна̄гато хоти. айан̃часса арийо н̃а̄йо пан̃н̃а̄йа судит̣т̣хо хоти суппат̣ивиддхо–

дуккхасутта

пуччха̄ – дуккхасуттам̣ пана̄вусо бхагавата̄ каттха кам̣ а̄раббха катхан̃ча бха̄ситам̣.

виссаджджана̄ – са̄ваттхийам̣ бханте самбахуле бхиккхӯ а̄раббха ‘‘дуккхасса бхиккхаве самудайан̃ча аттхан̇гаман̃ча десесса̄мӣ’’ти евама̄дина̄ бхагавата̄ бха̄ситам̣.

пуччха̄ – катхан̃ча̄вусо таттха бхагавата̄ дуккхасамудайо пака̄сито.

виссаджджана̄ – катамо ча бхиккхаве дуккхасса самудайо. чаккхун̃ча пат̣ичча рӯпе ча уппаджджати чаккхувин̃н̃а̄н̣ам̣, тин̣н̣ам̣ сан̇гати пхассо, пхассапаччайа̄ ведана̄, ведана̄паччайа̄ тан̣ха̄. айам̣ кхо бхиккхаве дуккхасса самудайо. сотан̃ча пат̣ичча садде ча уппаджджати сотавин̃н̃а̄н̣ам̣…пе… гха̄нан̃ча пат̣ичча гандхе ча…пе… дживхан̃ча пат̣ичча расе ча…пе… ка̄йан̃ча пат̣ичча пхот̣т̣хаббе ча…пе… манан̃ча пат̣ичча дхамме ча уппаджджати мановин̃н̃а̄н̣ам̣, тин̣н̣ам̣ сан̇гати пхассо, пхассапаччайа̄ ведана̄, ведана̄паччайа̄ тан̣ха̄. айам̣ кхо бхиккхаве дуккхасса самудайоти евам̣кхо бханте таттха бхагавата̄ дуккхасса самудайо пака̄сито.

пуччха̄ – катхан̃ча̄вусо таттха бхагавата̄ дуккхасса аттхан̇гамо пака̄сито.

виссаджджана̄ – катамо ча бхиккхаве дуккхасса аттхан̇гамо. чаккхун̃ча пат̣ичча рӯпе ча уппаджджати чаккхувин̃н̃а̄н̣ам̣, тин̣н̣ам̣ сан̇гати пхассо, пхассапаччайа̄ ведана̄, ведана̄паччайа̄ тан̣ха̄, тасса̄йева тан̣ха̄йа асесавира̄ганиродха̄ упа̄да̄наниродхо упа̄да̄наниродха̄ бхаваниродхо, бхаваниродха̄ джа̄тиниродхо, джа̄тиниродха̄ джара̄маран̣ам̣ сокапаридевадуккхадоманассупа̄йа̄са̄ нируджджханти. еваметасса кеваласса дуккхаккхандхасса ниродхо хотӣти евама̄дина̄ бханте таттха бхагавата̄ дуккхасса аттхан̇гамо пака̄сито.

путтамам̣сӯпамасутта

пуччха̄ – путтамам̣сӯпамасуттам̣ пана̄вусо бхагавата̄ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – са̄ваттхийам̣ бханте самбахуле адхуна̄ паббаджите бхиккхӯ а̄раббха бха̄ситам̣. бхагавато ча бханте бхиккхусан̇гхасса ча маха̄ла̄бхасакка̄ро удапа̄ди, екачче ча бханте бхиккхӯ нава̄ ачирапаббаджита̄ кулапутта̄ а̄ха̄рам̣ апаччавеккхитва̄ парибхун̃джим̣су. тасмим̣ бханте ваттхусмим̣ ‘‘чатта̄роме бхиккхаве а̄ха̄ра̄ бхӯта̄нам̣ ва̄ сатта̄нам̣ т̣хитийа̄ самбхавесӣнам̣ ва̄ ануггаха̄йа. катаме чатта̄ро кабал̣ӣка̄ро а̄ха̄ро ол̣а̄рико ва̄ сукхумо ва̄ пхассо дутийо маносан̃четана̄ татийа̄ вин̃н̃а̄н̣ам̣ чатуттха’’нти евам̣ кхо бханте бхагавата̄ бха̄ситам̣.

пуччха̄ – катхан̃ча̄вусо таттха кабал̣ӣка̄расса а̄ха̄расса дат̣т̣хабба̄ка̄ро бхагавата̄ пака̄сито.

виссаджджана̄ – сеййатха̄пи бхиккхаве две джа̄йампатика̄ париттам̣ самбалам̣ а̄да̄йа канта̄рамаггам̣ пат̣ипаджджеййум̣. тесамасса екапуттако пийо мана̄поти евама̄дина̄ бханте таттха бхагавата̄ кабал̣ӣка̄расса а̄ха̄расса дат̣т̣хабба̄ка̄ро пака̄сито.

пуччха̄ – катхан̃ча̄вусо таттха бхагавата̄ пхасса̄ха̄расса дат̣т̣хабба̄ка̄ро пака̄сито.

виссаджджана̄ – сеййатха̄пи бхиккхаве га̄вӣ ниччамма̄ кут̣т̣ам̣ че нисса̄йа тит̣т̣хеййа, йе кут̣т̣аниссита̄ па̄н̣а̄, те нам̣ кха̄деййум̣. руккхам̣ че нисса̄йа тит̣т̣хеййа. удакам̣ че нисса̄йа тит̣т̣хеййа. а̄ка̄сам̣ че нисса̄йа тит̣т̣хеййа, йе а̄ка̄саниссита̄ па̄н̣а̄, те нам̣ кха̄деййунти евама̄дина̄ бханте таттха бхагавата̄ пхассасса а̄ха̄расса дат̣т̣хабба̄ка̄ро виттха̄ретва̄ пака̄сито.

евамева кхва̄хам̣ бхиккхаве пхасса̄ха̄ро дат̣т̣хабботи вада̄ми.

пуччха̄ – катхан̃ча̄вусо таттха бхагавата̄ маносан̃четана̄ха̄расса дат̣т̣хабба̄ка̄ро пака̄сито.

виссаджджана̄ – сеййатха̄пи бхиккхаве ан̇га̄рака̄су са̄дхикапориса̄ пун̣н̣а̄ ан̇га̄ра̄нам̣ вӣтаччика̄нам̣ вӣтадхӯма̄нам̣. атха пурисо а̄гаччхеййа джӣвитука̄мо амаритука̄мо сукха ка̄мо дуккхаппат̣икӯлоти евама̄дина̄ бханте таттха бхагавата̄ маносан̃четана̄ха̄расса дат̣т̣хабба̄ка̄ро виттха̄рена пака̄сито.

пуччха̄ – катхан̃ча̄вусо таттха бхагавата̄ вин̃н̃а̄н̣а̄ха̄расса дат̣т̣хабба̄ка̄ро пака̄сито.

виссаджджана̄ – сеййатха̄пи бхиккхаве чорам̣ а̄гуча̄рим̣ гахетва̄ ран̃н̃о дассеййум̣ ‘‘айам̣ те девачоро а̄гуча̄рӣ, имасса йам̣ иччхаси, там̣ дан̣д̣ам̣ пан̣ехӣ’’ти евама̄дина̄ бханте таттха бхагавата̄ вин̃н̃а̄н̣а̄ха̄расса дат̣т̣хабба̄ка̄ро пака̄сито.

сусимапарибба̄джакасутта

пуччха̄ – тена̄вусо бхагавата̄…пе… самма̄самбуддхена сусимапарибба̄джака суттам̣ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – ра̄джагахе бханте а̄йасмантам̣ сусимам̣ а̄раббха бха̄ситам̣. а̄йасма̄ бханте сусимо йа̄ватако бхиккхӯхи саддхим̣ ахоси катха̄салла̄по, там̣ саббам̣ бхагавато а̄рочеси. тасмим̣ ваттхусмим̣ ‘‘пуббе кхо сусима дхаммат̣т̣хитин̃а̄н̣ам̣, паччха̄ нибба̄не н̃а̄н̣а’’нти евама̄дина̄ бханте бхагавата̄ бха̄ситам̣.

пуччха̄ – катхан̃ча̄вусо таттха бхагава̄ а̄йасмато сусиматтхерасса сампатиарахаттапаттасса ануйогавасена пат̣ипуччхитва̄ пат̣ипуччхитва̄ уттари дхаммадесанам̣ виттха̄ретва̄ десеси.

виссаджджана̄ – джа̄типаччайа̄ джара̄маран̣анти сусима пассасӣти. евам̣ бханте. бхавапаччайа̄ джа̄тӣти сусима пассасӣти. евам̣ бхантети евама̄дина̄ бханте бхагава̄ таттха а̄йасмато сусимасса сампатиарахаттапаттасса уттарипи ануйогавасена пат̣ипуччхитва̄ пат̣ипуччхитва̄ виттха̄рато дхаммам̣ десеси.

тасса ме бханте бхагава̄ аччайам̣ аччайато пат̣игган̣ха̄ту а̄йатим̣сам̣вара̄йа–

абхисамайасам̣йутта

накхасикха̄сутта

пуччха̄ – абхисамайасам̣йутте пана̄вусо пат̣хамам̣ сам̣гӣтам̣ накхасикха̄суттам̣ бхагавата̄ каттха кам̣ а̄раббха катхан̃ча бха̄ситам̣.

виссаджджана̄ – са̄ваттхийам̣ бханте самбахуле бхиккхӯ а̄раббха ‘‘там̣ ким̣ ман̃н̃атха бхиккхаве, катамам̣ ну кхо бахутарам̣, йо ва̄йам̣ майа̄ паритто накхасикха̄йам̣ пам̣суа̄ропито, айам̣ ва̄ маха̄патхавӣ’’ти евама̄дина̄ бхагавата̄ бха̄ситам̣.

дха̄тусам̣йутта

чан̇камасутта

пуччха̄ – дха̄тусам̣йутте пана̄вусо чан̇камасуттам̣ бхагавата̄ каттха кам̣ а̄раббха катхан̃ча бха̄ситам̣.

виссаджджана̄ – ра̄джагахе бханте самбахуле бхиккхӯ а̄раббха ‘‘дха̄тусова бхиккхаве сатта̄ сам̣санданти саменти, хӣна̄дхимуттика̄ хӣна̄дхимуттикехи саддхим̣ сам̣санданти саменти, калйа̄н̣а̄дхимуттика̄ калйа̄н̣а̄дхимуттикехи саддхим̣ сам̣санданти саментӣ’’ти евама̄дина̄ бхагавата̄ бха̄ситам̣.

ассаддхасам̣санданасутта

пуччха̄ – ассаддхасам̣санданасуттам̣ пана̄вусо бхагавата̄ каттха кам̣ а̄раббха катхан̃ча бха̄ситам̣.

виссаджджана̄ – са̄ваттхийам̣ бханте самбахуле бхиккхӯ а̄раббха ‘‘дха̄тусова бхиккхаве сатта̄ сам̣санданти саменти, ассаддха̄ ассаддхехи саддхим̣ сам̣санданти саменти, ахирика̄ ахирикехи саддхим̣ сам̣санданти саменти, аноттаппино. аппассута̄. кусӣта̄. мут̣т̣хассатино. дуппан̃н̃а̄ дуппан̃н̃ехи саддхим̣ сам̣санданти саментӣ’’ти евама̄дина̄ бхагавата̄ бха̄ситам̣.

анаматаггасам̣йутта

патхавӣсутта

пуччха̄ – анаматаггасам̣йутте а̄вусо дутийам̣ сам̣гӣтам̣ патхавӣсуттам̣ каттха кам̣ а̄раббха катхан̃ча бха̄ситам̣.

виссаджджана̄ – са̄ваттхийам̣ бханте самбахуле бхиккхӯ а̄раббха ‘‘анаматаггойам̣ бхиккхаве сам̣са̄ро, пубба̄ кот̣и на пан̃н̃а̄йати авиджджа̄нӣваран̣а̄нам̣ сатта̄нам̣ тан̣ха̄сам̣йоджана̄нам̣ сандха̄ватам̣ сам̣саратам̣. сеййатха̄пи бхиккхаве пурисо имам̣ маха̄патхавим̣ колат̣т̣химаттам̣ колат̣т̣химаттам̣ маттика̄гул̣икам̣ каритва̄ никкхипеййа ‘айам̣ ме пийа̄, тасса ме питу айам̣ пита̄’ти. апарийа̄динна̄ва бхиккхаве тасса пурисасса питупитаро ассу. атха̄йам̣ маха̄патхавӣ париккхайам̣ парийа̄да̄нам̣ гаччхеййа. там̣ киссахету, анаматаггойам̣ бхиккхаве сам̣са̄ро, пубба̄ кот̣и на пан̃н̃а̄йати авиджджа̄нӣваран̣а̄нам̣ сатта̄нам̣ тан̣ха̄ сам̣йоджана̄нам̣ сандха̄ватам̣ сам̣саратам̣’’ евама̄дина̄ бхагавата̄ бха̄ситам̣.

евам̣ дӣгхараттам̣ во бхиккхаве дуккхам̣ паччанубхӯтам̣ тиббам̣ паччанубхӯтам̣ бйасанам̣ паччанубхӯтам̣ кат̣асӣ вад̣д̣хита̄.

аламева саббасан̇кха̄ресу ниббиндитум̣,

алам̣ вираджджитум̣, алам̣ вимуччитум̣,

ассусутта

пуччха̄ – таттха̄вусо татийам̣ сам̣гӣтам̣ ассусуттам̣ бхагавата̄ каттха кам̣ а̄раббха катхан̃ча бха̄ситам̣.

виссаджджана̄ – са̄ваттхийам̣ бханте самбахулейева бхиккхӯ а̄раббха ‘‘там̣ ким̣ ман̃н̃атха бхиккхаве, катамам̣ ну кхо бахутарам̣, йам̣ ва̄ во имина̄ дӣгхена аддхуна̄ сандха̄ватам̣ сам̣саратам̣ амана̄пасампайога̄ мана̄павиппайога̄ канданта̄нам̣ роданта̄нам̣ ассу пассаннам̣ паггхаритам̣, йам̣ ва̄ чатӯсу маха̄самуддесу удака’’нти евама̄дина̄ бхагавата̄ бха̄ситам̣.

са̄сапасутта

пуччха̄ – таттха̄вусо чхат̣т̣хам̣ сам̣гӣтам̣ са̄сапасуттам̣ бхагавата̄ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – са̄ваттхийам̣ бханте ан̃н̃атарам̣ бхиккхум̣ а̄раббха бха̄ситам̣. ан̃н̃атаро бханте бхиккху бхагавантам̣ етадавоча ‘‘кӣвадӣгхо ну кхо бханте каппо’’ти. тасмим̣ бханте ваттхусмим̣ ‘‘дӣгхо кхо бхиккху каппо, со на сукаро сан̇кха̄тум̣ еттака̄ни васса̄ни итива̄, (пеййа̄ла) еттака̄ни вассасатасахасса̄ни итива̄ти евама̄дина̄ бхагавата̄ бха̄ситам̣.

ган̇га̄сутта

пуччха̄ – тена̄вусо…пе… самма̄самбуддхена анаматаггасам̣йутте ган̇га̄суттам̣ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – ра̄джагахе бханте ан̃н̃атарам̣ бра̄хман̣ам̣ а̄раббха бха̄ситам̣. ан̃н̃атаро бханте бра̄хман̣о бхагавантам̣ етадавоча ‘‘кӣва-

бахука̄ ну кхо бхо готама каппа̄ аббхатӣта̄ атикканта̄’’ти. тасмим̣ бханте ваттхусмим̣ ‘‘бахука̄ кхо бра̄хман̣а каппа̄ аббхатӣта̄ атикканта̄, те на сукара̄ сан̇кха̄тум̣ ‘еттака̄ каппа̄’ ити ва̄ ‘еттака̄ни каппасата̄ни’ ити ва̄ ‘еттака̄ни каппасахасса̄ни’ итива̄ ‘еттака̄ни каппасатасахасса̄ни’ ити ва̄’’ти ева ма̄дина̄ бхагавата̄ бха̄ситам̣.

пуггаласутта

пуччха̄ – пуггаласуттам̣ пана̄вусо бхагавата̄ каттха кам̣ а̄раббха катхан̃ча бха̄ситам̣.

виссаджджана̄ – ра̄джагахе бханте самбахуле бхиккхӯ а̄раббха ‘‘анаматаггойам̣ бхиккхаве сам̣са̄ро, пубба̄кот̣и на пан̃н̃а̄йати авиджджа̄ нӣваран̣а̄нам̣ сатта̄нам̣ тан̣ха̄сам̣йоджана̄нам̣ сандха̄ватам̣ сам̣саратам̣. екапуггаласса бхиккхаве каппам̣ сандха̄вато сам̣сарато сийа̄ евам̣ маха̄ ат̣т̣хикан̇кало ат̣т̣хипун̃джо ат̣т̣хира̄си, йатха̄ йам̣ вепулло паббато. саче сам̣ха̄рако асса, самбхатан̃ча на винассетйа̄’’ти евама̄дина̄ бхагавата̄ бха̄ситам̣.

дуггатасутта, сукхитасутта

пуччха̄ – таттха̄вусо дуггатасуттан̃ча сукхитасуттан̃ча бхагавата̄ каттха кам̣ а̄раббха катхан̃ча бха̄ситам̣.

нит̣т̣хаметтха гантаббам̣, ‘‘амхехипи паччанубхӯтам̣ имина̄ дӣгхена аддхуна̄’’ти евама̄дина̄ бхагавата̄ бха̄ситам̣.

тим̣саматтасутта

пуччха̄ – тим̣саматтасуттам̣ пана̄вусо бхагавата̄ каттха кам̣ а̄раббха катхан̃ча бха̄ситам̣.

виссаджджана̄ – ра̄джагахе бханте тим̣саматте па̄веййаке бхиккхӯ а̄раббха ‘‘анаматаггойам̣ бхиккхаве сам̣са̄ро, пубба̄кот̣и на пан̃н̃а̄йати авиджджа̄нӣваран̣а̄нам̣ сатта̄нам̣ тан̣ха̄сам̣йоджана̄нам̣ сандха̄ватам̣ сам̣саратам̣. там̣ ким̣ ман̃н̃атха бхиккхаве, катамам̣ ну кхо бахутарам̣, йам̣ ва̄ во имина̄ дӣгхена аддхуна̄ сандха̄ватам̣ сам̣саратам̣ сӣсаччхинна̄нам̣ лохитам̣ пассаннам̣ паггхаритам̣, йам̣ ва̄ чатӯсу маха̄самуддесу удака’’нти евама̄дина̄ бхавагата̄ бха̄ситам̣.

ма̄тусутта

пуччха̄ – ма̄тусутта̄дӣни пана̄вусо чхасутта̄ни бхагавата̄ каттха кам̣ а̄раббха катхан̃ча бха̄ситам̣.

виссаджджана̄ – са̄ваттхийам̣ бханте самбахуле бхиккхӯ а̄раббха ‘‘анаматаггойам̣ бхиккхаве сам̣са̄ро, пубба̄ кот̣и на пан̃н̃а̄йати авиджджа̄нӣваран̣а̄нам̣ сатта̄нам̣ тан̣ха̄сам̣йоджана̄нам̣ сандха̄ватам̣ сам̣саратам̣. на со бхиккхаве сатто сулабхарӯпо, йо на ма̄та̄бхӯтапуббо имина̄ дӣгхена аддхуна̄. йо на пита̄бхӯтапуббо. йо на бха̄та̄бхӯтапуббо. йо на бхагинибхӯтапуббо. йо на путтабхӯтапуббо. йо на дхӣта̄бхӯтапуббо имина̄ дӣгхена аддхуна̄’’ти евама̄дина̄ бханте бхагавата̄ бха̄ситам̣.

кассапасам̣йутта

чандӯпамасутта

пуччха̄ – кассапасам̣йутте пана̄вусо чандӯпамасуттам̣ бхагавата̄ каттха кам̣ а̄раббха катхан̃ча бха̄ситам̣.

виссаджджана̄ – са̄ваттхийам̣ бханте самбахуле бхиккхӯ а̄раббха ‘‘чандӯпама̄ бхиккхаве кула̄ни упасан̇каматха апакассева ка̄йам̣ апакасса читтам̣ ниччанавака̄ кулесу аппагаббха̄. сеййатха̄пи бхиккхаве пурисо джарудапа̄нам̣ ва̄ олокеййа паббатависамам̣ ва̄ надӣвидуггам̣ ва̄ апакассева ка̄йам̣ апакасса читтам̣. евамева кхо бхиккхаве чандӯпама̄ кула̄ни упасан̇каматха апакассева ка̄йам̣ апакасса читтам̣ ниччанавака̄ кулесу аппагаббха̄’’ти евама̄дина̄ бхагавата̄ бха̄ситам̣.

там̣ ким̣ ман̃н̃атха бхиккхаве, катхам̣ рӯпа̄ бхиккху арахати кула̄ни упасан̇камитум̣.

пуччха̄ – катхан̃ча̄вусо таттха бхагавата̄ парисуддха̄парисуддха дхаммадесанам̣ дассетва̄ бхиккхӯнам̣ ова̄до динно.

виссаджджана̄ – ‘‘там̣ ким̣ ман̃н̃атха бхиккхаве, катхам̣ рӯпасса бхиккхуно апарисуддха̄ дхаммадесана̄ хоти, катхам̣ рӯпасса бхиккхуно парисуддха̄ дхаммадесана̄ хотӣ’’ти евама̄дина̄ парисуддха̄парисуддхадхаммадесана̄ виттха̄рато дассетва̄ ‘‘кассапена ва̄ хи во бхиккхаве овадисса̄ми йо ва̄ панасса кассапасадисо, овадитехи ча пана во татхатта̄йа пат̣ипаджджитабба’’нти. евам̣ кхо бханте бхагавато бхиккхӯнам̣ ова̄до динно.

йо хи кочи бхиккхаве бхиккху евам̣читто паресам̣ дхаммам̣ десети ‘‘ахо вата ме дхаммам̣ сун̣еййум̣, сутва̄ ча пана дхаммам̣ пасӣдеййум̣, пасанна̄ ча ме пасанна̄ка̄рам̣ кареййум̣–

сва̄ккха̄то бхагавата̄ дхаммо сандит̣т̣хико ака̄лико ехи пассико опанеййико паччаттам̣ ведитаббо вин̃н̃ӯхи–

кассапена ва̄ хи во бхиккхаве овадисса̄ми йо ва̄ панасса кассапасадисо, овадитехи ча пана во татхатта̄йа пат̣ипаджджитаббам̣–

кулӯпакасутта

пуччха̄ – тена̄вусо бхагавата̄…пе… самма̄самбуддхена кассапасам̣йутте чатуттхам̣ кулӯпакасуттам̣ каттха кам̣ а̄раббха катхан̃ча бха̄ситам̣.

виссаджджана̄ – са̄ваттхийам̣ бханте самбахуле бхиккхӯ а̄раббха ‘‘там̣ ким̣ ман̃н̃атха бхиккхаве, катхам̣ рӯпо бхиккху арахати кулӯпако хотум̣, катхам̣ рӯпо бхиккху на арахати кулӯпако хоту’’нти евама̄дина̄ бхагавата̄ бха̄ситам̣.

кассапена ва̄ хи во бхиккхаве овадисса̄ми йо ва̄ панасса кассапасадисо, овадитехи ча пана во татхатта̄йа пат̣ипаджджитаббам̣.

дутийа ова̄дасутта

пуччха̄ – таттхева̄вусо бхагавата̄ дутийа ова̄дасуттам̣ каттха кена саддхим̣ катхан̃ча бха̄ситам̣.

виссаджджана̄ – ра̄джагахе бханте а̄йасмата̄ маха̄кассапена саддхим̣ ‘‘овада кассапа бхиккхӯ, карохи кассапа бхиккхӯнам̣ дхаммим̣ катхам̣, ахам̣ ва̄ кассапа бхиккхӯ овадеййам̣ твам̣ ва̄, ахам̣ ва̄ бхиккхӯнам̣ дхаммим̣ катхам̣ кареййам̣ твам̣ ва̄’’ти евама̄дина̄ бхагавата̄ бха̄ситам̣.

йасса кассачи бханте саддха̄ наттхи кусалесу дхаммесу, хирӣ наттхи. оттаппам̣ наттхи. вӣрийам̣ наттхи. пан̃н̃а̄ наттхи кусалесу дхаммесу.

татийа ова̄дасутта

пуччха̄ – таттхева̄вусо бхагавата̄ татийаова̄дасуттам̣ каттха кена саддхим̣ катхан̃ча бха̄ситам̣.

виссаджджана̄ – ра̄джагахе бханте а̄йасмата̄йева маха̄кассапена саддхим̣ ‘‘овада кассапа бхиккхӯ. карохи кассапа бхиккхӯнам̣ дхаммим̣ катхам̣, ахам̣ ва̄ кассапа бхиккхӯ овадеййам̣ твам̣ ва̄. ахам̣ ва̄ бхиккхӯнам̣ дхаммам̣ катхам̣ кареййам̣ твам̣ ва̄’’ти евама̄дина̄ бхагавата̄ бха̄ситам̣.

дуббача̄ кхо бханте етарахи бхиккхӯ довачассакаран̣ехи дхаммехи саманна̄гата̄ аккхама̄ аппадаккхин̣агга̄хино ануса̄саним̣–

саддхаммаппатирӯпакасутта

пуччха̄ – таттхева̄вусо бхагавата̄ парийоса̄нам̣ саддхаммаппатирӯпакасуттам̣ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – са̄ваттхийам̣ бханте а̄йасмантам̣йева маха̄кассапам̣ а̄раббха бха̄ситам̣. а̄йасма̄ бханте маха̄кассапо бхагавантам̣ етадевоча ‘‘ко ну кхо бханте хету ко паччайо, йена пуббе аппатара̄ни чева сиккха̄пада̄ни ахесум̣, бахутара̄ ча бхиккхӯ ан̃н̃а̄йа сан̣т̣хахим̣су. ко пана бханте хету ко паччайо, йенетарахи бахутара̄ни чева саккха̄пада̄ни аппатара̄ ча бхиккхӯ ан̃н̃а̄йа сан̣т̣хахантӣ’’ти. тасмим̣ бханте ваттхусмим̣ ‘‘еван̃четам̣ кассапа хоти саттесу ха̄йама̄несу саддхамме антарадха̄йама̄не бахутара̄ничева сиккха̄пада̄ни хонти, аппатара̄ча бхиккхӯ ан̃н̃а̄йа сан̣т̣хахантӣ’’ти евама̄дина̄ бхагавата̄ бха̄ситам̣.

ла̄бхасакка̄расам̣йутта

мӣл̣хакасутта

пуччха̄ – тена̄вусо…пе… самма̄самбуддхена ла̄бхасакка̄рам̣йутте пан̃чамам̣ сам̣гӣтам̣ мӣл̣хакасуттам̣ каттха кам̣ а̄раббха катхан̃ча бха̄ситам̣.

виссаджджана̄ – са̄ваттхийам̣ бханте самбахуле бхиккхӯ а̄раббха ‘‘да̄рун̣о бхиккхаве ла̄бхасакка̄расилоко пхарусо антара̄йико ануттарасса йогаккхемасса адхигама̄йа. сеййатха̄пи бхиккхаве мӣл̣хака̄ гӯтха̄дӣ гӯтхапӯра̄ пун̣н̣а̄ гӯтхасса, пурато часса маха̄гӯтхапун̃джо, са̄ тена ан̃н̃а̄ мӣл̣хака̄ атиман̃н̃еййа ‘‘ахамхи гӯтха̄дӣ гӯтхапӯра̄ пун̣н̣а̄ гӯтхасса, пурато ча мйа̄йам̣ маха̄гӯтхапун̃джо’’ти евама̄дина̄ бхагавата̄ бха̄ситам̣.

там̣ хи тасса бхиккхаве могхапурисасса хоти дӣгхараттам̣ ахита̄йа дуккха̄йа.

евам̣ да̄рун̣о кхо бхиккхаве ла̄бхасакка̄расилоко.

тасма̄тиха бхиккхаве евам̣ сиккхитаббам̣, ‘‘уппаннам̣ ла̄бхасакка̄раси локам̣ паджахисса̄ма, на ча но уппанно ла̄бхасакка̄расилоко читтам̣ парийа̄да̄йа т̣хассабхӣ’’ти, еван̃хи кхо бхиккхаве сиккхитаббам̣.

екапуттакасутта

пуччха̄ – таттхо а̄вусо пора̄н̣акехи дхаммасам̣га̄хакехи сам̣гӣтам̣ екапуттакасуттам̣ каттха кам̣ а̄раббхам̣ катхан̃ча бха̄ситам̣.

виссаджджана̄ – са̄ваттхийам̣ бханте самбахуле бхиккхӯ а̄раббха ‘‘да̄рун̣о бхиккхаве ла̄бхасакка̄расилоко кат̣уко пхарусо антара̄йико ануттарасса йогаккхемасса адхигама̄йа, саддха̄ бхиккхаве упа̄сика̄ екапуттакам̣ пийам̣ мана̄пам̣ евам̣ самма̄а̄йа̄чама̄на̄ а̄йа̄чеййа та̄дисо та̄та бхава̄хи, йа̄дисо читто ча гахапати хаттхако ча а̄л̣авако’’ти евама̄дина̄ бхагавата̄ бха̄ситам̣.

еса̄ бхиккхаве тула̄ етам̣ пама̄н̣ам̣ мама са̄вака̄нам̣ упа̄сака̄нам̣ йадидам̣ читто ча гахапати хаттхако ча а̄л̣авако.

саче кхо твам̣ та̄та ага̄расма̄ анага̄рийам̣ паббаджаси, та̄дисо та̄та бхава̄хи, йа̄диса̄ са̄рипуттамоггалла̄на̄.

ма̄ ча кхо твам̣ та̄та секхам̣ аппаттама̄насам̣ ла̄бхасакка̄расилоко анупа̄пун̣а̄ту–

евам̣ да̄рун̣о бхиккхаве ла̄бхасакка̄расилоко кат̣уко пхарусо антара̄йико ануттарасса йогаккхемасса адхигама̄йа.

екавӣтусутта

пуччха̄ – таттхева а̄вусо пора̄н̣акехи дхаммасам̣га̄йакехи сам̣гӣтам̣ екадхӣтусуттам̣ бхагавата̄ каттха кам̣ а̄раббха катхан̃ча бха̄ситам̣.

виссаджджана̄ – са̄ваттхийам̣йева бханте самбахуле бхиккхӯ а̄раббха ‘‘да̄рун̣о бхиккхаве ла̄бхасакка̄расилоко кат̣уко пхарусо антара̄йико ануттарасса йогаккхемасса адхигама̄йа. саддха̄ бхиккхаве упа̄сика̄ екам̣ дхӣтарам̣ пийам̣ мана̄пам̣ евам̣ самма̄ а̄йа̄чама̄на̄ а̄йа̄чеййа ‘та̄диса̄ аййе бхава̄хи, йа̄диса̄ кхуджджуттара̄ ча упа̄сика̄ вел̣укан̣д̣акийа̄ ча нандама̄та̄’ти. еса̄ бхиккхаве тула̄ етам̣ пама̄н̣ам̣ мама са̄вика̄нам̣ упа̄сика̄нам̣, йадидам̣ кхуджджуттара̄ ча упа̄сика̄ вел̣укан̣д̣акийа̄ ча нандама̄та̄’’ти евама̄дина̄ бханте бхагавата̄ бха̄ситам̣.

саче кхо твам̣ аййе ага̄расма̄ анага̄рийам̣ паббаджаси, бха̄диса̄ аййе бхава̄хи, йа̄диса̄ кхема̄ ча бхиккхунӣ уппалаван̣н̣а̄ ча–

тасма̄тиха бхиккхаве евам̣ сиккхитаббам̣.

ра̄хуласам̣йутта

пуччха̄ – ра̄хуласам̣йуттам̣ пана̄вусо бхагавата̄ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – са̄ваттхийам̣ бханте а̄йасмантам̣ ра̄хулам̣ а̄раббха бха̄ситам̣. а̄йасма̄ бханте ра̄хуло бхагавантам̣ етадавоча ‘‘са̄дху ме бханте бхагава̄ сам̣кхиттена дхаммам̣ десету, йамахам̣ бхагавато дхаммам̣ сутва̄ еко вӯпакат̣т̣хо аппаматто а̄та̄пӣ пахитатто вихареййа’’нти, тасмим̣ бханте ваттхусмим̣ ‘‘там̣ ким̣ ман̃н̃аси ра̄хула, чаккхуниччам̣ ва̄ аниччам̣ ва̄ти. аниччам̣ бханте. йам̣ пана̄ниччам̣, дуккхам̣ ва̄ там̣ сукхам̣ ва̄ти. дуккхам̣ бханте. йам̣ пана̄ниччам̣ дуккхам̣ випарин̣а̄мадхаммам̣, каллам̣ ну там̣ саманупасситум̣ ‘етам̣ мама, есо хамасми, есо ме атта̄’ти. но хетам̣ бханте’’ти евама̄дина̄ бханте бхагавата̄ бха̄ситам̣.

лаккхан̣асам̣йутта

ат̣т̣хисутта

пуччха̄ – лаккхан̣асам̣йутте пана̄вусо пора̄н̣акехи дхаммасам̣га̄хакаттхерехи пат̣хамам̣ сам̣гӣтам̣ ат̣т̣хисуттам̣ бхагавата̄ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – ра̄джагахе бханте а̄йасмантан̃ча лаккхан̣ам̣ а̄йасмантан̃ча маха̄моггалла̄нам̣ а̄раббха бха̄ситам̣. а̄йасма̄ бханте лаккхан̣о бхагавата̄ саммукхе а̄йасмантам̣ маха̄моггалла̄нам̣ етадавоча ‘‘идха̄йасма̄ маха̄моггалла̄но гиджджхакӯт̣а̄ паббата̄ ороханто ан̃н̃атарасмим̣ падесе ситам̣ па̄тва̄ка̄си, ко ну кхо а̄вусо моггалла̄на хету, ко паччайо ситасса па̄тукамма̄йа̄’’ти. а̄йасма̄ ча бханте маха̄моггалла̄но ‘‘идха̄хам̣ а̄вусо гиджджхакӯт̣а̄ паббата̄ ороханто аддасам̣ ат̣т̣хикасан̇кхаликам̣ веха̄сам̣ гаччхантим̣’’ти евама̄дина̄ а̄рочеси. тасмим̣ бханте ваттхусмим̣ ‘‘чаккхубхӯта̄ вата бхиккхаве са̄вака̄ вихаранти, н̃а̄н̣абхӯта̄ вата бхиккхаве са̄вака̄ вихаранти, йатрахи на̄ма са̄вако еварӯпам̣ н̃ассати ва̄ даккхати ва̄ саккхим̣ ва̄ кариссатӣ’’ти евама̄дина̄ бхагавата̄ бха̄ситам̣.

аччхарийам̣ вата бхо, аббхутам̣ вата бхо;

еварӯпопи на̄ма сатто бхависсати.

пин̣д̣асутта

пуччха̄ – тена̄вусо джа̄ната̄…пе… самма̄самбуддхена лаккхан̣асам̣йутте татийам̣ сам̣гӣтам̣ пин̣д̣асуттам̣ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – ра̄джагахе бханте а̄йасмантан̃ча лаккхан̣ам̣ а̄йасмантан̃ча маха̄моггалла̄нам̣ а̄раббха бха̄ситам̣. а̄йасма̄ бханте лаккхан̣о бхаггавато саммукхе а̄йасмантам̣ маха̄моггалла̄нам̣ етадавоча ‘‘идха̄йасма̄ маха̄моггалла̄но гиджджхакӯт̣а̄ паббата̄ ороханто ан̃н̃атарасмим̣ падесе ситам̣ па̄тва̄ка̄си, ко нукхо а̄вусо моггалла̄нахету, ко паччайо ситасса па̄тукамма̄йа̄’’ти. а̄йасма̄ ча бханте маха̄моггалла̄но ‘‘идха̄хам̣ а̄вусо гиджджхакӯт̣а̄ паббата̄ ороханто аддасам̣ мам̣сапин̣д̣ам̣ веха̄сам̣ гаччхантам̣, таменам̣ гиджджха̄пи ка̄ка̄пи кулала̄пи анупатитва̄ анупатитва̄ витаччхенти вира̄дженти. са̄ судам̣ ат̣т̣ассарам̣ каротӣ’’ти евама̄дина̄ а̄рочеси. тасмим̣ бханте ваттхусмим̣ ‘‘чаккхубхӯта̄ вата бхиккхаве са̄вака̄ вихаранти, н̃а̄н̣абхӯта̄ вата бхиккхаве са̄вака̄ вихаранти, йатрахи на̄ма са̄вако еварӯпам̣ н̃ассати ва̄ даккхати ва̄ саккхим̣ ва̄ кариссатӣ’’ти евама̄дина̄ бхагавата̄ бха̄ситам̣.

асиломасутта

пуччха̄ – таттхева а̄вусо пора̄н̣акехи дхаммасам̣га̄хакехи маха̄тхерехи сам̣гӣтам̣ асиломасуттам̣ бхагавата̄ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – ра̄джагахе бханте а̄йасмантан̃ча лаккхан̣ам̣ а̄йасмантан̃ча маха̄моггалла̄нам̣ а̄раббха бха̄ситам̣. а̄йасма̄ бханте лаккхан̣о бхагавато саммукхе а̄йасмантам̣ маха̄моггалла̄нам̣ етадавоча ‘‘ко ну кхо а̄вусо моггалла̄на хету, ко паччайо ситасса па̄тукамма̄йа̄’’ти. а̄йасма̄ ча бханте маха̄моггалла̄наттхеро ‘‘идха̄хам̣ а̄вусо гиджджхакӯт̣а̄ паббата̄ ороханто аддасам̣ асиломам̣ веха̄сам̣ гаччхантам̣’’ти евама̄дина̄ а̄рочеси. тасмим̣ бханте ваттхусмим̣ чаккхубхӯта̄ вата бхиккхаве са̄вака̄ вихаранти, н̃а̄н̣абхӯта̄ вата бхиккхаве са̄вака̄ вихаранти. (пеййа̄ла) есо бхиккхаве сатто имасмим̣йева ра̄джагахе сӯкарико ахосӣ’’ти евама̄дина̄ бхагавата̄ бха̄ситам̣.

сӯчиломасутта

пуччха̄ – таттхева а̄вусо пора̄н̣акехи дхаммасам̣га̄хакамаха̄тхерехи сам̣гӣтам̣ сӯчиломасуттам̣ бхагавата̄ каттха кам̣ а̄раббха кисмим̣ ваттхусмим̣ катхан̃ча бха̄ситам̣.

виссаджджана̄ – таттхева бханте ра̄джагахе а̄йасмантан̃ча лаккхан̣ам̣ а̄йасмантан̃ча маха̄моггалла̄нам̣ а̄раббха бха̄ситам̣. а̄йасма̄ бханте лаккхан̣о бхагавато саммукхе татхева авоча.

а̄йасма̄ ча бханте маха̄моггалла̄но татхева а̄рочеси. тасмим̣ бханте ваттхусмим̣ ‘‘чаккхубхӯта̄ вата бхиккхаве са̄вака̄ вихаранти, н̃а̄н̣абхӯта̄ вата бхиккхаве са̄вака̄ вихаранти, (пеййа̄ла) есо бхиккхаве сатто имасмим̣йева ра̄джагахе сӯто ахосӣ’’ти евама̄дина̄ бхагавата̄ бха̄сита̄.