маджджхимапан̣н̣а̄сапа̄л̣и

кандаракасутта

пуччха̄ – тена̄вусо джа̄ната̄…пе… самма̄самбуддхена кандаракасуттам̣ каттха кам̣ а̄раббха кисмим̣ ваттхусмим̣ бха̄ситам̣.

виссаджджана̄ – чампа̄йам̣ бханте гаггара̄йа поккхаран̣ийа̄ тӣре пессан̃ча хаттха̄рохапуттам̣ кандаракан̃ча парибба̄джакам̣ а̄раббха бха̄ситам̣, кандарако бханте парибба̄джако бхагавато ча бхиккхусан̇гхасса ча ван̣н̣ам̣ абха̄си, пессо ча бханте хаттха̄рохапутто бхагавато ча дхаммадесана̄йа ча ван̣н̣ам̣ абха̄си. тасмим̣ бханте ваттхусмим̣ бха̄ситам̣.

пуччха̄ – евам̣ кхо а̄вусо кандаракена парибба̄джакена бхагавато ча бхиккхусан̇гхасса ча абхиппасаннена ван̣н̣е бха̄сите катхам̣ бхагава̄ там̣ самануджа̄нитва̄ дхаммадесана̄рамбхам̣ а̄рабхи, катхан̃ча пессо хаттха̄рохапутто бхагавато ча дхаммадесана̄йа ча ван̣н̣ам̣ абха̄си, катхан̃ча пессасса хаттха̄рохапуттасса аджджха̄сайа̄нурӯпам̣ дхаммам̣ десеси.

виссаджджана̄ – евам̣ кхо бханте кандаракена парибба̄джакена бхагавато ча бхиккхусан̇гхасса ча абхиппасаннена ван̣н̣е бха̄сите ‘‘еваметам̣ кандарака еваметам̣ кандарака’’ евама̄дина̄ бхагава̄ там̣ самануджа̄нитва̄ ‘‘санти хи кандарака бхиккхӯ имасмим̣ бхиккхусан̇гхе араханто кхӣн̣а̄сава̄ вуситаванто катакаран̣ӣйа̄ охитабха̄ра̄ ануппаттасадаттха̄ париккхӣн̣абхавасам̣йоджана̄ саммадан̃н̃а̄ вимутта̄’’ти евама̄дина̄ дхаммадесанам̣ сама̄рабхи. атха кхо бханте пессо хаттха̄рохапутто ‘‘аччхарийам̣ бханте аббхутам̣ бханте йа̄ва супан̃н̃атта̄ чиме бханте бхагавата̄ чатта̄ро сатипат̣т̣ха̄на̄ сатта̄нам̣ висуддхийа̄ сокапаридева̄нам̣ саматиккама̄йа дуккхадоманасса̄нам̣ аттхан̇гама̄йа н̃а̄йасса адхигама̄йа нибба̄насса саччхикирийа̄йа̄’’ти евама̄дина̄ бхагавато ча дхаммадесана̄йа ван̣н̣ам̣ абха̄си, бхагава̄пи бханте ‘‘гаханан̃хетам̣ песса йадидам̣ манусса̄, утта̄накан̃хетам̣ песса йадидам̣ пасаво’’тиа̄дина̄ пессасса хаттха̄рохапуттасса аджджха̄сайа̄нурӯпам̣ дхаммакатхам̣ десеси.

пуччха̄ – там̣ пана̄вусо дхаммадесанам̣ сутва̄ пессасса хаттха̄рохапуттасса кӣдисо а̄нисам̣со адхигато, катхан̃ча бхагава̄ там̣ пуггалачатуккадесанам̣ сам̣кхиттена бха̄ситам̣, бхиккхӯнам̣ виттха̄рена вибхаджитва̄ десеси.

виссаджджана̄ – там̣ кхо пана бханте дхаммам̣ сутва̄ пессасса хаттха̄рохапуттасса две а̄нисам̣са̄ адхигата̄ сан̇гхе ча паса̄до сатипат̣т̣ха̄напариггахан̣ӯпа̄йо ча абхинаво. бхагава̄ ча бханте там̣ пуггалачатуккадесанам̣ бхиккхӯхи йа̄чито ‘‘катамо ча бхиккхаве пуггало аттапарита̄пана̄нуйогамануйутто’’тиа̄дина̄ сам̣кхиттена бха̄ситам̣, виттха̄рена аттхам̣ авибхаттам̣. виттха̄рена вибхаджитва̄ десеси.

ат̣т̣хакана̄гарасутта

пуччха̄ – ат̣т̣хакана̄гарасуттам̣ пана̄вусо каттха кам̣ а̄раббха кисмим̣ ваттхусмим̣ кена бха̄ситам̣.

виссаджджана̄ – веса̄лийам̣ бханте вел̣увага̄маке гахапатим̣ ат̣т̣хакана̄гарам̣ а̄раббха а̄йасмата̄ а̄нандаттхерена дхаммабхан̣д̣а̄га̄рикена бха̄ситам̣. дасамо бханте гахапати ат̣т̣хакана̄гаро а̄йасмантам̣ а̄нандам̣ упасан̇камитва̄ етадавоча ‘‘аттхи ну кхо бханте а̄нанда тена бхагавата̄ джа̄ната̄ пассата̄ арахата̄ самма̄самбуддхена екадхаммо аккха̄то, йаттха бхиккхуно аппаматтасса а̄та̄пино пахитаттасса вихарато авимуттан̃чева читтам̣ вимуччати, апариккхин̣а̄ ча а̄сава̄ париккхайам̣ гаччханти, анануппаттан̃ча ануттарам̣ йогаккхемам̣ анупа̄пун̣а̄тӣ’’ти, тасмим̣ бханте ваттхусмим̣ бха̄ситам̣.

секхасутта

пуччха̄ – секхасуттам̣ пана̄вусо каттха кам̣ а̄раббха кисмим̣ ваттхусмим̣ кена бха̄ситам̣.

виссаджджана̄ – саккесу бханте капилаваттхусмим̣ сантха̄га̄ре а̄йасмата̄ а̄нандаттхерена дхаммабхан̣д̣а̄га̄рикена ка̄пилаваттхаве сакйе а̄раббха бха̄ситам̣. бхагава̄ бханте ка̄пилаваттхаве сакйе бахудевараттим̣ дхаммийа̄ катха̄йа сандассетва̄ сама̄дапетва̄ самуттеджетва̄ сампахам̣сетва̄ а̄йасмантам̣ а̄нандам̣ а̄мантеси ‘‘пат̣ибха̄ту там̣ а̄нанда ка̄пилаваттхава̄нам̣ сакйа̄нам̣ секхо па̄т̣ипадо, пит̣т̣хи ме а̄гила̄йати, тамахам̣ а̄йамисса̄мӣ’’ти. тасмим̣ бханте ваттхусмим̣ бха̄ситам̣.

поталийасутта

пуччха̄ – поталийасуттам̣ пана̄вусо бхагавата̄ каттха кам̣ а̄раббха кисмим̣ ваттхусмим̣ бха̄ситам̣.

виссаджджана̄ – ан̇гуттара̄песу бханте а̄пан̣е на̄ма ан̇гуттара̄па̄нам̣ нигаме поталийам̣ гахапатим̣ пат̣иккхиттасаббакаммантам̣ а̄раббха бха̄ситам̣. поталийо бханте гахапати пат̣иккхиттасаббакамманто йена бхагава̄ тенупасан̇ками, упасан̇каманто бхагавата̄ гахапатива̄дена самуда̄чарийама̄но купито анаттамано бхагавантам̣ етадавоча ‘‘тайидам̣ бхо готама наччханнам̣ тайидам̣ наппатирӯпам̣, йам̣ мам̣ твам̣ гахапатива̄дена самуда̄чарасӣ’’ти. тасмим̣ бханте ваттхусмим̣ бха̄ситам̣.

пуччха̄ – катхан̃ча̄вусо бхагава̄ ка̄ма̄нам̣ а̄дӣнавам̣ виттха̄рена пака̄сетва̄ арийасса винайе воха̄расамуччхедам̣ дассеси.

виссаджджана̄ – атха бханте бхагава̄ арийасса винайе воха̄расамуччхеда̄йа ат̣т̣ха дхамме вибхаджитва̄ ‘‘сеййатха̄пи гахапати куккуро джигхаччха̄дуббалйапарето гогха̄такасӯнам̣ паччупат̣т̣хито асса’’ евама̄дина̄ ка̄месу а̄дӣнавам̣ дассетва̄ парийоса̄не тӣхи виджджа̄хи арийасса винайе воха̄расамуччхедам̣ саббенасаббам̣ саббатха̄саббам̣ воха̄расамуччхедам̣ виттха̄рена вибхаджитва̄ десеси.

джӣвакасутта

пуччха̄ – тена̄вусо бхагавата̄…пе… самма̄самбуддхена джӣвакасуттам̣ каттха кам̣ а̄раббха кисмим̣ ваттхусмим̣ бха̄ситам̣.

виссаджджана̄ – ра̄джагахе бханте джӣвакам̣ кома̄рабхаччам̣ а̄раббха бха̄ситам̣. джӣвако бханте кома̄рабхаччо бхагавантам̣ упасан̇камитва̄ етадавоча ‘‘сутам̣ метам̣ бханте саман̣ам̣ готамам̣ уддисса па̄н̣ам̣ а̄рабханти, там̣ саман̣о готамо джа̄нам̣ уддисса катам̣ мам̣сам̣ парибхун̃джати пат̣ичча камманти. йе те бханте евама̄хам̣су ‘саман̣ам̣ готамам̣ уддисса па̄н̣ам̣ а̄рабханти, там̣ саман̣о готамо джа̄нам̣ уддисса катам̣ мам̣сам̣ парибхун̃джати пат̣ичча камма’нти, каччи те бханте бхагавато вуттава̄дино на ча бхагавантам̣ абхӯтена аббха̄чиккханти, дхаммасса ча̄нудхаммам̣ бйа̄каронти, на ча кочи сахадхаммико ва̄да̄нува̄до га̄райхам̣ т̣ха̄нам̣ а̄гаччхатӣ’’ти. тасмим̣ бханте ваттхусмим̣ бха̄ситам̣.

упа̄лисутта

пуччха̄ – упа̄лисуттам̣ пана̄вусо бхагавата̄ каттха кам̣ а̄раббха кисмим̣ ваттхусмим̣ бха̄ситам̣.

виссаджджана̄ – на̄л̣анда̄йам̣ бханте упа̄лим̣ гахапатим̣ а̄раббха бха̄ситам̣. упа̄ли бханте гахапати бхагавантам̣ упасан̇камитва̄ етадавоча ‘‘а̄гама̄ нукхвидха бханте дӣгхатапассӣ ниган̣т̣хо’’ти, евама̄дина̄ ча бханте упа̄ли гахапати бхагавато пат̣исандха̄рам̣ катва̄ аттано а̄чарийасса ниган̣т̣хасса на̄т̣апуттасса ва̄дам̣ пака̄сеси, ва̄дам̣ ван̣н̣еси. тасмим̣ бханте ваттхусмим̣ бха̄ситам̣.

пуччха̄ – атха кхо а̄вусо бхагава̄ упа̄лим̣ гахапатим̣ тасмим̣ ва̄де катхам̣ самануйун̃джӣ самануга̄хӣ саманубха̄сӣ, катхан̃часса упа̄йам̣ дассетва̄ йатха̄бхӯтам̣ аттхам̣ н̃а̄песи.

виссаджджана̄ – атха кхо бханте бхагава̄ упа̄лим̣ гахапатим̣ ‘‘саче кхо твам̣ гахапати сачче патит̣т̣ха̄йа мантеййа̄си, сийа̄ но еттха катха̄салла̄по’’ти упа̄лим̣ гахапатим̣ катхам̣ самут̣т̣ха̄петва̄ ‘‘там̣ ким̣ман̃н̃аси гахапати, идхасса ниган̣т̣хо а̄ба̄дхико дуккхито ба̄н̃хагила̄но сӣтодакапариккхитто ун̣ходакапат̣исевӣ, со сӣтодакам̣ алабхама̄но ка̄лан̇кареййа̄’’ти евама̄дина̄ бханте бхагава̄ чатта̄ро упа̄йе дассетва̄ упа̄лим̣ гахапатим̣ йатха̄бхӯтаматтхам̣ н̃а̄песи.

пуччха̄ – евам̣ кхо а̄вусо упа̄ли гахапати бхагавата̄ сан̃н̃а̄пито имасмим̣ дхаммавинайе пасанно кӣдисам̣ пасанна̄ка̄рам̣ ака̄си, катхан̃ча бхагава̄ там̣ пуна ануса̄ситва̄ уттари винеси.

виссаджджана̄ – ‘‘пурименева̄хам̣ бханте опаммена бхагавато аттамано абхираддхо, апича̄хам̣ има̄ни бхагавато вичитра̄ни пан̃хапат̣ибха̄на̄ни сотука̄мо, ева̄хам̣ бхагавантам̣ паччанӣкам̣ ка̄таббам̣ аман̃н̃исса’’нти, евама̄дина̄ бханте упа̄ли гахапати бхагавата̄ вин̃н̃а̄пито имасмим̣ дхаммавинайе пасанно пасанна̄ка̄рам̣ ака̄си. таттха бхагава̄ ча бханте ‘‘анувиччака̄рам̣ кхо гахапати карохи, анувиччака̄ро тумха̄диса̄нам̣ н̃а̄таманусса̄нам̣ са̄дху хотӣ’’ти евама̄дина̄ пуна ануса̄ситва̄ уттари йа̄ва дхаммачаккхупат̣ила̄бха̄ винеси.

пуччха̄ – катхан̃ча̄вусо ниган̣т̣хасса на̄т̣апуттасса упа̄лисса гахапатисса нивесанам̣ гантва̄ а̄вӣмам̣сана̄ ча упа̄лисса гахапатисса паччуттара̄ катха̄ ча ахоси.

виссаджджана̄ – ‘‘умматтоси твам̣ гахапати даттоси твам̣ гахапатӣ’’ти евама̄дина̄ бханте ниган̣т̣хасса на̄т̣апуттасса упа̄лисса гахапатисса нивесанам̣ гантва̄ вӣмам̣са̄ ча ‘‘бхаддика̄ бханте а̄ват̣т̣анӣма̄йа̄ калйа̄н̣ӣ бханте а̄ват̣т̣анӣма̄йа̄ти’’ евама̄дина̄ упа̄лисса гахапатисса паччуттаракатха̄ ча ахоси.

дхӣрасса вигатамохасса,

пабхиннакхӣласса виджитавиджайасса;

анӣгхасса сусамачиттасса,

вуддхасӣласса са̄дхупан̃н̃асса;

весамантарасса вималасса,

бхагавато тасса са̄вакохамасмим̣.

акатхам̣ катхисса туситасса,

ванталока̄мисасса мудитасса;

катасаман̣асса мануджасса,

антимаса̄рӣрасса нарасса.

анопамасса вираджасса,

бхагавато тасса са̄вако хамасми –

тан̣хаччхидасса буддхасса,

вӣтадхӯмасса анупалиттасса.

а̄хунеййасса йаккхасса,

уттамапуггаласса атуласса;

махато йасаггапаттасса,

бхагавато тасса са̄вако хамасми –

куккураватикасутта

пуччха̄ – куккураватикасуттам̣ пана̄вусо бхагавата̄ каттха кам̣ а̄раббха кисмим̣ ваттхусмим̣ бха̄ситам̣.

виссаджджана̄ – колийесу бханте халиддавасане на̄ма колийа̄нам̣ нигаме пун̣н̣ан̃ча колийапуттам̣ говатикам̣ ачелан̃ча сенийам̣ куккураватикам̣ а̄раббха бха̄ситам̣. пун̣н̣о бханте колийа путто говатико бхагавантам̣ етадавоча ‘‘айам̣ бханте ачело сенийо куккураватико дуккарака̄рако чхама̄никкхиттам̣ бходжанам̣ бхун̃джати, тасса там̣ куккураватам̣ дӣгхараттам̣ саматтам̣ сама̄диннам̣, тасса ка̄ гати, ко абхисампара̄йо’’ти, тасмим̣ бханте ваттхусмим̣ бха̄ситам̣.

абхайара̄джакума̄расутта

пуччха̄ – тена̄вусо джа̄ната̄…пе… самма̄самбуддхена абхайара̄джакума̄расуттам̣ каттха кам̣ а̄раббха кисмим̣ ваттхусмим̣ бха̄ситам̣.

виссаджджана̄ – ра̄джагахе ме бханте абхайам̣ ра̄джакума̄рам̣ а̄раббха бха̄ситам̣. абхайо бханте ра̄джакума̄ро бхагавантам̣ упасан̇камитва̄ етадавоча ‘‘бха̄сеййа ну кхо бханте татха̄гато там̣ ва̄чам̣, йа̄ са̄ ва̄ча̄ паресам̣ аппийа̄ амана̄па̄’’ти, тасмим̣ бханте ваттхусмим̣ бха̄ситам̣.

бахуведанӣйасутта

пуччха̄ – бахуведанӣйасуттам̣ пана̄вусо бхагавата̄ каттха кам̣ а̄раббха кисмим̣ ваттхусмим̣ бха̄ситам̣.

виссаджджана̄ – са̄ваттхийам̣ бханте а̄йасмантан̃ча уда̄йим̣ пан̃чакан̇ган̃ча тхапатим̣ а̄раббха бха̄ситам̣, пан̃чакан̇го бханте тхапати а̄йасмантам̣ уда̄йим̣ упасан̇камитва̄ веданам̣ пуччхи, а̄йасма̄ бханте уда̄йӣ пан̃чакан̇гам̣ тхапатим̣ етадавоча ‘‘тиссо кхо тхапати ведана̄ вутта̄ бхагавата̄ сукха̄ ведана̄ дуккха̄ ведана̄ адуккхамасукха̄ ведана̄’’ти. евам̣ вутте бханте пан̃чакан̇го тхапати а̄йасмантам̣ уда̄йим̣ етадавоча ‘‘на кхо бханте уда̄йи тиссо ведана̄ вутта̄ бхагавата̄, две ведана̄ вутта̄ бхагавата̄ сукха̄ ведана̄ дуккха̄ ведана̄, йа̄йам̣ бханте адуккхамасукха̄ ведана̄, сантасмим̣ еса̄ пан̣ӣте сукхе вутта̄ бхагавата̄’’ти. нева асаккхи кхо бханте а̄йасма̄ уда̄йӣ пан̃чакан̇гам̣ тхапатим̣ сан̃н̃а̄петум̣, на пана асаккхи пан̃чакан̇го тхапати а̄йасмантам̣ уда̄йим̣ сан̃н̃а̄петум̣. ассоси кхо а̄йасма̄ а̄нандо а̄йасмато уда̄йисса пан̃чакан̇гена тхапатина̄ саддхим̣ имам̣ катха̄салла̄пам̣, атха кхо бханте а̄йасма̄ а̄нандо йа̄ватако ахоси а̄йасмато уда̄йисса пан̃чакан̇гена тхапатина̄ саддхим̣ катха̄салла̄по, там̣ саббам̣ бхагавато а̄рочеси. тасмим̣ бханте ваттхусмим̣ бха̄ситам̣.

апан̣н̣акасутта

пуччха̄ – апан̣н̣акасуттам̣ пана̄вусо бхагавата̄ каттха кам̣ а̄раббха кисмим̣ ваттхусмим̣ бха̄ситам̣.

виссаджджана̄ – косалесу бханте са̄ла̄йам̣ на̄ма косала̄нам̣ бра̄хман̣ага̄ме са̄леййаке бра̄хман̣агахапатике а̄раббха бха̄ситам̣. самбахула̄ бханте ан̃н̃атиттхийа̄ са̄леййака̄нам̣ бра̄хман̣агахапатика̄нам̣ аттано аттано миччха̄дит̣т̣хийо пат̣игган̣ха̄песум̣ угган̣ха̄песум̣. те пана бханте са̄леййака̄ бра̄хман̣агахапатика̄ екадит̣т̣хийампи патит̣т̣ха̄тум̣ на саккхим̣су. тасмим̣ бханте ваттхусмим̣ бха̄ситам̣.

пуччха̄ – татра а̄вусо бхагавата̄ пат̣хамам̣ миччха̄ва̄до ча самма̄ва̄до ча катхам̣ вибхаджитва̄ пака̄сито.

виссаджджана̄ – татра бханте бхагавата̄ ‘‘санти гахапатайо еке саман̣абра̄хман̣а̄ евам̣ва̄дино евам̣дит̣т̣хино наттхи диннам̣ наттхи йит̣т̣хам̣ наттхи хутам̣ наттхи сукатадуккат̣а̄нам̣ камма̄нам̣ пхалам̣ випа̄ко’’ти евама̄дина̄ пат̣хамам̣ миччха̄ва̄до ча самма̄ва̄до ча вибхаджитва̄ пака̄сито.

пуччха̄ – таттха а̄вусо бхагавата̄ миччха̄ва̄дӣнан̃ча досо самма̄ва̄дӣнан̃ча гун̣о катхам̣ вича̄ретва̄ пака̄сито.

виссаджджана̄ – таттха бханте бхагавата̄ ‘‘татра гахапатайо йете саман̣абра̄хман̣а̄ евам̣ва̄дино евам̣дит̣т̣хино наттхи диннам̣ наттхи йит̣т̣хам̣ наттхи хутам̣ наттхи сукатадуккат̣а̄нам̣ камма̄нам̣ пхалам̣ випа̄ко’’ти евама̄дина̄ бханте миччха̄ва̄дӣнан̃ча досо самма̄ва̄дӣнан̃ча гун̣о бхагавата̄ вича̄ретва̄ пака̄сито.

пуччха̄ – катхан̃ча̄вусо таттха бхагавата̄ вин̃н̃уно пурисапуггаласса пат̣исан̃чиккхан̣а̄ пака̄сита̄.

виссаджджана̄ – татра гахапатайо вин̃н̃ӯ пурисо ити пат̣исан̃чиккхатӣти евама̄дина̄ бханте таттха бхагавата̄ вин̃н̃уно пурисапуггаласса пат̣исан̃чиккхан̣а̄ пака̄сита̄.

пуччха̄ – катхан̃ча̄вусо бхагавата̄ ан̃н̃есупи миччха̄ва̄дасамма̄ва̄десу апан̣н̣акапат̣ипада̄ вича̄ретва̄ пака̄сита̄, там̣ сан̇кхепато катхеси.

виссаджджана̄ – йатхева бханте пат̣хаме ва̄де, евамева кхо бханте акирийава̄да̄дӣсу чатӯсу ча миччха̄ва̄десу досам̣ кирийава̄да̄дӣсу ча чатӯсу самма̄ва̄десу гун̣ам̣, таттха ча вин̃н̃уно пурисасса пат̣исан̃чиккхан̣а̄ка̄рам̣ дассетва̄ бхагавата̄ апан̣н̣акапат̣ипада̄ пака̄сита̄.

амбалат̣т̣хикара̄хулова̄дасутта

пуччха̄ – амбалат̣т̣хикара̄хулова̄дасуттам̣ пана̄вусо бхагавата̄ каттха кам̣ а̄раббха бха̄ситам̣.

виссаджджана̄ – ра̄джагахе бханте а̄йасмантам̣ ра̄хулам̣ а̄раббха бха̄ситам̣.

маха̄ра̄хулова̄дасутта

пуччха̄ – маха̄ра̄хулова̄дасуттам̣ пана̄вусо бхагавата̄ каттха кам̣ а̄раббха кисмим̣ ваттхусмим̣ бха̄ситам̣.

виссаджджана̄ – са̄ваттхийам̣ бханте а̄йасмантам̣ ра̄хулам̣ а̄раббха бха̄ситам̣. а̄йасма̄ бханте ра̄хуло бхагавато чева аттано ча аттабха̄васампаттим̣ нисса̄йа гехасситам̣ чхандара̄гам̣ уппа̄деси. тасмим̣ бханте ваттхусмим̣ бха̄ситам̣.

чӯл̣ама̄лукйасутта

пуччха̄ – чӯл̣ама̄лукйасуттам̣ пана̄вусо бхагавата̄ каттха кам̣ а̄раббха кисмим̣ ваттхусмим̣ бха̄ситам̣.

виссаджджана̄ – са̄ваттхийам̣ бханте а̄йасмантам̣ ма̄лукйапуттам̣ а̄раббха бха̄ситам̣. а̄йасма̄ бханте ма̄лукйапутто аттано павивиттасса рахогатасса пат̣исаллӣнасса четасо паривитаккам̣ бхагавато а̄рочеси. тасмим̣ бханте ваттхусмим̣ бха̄ситам̣.

маха̄ма̄лукйасутта

пуччха̄ – маха̄ма̄лукйасуттам̣ пана̄вусо бхагавата̄ каттха кам̣ а̄раббха кисмим̣ ваттхусмим̣ бха̄ситам̣.

виссаджджана̄ – тасмим̣йева бханте са̄ваттхийам̣ а̄йасмантам̣ маха̄ма̄лукйапуттам̣ а̄раббха бха̄ситам̣.

бхадда̄лисутта

пуччха̄ – тена̄вусо бхагавата̄…пе… самма̄самбуддхена бхадда̄лисуттам̣ каттха кам̣ а̄раббха кисмим̣ ваттхусмим̣ бха̄ситам̣.

виссаджджана̄ – са̄ваттхийам̣ бханте а̄йасмантам̣ бхадда̄лим̣ а̄раббха бха̄ситам̣. а̄йасма̄ бханте бхадда̄ли бхагавата̄ сиккха̄паде пан̃н̃а̄пийама̄не бхиккхусан̇гхе сиккхам̣ сама̄дийама̄не анусса̄хам̣ паведеси. тасмим̣ бханте ваттхусмим̣ бха̄ситам̣.

аччайо мам̣ бханте аччагама̄ йатха̄ба̄лам̣ йатха̄мӯл̣хам̣ йатха̄акусалам̣, йохам̣ бхагавата̄ сиккха̄паде пан̃н̃а̄пийама̄не бхиккхусан̇гхе сиккхам̣ сама̄дийама̄не анусса̄хам̣ паведесим̣, тасса ме бханте бхагава̄ аччайам̣ аччайато пат̣игган̣ха̄ту а̄йатим̣ сам̣вара̄йа –

пуччха̄ – атха кхо а̄вусо а̄йасма̄ бхадда̄ли бхагавантам̣ кӣдисам̣ пан̃хам̣ пуччхи, катхан̃часса бхагава̄ там̣ вибхаджитва̄ бйа̄ка̄си.

виссаджджана̄ – атха кхо бханте а̄йасма̄ бхадда̄ли ‘‘ко ну кхо бханте хету, ко паччайо, йена мидхекаччам̣ бхиккхум̣ пасайу пасайу ка̄ран̣ам̣ каронтӣ’’ти евама̄дина̄ бхагавантам̣ пан̃хам̣ апуччхи. бхагава̄ ча бханте ‘‘идха бхадда̄ли екаччо бхиккху абхин̣ха̄паттико хоти, а̄паттибахуло’’ евама̄дина̄ а̄йасмато бхадда̄лисса вибхаджитва̄ бйа̄ка̄си.

пуччха̄ – тада̄пи кхо а̄вусо а̄йасма̄ бхадда̄ли пунапи бхагавантам̣ кӣдисам̣ пан̃хам̣ пуччхи, катхан̃часса бхагава̄ тампи вибхаджитва̄ бйа̄ка̄си.

виссаджджана̄ – тада̄пи бханте а̄йасма̄ бхадда̄ли ‘‘ко ну кхо бханте хету, ко паччайо, йена пуббе аппатара̄ни чева сиккха̄пада̄ни ахесум̣, бахутара̄ ча бхиккхӯ ан̃н̃а̄йа сан̣д̣ахим̣су. ко пана бханте хету, ко паччайо йена етарахи бахутара̄ни чева сиккха̄пада̄ни хонти аппатара̄ ча бхиккхӯ ан̃н̃а̄йа сан̣д̣ахантӣ’’ти бхагавантам̣ пунапи пан̃хам̣ апуччхи. бхагава̄ ча бханте ‘‘еваметам̣ бхадда̄ли хоти, саттесу ха̄йама̄несу саддхамме антарадха̄йама̄не бахутара̄ни хонти аппатара̄ ча бхиккхӯ ан̃н̃а̄йа сан̣д̣ахантӣ’’ти, евама̄дина̄ а̄йасмато бхадда̄лисса вибхаджитва̄ вибхаджитва̄ бйа̄ката̄.

лат̣укикопамасутта

пуччха̄ – лат̣укикопамасуттам̣ пана̄вусо бхагавата̄ каттха кам̣ а̄раббха кисмим̣ ваттхусмим̣ бха̄ситам̣.

виссаджджана̄ – ан̇гуттара̄песу бханте а̄пан̣е на̄ма ан̇гуттара̄па̄нам̣ нигаме а̄йасмантам̣ уда̄йим̣ а̄раббха бха̄ситам̣. а̄йасма̄ бханте уда̄йӣ бхагавантам̣ упасан̇камитва̄ етадавоча ‘‘идха майхам̣ бханте рахогатасса пат̣исаллӣнасса евам̣ четасо паривитакко удапа̄ди ‘‘бахӯнам̣ вата но бхагава̄ дуккхадхамма̄нам̣ апахатта̄, бахӯнам̣ вата но бхагава̄ сукхадхамма̄нам̣ упахатта̄, бахӯнам̣ вата но бхагава̄ акусала̄нам̣ дхамма̄нам̣ апахатта̄, бахӯнам̣ вата но бхагава̄ кусала̄нам̣ дхамма̄нам̣ упахатта̄’ти’’. тасмим̣ бханте ваттхусмим̣ бха̄ситам̣.

пуччха̄ – атха кхо а̄вусо бхагава̄ кӣдисӣ упама̄йо дассетва̄ бхиккхӯнам̣ ова̄дам̣ ада̄си.

виссаджджана̄ – атха кхо бханте бхагава̄ лат̣укикопамам̣ хаттхина̄гопамам̣ далиддапурисопамам̣ гахапатикопаманти чатассо упама̄йо дассетва̄ бхиккхӯнам̣ ова̄дамада̄си.

пуччха̄ – еван̃ча̄вусо бхагава̄ чатӯхи упама̄хи бхиккхӯнам̣ ова̄дам̣ датва̄ катхам̣ уттари дхаммадесанам̣ павад̣д̣хеси.

виссаджджана̄ – евам̣ кхо бханте бхагава̄ чатӯхи упама̄хи бхиккхӯнам̣ ова̄дам̣ датва̄ ‘‘чатта̄ро ме уда̄йи пуггала̄ санто сам̣виджджама̄на̄ локасмим̣’’нти евама̄дина̄ уттари бхиккхӯнам̣ дхаммакатхам̣ павад̣д̣хеси.

ча̄тумасутта

пуччха̄ – ча̄тумасуттам̣ пана̄вусо бхагавата̄ каттха кам̣ а̄раббха кисмим̣ ваттхусмим̣ бха̄ситам̣.

виссаджджана̄ – ча̄тума̄йам̣ бханте а̄йасманта̄нам̣ са̄рипуттамоггала̄наттхера̄нам̣ саддхивиха̄рике адхуна̄ паббаджите самбахуле бхиккхӯ а̄раббха бха̄ситам̣. са̄рипуттамоггалла̄наппамукха̄ни бханте пан̃чаматта̄ни бхиккхусата̄ни ча̄тумам̣ ануппатта̄ни хонти бхагавантам̣ дассана̄йа, те ча а̄гантука̄ бхиккхӯ нева̄сикехи бхиккхӯхи саддхим̣ пат̣исаммодама̄на̄ сена̄сана̄ни пан̃н̃а̄пайама̄на̄ паттачӣвара̄ни пат̣иса̄майама̄на̄ учча̄садда̄ маха̄садда̄ ахесум̣. тасмим̣ бханте ваттхусмим̣ бха̄ситам̣.

пуччха̄ – катхан̃ча̄вусо таттха бхагава̄ бхиккхӯнам̣ ова̄дам̣ ада̄си.

виссаджджана̄ – чатта̄рима̄ни бхиккхаве бхайа̄ни удакороханте па̄тикан̇кхитабба̄нӣти евама̄дина̄ бханте бхагава̄ таттха бхиккхӯнам̣ ова̄дам̣ ада̄си.

нал̣акапа̄насутта

пуччха̄ – нал̣акапа̄насуттам̣ пана̄вусо бхагавата̄ каттха кам̣ а̄раббха бха̄ситам̣.

виссаджджана̄ – нал̣акапа̄не бханте ануруддхаттхераппамукхе самбахуле абхин̃н̃а̄те абхин̃н̃а̄те кулапутте а̄раббха бха̄ситам̣.

голийа̄нисутта

пуччха̄ – голийа̄нисуттам̣ пана̄вусо каттха кам̣ а̄раббха кисмим̣ ваттхусмим̣ кена бха̄ситам̣.

виссаджджана̄ – ра̄джагахе бханте а̄йасмантам̣ голийа̄ним̣ а̄раббха а̄йасмата̄ са̄рипуттаттхерена дхаммасена̄патина̄ бха̄ситам̣. а̄йасма̄ бханте голийа̄ни а̄ран̃н̃ико падасама̄ча̄ро сан̇гхамаджджхе осат̣о хоти кеначидева каран̣ӣйена, тасмим̣ бханте ваттхусмим̣ бха̄ситам̣.

кӣт̣а̄гирисутта

пуччха̄ – тена̄вусо бхагавата̄…пе… самма̄самбуддхена кӣт̣а̄гирисуттам̣ каттха кам̣ а̄раббха кисмим̣ ваттхусмим̣ бха̄ситам̣.

виссаджджана̄ – ка̄сӣсу бханте кӣт̣а̄гирисмим̣ ка̄сӣнам̣ нигаме ассаджипунаббасуке бхиккхӯ а̄раббха бха̄ситам̣. ассаджипунаббасука̄ бханте бхиккхӯ бхиккхӯхи сахадхаммикам̣ вуччама̄на̄ евама̄хам̣су ‘‘майам̣ кхо а̄вусо са̄йан̃чева бхун̃джа̄ма па̄то ча дива̄ ча вика̄ле, те майам̣ са̄йан̃чева бхун̃джама̄на̄ па̄то ча дива̄ ча вика̄ле аппа̄ба̄дхатан̃ча сан̃джа̄на̄ма аппа̄тан̇катан̃ча лахут̣т̣ха̄нан̃ча балан̃ча пха̄сувиха̄ран̃ча, те майам̣ ким̣ сандит̣т̣хикам̣ хитва̄ ка̄ликам̣ анудха̄висса̄ма, са̄йан̃чева майам̣ бхун̃джисса̄ма па̄то ча дива̄ ча вика̄ле’’ти. тасмим̣ бханте ваттхусмим̣ бха̄ситам̣.

тевиджджаваччхасутта

пуччха̄ – тевиджджаваччхасуттам̣ пана̄вусо бхагавата̄ каттха кам̣ а̄раббха кисмим̣ ваттхусмим̣ бха̄ситам̣.

виссаджджана̄ – веса̄лийам̣ бханте ваччхаготтам̣ парибба̄джакам̣ а̄раббха бха̄ситам̣. ваччхаготто бханте парибба̄джако бхагавантам̣ етадавоча ‘‘сутам̣ ме бханте саман̣о готамо саббан̃н̃ӯ саббадасса̄вӣ апарисесам̣ н̃а̄н̣адассанам̣ пат̣иджа̄на̄ти, чарато ча ме тит̣т̣хато ча суттасса ча джа̄гарасса ча сататам̣ самитам̣ н̃а̄н̣адассанам̣ паччупат̣т̣хита’’нти. йе те бханте евама̄хам̣су ‘‘саман̣о готамо саббан̃н̃ӯ саббадасса̄вӣ апарисесам̣ н̃а̄н̣адассанам̣ пат̣иджа̄на̄ти, чарато ча ме тит̣т̣хато ча суттасса ча джа̄гарасса ча сататам̣ самитам̣ н̃а̄н̣адассанам̣ паччупат̣т̣хита’’нти. каччи те бханте бхагавато вуттава̄дино, на ча бхагавантам̣ абхӯтена аббха̄чиккханти, дхаммасса ча̄нудхаммам̣ бйа̄каронти, на ча кочи сахадхаммико ва̄да̄нува̄до га̄райхам̣ т̣ха̄нам̣ а̄гаччхатӣ’’ти. тасмим̣ бханте ваттхусмим̣ бха̄ситам̣.

аггиваччхасутта

пуччха̄ – аггиваччхасуттам̣ пана̄вусо каттха кам̣ а̄раббха кисмим̣ ваттхусмим̣ бха̄ситам̣.

виссаджджана̄ – са̄ваттхийам̣ бханте ваччхаготтам̣ парибба̄джакам̣ бха̄ситам̣. ваччхаготто бханте парибба̄джако бхагавантам̣ упасан̇камитва̄ ‘‘ким̣ ну кхо бхо готама ‘сассато локо идамева саччам̣ могхаман̃н̃а’нти евам̣дит̣т̣хи бхавам̣ готамо’’ти евама̄дикам̣ пан̃хам̣ апуччхи. тасмим̣ бханте ваттхусмим̣ бха̄ситам̣.

маха̄ваччхасутта

пуччха̄ – маха̄ваччхасуттам̣ пана̄вусо бхагавата̄ каттха кам̣ а̄раббха кисмим̣ ваттхусмим̣ бха̄ситам̣.

виссаджджана̄ – ра̄джагахе бханте ваччхаготтам̣йева парибба̄джакам̣ а̄раббха бха̄ситам̣. ваччхаготто бханте парибба̄джако бхагавантам̣ упасан̇камитва̄ етадавоча ‘‘дӣгхаратта̄хам̣ бхота̄ готамена сахакатхӣ, са̄дху ме бхавам̣ готамо сам̣кхиттена кусала̄кусалам̣ десетӯ’’ти. тасмим̣ бханте ваттхусмим̣ бха̄ситам̣.

пуччха̄ – евам̣ вутте кхо а̄вусо ваччхаготто парибба̄джако имасмим̣ дхаммавинайе пасанно хутва̄ кӣдисам̣ пасанна̄ка̄рам̣ ака̄си, катхан̃часса дхамма̄бхисамайо ахоси.

виссаджджана̄ – евам̣ вутте бханте ваччхаготто парибба̄джако ‘‘саче хи бхо готама имам̣ дхаммам̣ бхавам̣йева готамо а̄ра̄дхако абхависса, но ча кхо бхиккхӯ а̄ра̄дхака̄ абхависсам̣су, евамидам̣ брахмачарийам̣ апарипӯрам̣ абхависса тенан̇гена̄’’ти евама̄дина̄ имасмим̣ дхаммавинайе пасанно пасанна̄ка̄рамака̄си. йа̄ва арахаттан̃часса дхамма̄бхисамайо ахоси.

дӣгханакхасутта

пуччха̄ – дӣгханакхасуттам̣ пана̄вусо бхагавата̄ каттха кам̣ а̄раббха кисмим̣ ваттхусмим̣ бха̄ситам̣.

виссаджджана̄ – ра̄джагахе бханте дӣгханакхам̣ парибба̄джакам̣ а̄раббха бха̄ситам̣. дӣгханакхо бханте парибба̄джако бхагавантам̣ упасан̇камитва̄ етадавоча ‘‘ахан̃хи бхо готама евам̣ва̄дӣ евам̣дит̣т̣хи саббам̣ ме наккхаматӣ’’ти. тасмим̣ бханте ваттхусмим̣ бха̄ситам̣.

пуччха̄ – имасмим̣ ча пана̄вусо веййа̄каран̣асмим̣ бхан̃н̃ама̄не кесам̣ пуггала̄нам̣ висеса̄дхигамо ахоси.

виссаджджана̄ – имасмин̃ча пана бханте веййа̄каран̣асмим̣ бхан̃н̃ама̄не а̄йасмато са̄рипуттасса анупа̄да̄йа а̄савехи читтам̣ вимуччи, дӣгханакхасса пана парибба̄джакасса тасмим̣йева а̄сане вираджам̣ вӣтамалам̣ дхаммачаккхум̣ удапа̄ди йам̣кин̃чи самудайадхаммам̣, саббам̣ там̣ ниродхадхамма’’нти.

ма̄ган̣д̣ийасутта

пуччха̄ – ма̄ган̣д̣ийасуттам̣ пана̄вусо бхагавата̄ каттха кам̣ а̄раббха кисмим̣ ваттхусмим̣ бха̄ситам̣.

виссаджджана̄ – курӯсу бханте камма̄садхамме на̄ма курӯнам̣ нигаме бха̄радва̄джа готтасса бра̄хман̣асса агйа̄га̄ре тин̣асантха̄раке ма̄ган̣д̣ийам̣ парибба̄джакам̣ а̄раббха бха̄ситам̣. ма̄ган̣д̣ийо бханте парибба̄джако бхагавантам̣ ‘‘бхӯнаху саман̣о готамо’’ти вадеси, тасмим̣ бханте ват̣т̣хусмим̣ бха̄ситам̣.

пуччха̄ – катхан̃ча̄вусо бхагава̄ таттха ма̄ган̣д̣ийасса парибба̄джакасса самануйун̃джитва̄ самануйун̃джитва̄ дхаммам̣ десеси.

виссаджджана̄ – ‘‘чаккхум̣ кхо ма̄ган̣д̣ийа рӯпа̄ратам̣ рӯпасаммудитам̣, там̣ татха̄гатасса дантам̣ гуттам̣ раккхитам̣ сам̣вутам̣, тасса ча сам̣вара̄йа дхаммам̣ десетӣ’’ти евама̄дина̄ бханте таттха бхагава̄ ма̄ган̣д̣ийасса парибба̄джакасса самануйун̃джитва̄ самануйун̃джитва̄ дхаммам̣ десеси.

пуччха̄ – евам̣ кхо а̄вусо ма̄ган̣д̣ийена парибба̄джакена ‘‘накин̃чи бхо готама̄’’ти йатха̄бхӯтам̣ пат̣иссуте катхам̣ бхагава̄ аттанопи на кин̃чи кеначипи ваттаббатам̣ пака̄сеси.

виссаджджана̄ – евам̣ кхо бханте ма̄ган̣д̣ийена парибба̄джакена накин̃чи бхоготама̄ти йатха̄бхӯтам̣ пат̣иссуте ‘‘ахам̣ кхо пана ма̄ган̣д̣ийа пуббе ага̄рийабхӯто сама̄но пан̃чахи ка̄магун̣ехи самаппито саман̇гӣбхӯто парича̄ресим̣ чаккхувин̃н̃еййахи рӯпехи ит̣т̣хехи мана̄пехи пийарӯпехи ка̄мӯпасам̣хитехи раджанӣйехӣ’’ти евама̄дина̄ бхагава̄ аттанопи на кин̃чи кеначипи ваттаббатам̣ пака̄сеси.

пуччха̄ – имасмим̣ сутте парийоса̄напуччхам̣ пуччхисса̄ми иман̃ча пана̄вусо дхаммадесанам̣ сутва̄ ма̄ган̣д̣ийо парибба̄джако имасмим̣ дхаммавинайе пасанно хутва̄ кӣдисам̣ пасанна̄ка̄рамака̄си.

виссаджджана̄ – имам̣ ча пана бханте дхаммадесанам̣ сутва̄ ма̄ган̣д̣ийо парибба̄джако ‘абхиккантам̣ бхо готама абхиккантам̣ бхо готама̄’’ти евама̄дина̄ имасмим̣ дхаммавинайе пасанно пасанна̄ка̄рамака̄си.

сандакасутта

пуччха̄ – сандакасуттам̣ пана̄вусо каттха кам̣ а̄раббха кисмим̣ ваттхусмим̣ кена бха̄ситам̣.

виссаджджана̄ – косамбийам̣ бханте сандакам̣ парибба̄джакам̣ а̄раббха а̄йасмата̄ а̄нандаттхерена дхаммабхан̣д̣а̄га̄рикена бха̄ситам̣. сандако бханте парибба̄джако а̄йасмантам̣ а̄нандам̣ етадавоча ‘‘са̄дхувата бхавантам̣йева а̄нандам̣ пат̣ибха̄ту саке а̄чарийа ке дхаммикатха̄’’ти, тасмим̣ бханте ваттхусмим̣ бха̄ситам̣.

пуччха̄ – катхан̃ча̄вусо таттха чатта̄ро абрахмачарийава̄са̄ а̄йасмата̄ а̄нандаттхерена дхаммабхан̣д̣а̄га̄рикена вича̄ретва̄ пака̄сита̄.

виссаджджана̄ – идха сандака екаччо саттха̄ евам̣ва̄дӣ хоти евам̣дит̣т̣хи наттхи диннам̣, наттхи йит̣т̣хам̣, наттхи хутам̣, наттхи сукатадуккат̣а̄нам̣ камма̄нам̣ пхалам̣випа̄ко, наттхи айам̣локо, наттхи паролоко, наттхи ма̄та̄, наттхи пита̄, наттхи сатта̄ опапа̄тика̄ти

евама̄дина̄ бханте таттха а̄йасмата̄ а̄нандаттхерена дхаммабхан̣д̣а̄га̄рикена чатта̄ро абрахмачарийава̄са̄ вича̄ретва̄ пака̄сита̄.

пуччха̄ – катхан̃ча̄вусо таттха чатта̄ри анасса̄сика̄ни брахмачарийа̄ни а̄йасмата̄ а̄нандаттхерена дхаммабхан̣д̣а̄га̄рикена вича̄ретва̄ пака̄сита̄ни.

виссаджджана̄ – идха сандака екаччо саттха̄ саббан̃н̃ӯ саббадасса̄вӣ апарисесам̣ н̃а̄н̣адассанам̣ пат̣иджа̄на̄ти ‘‘чарато ча ме тит̣т̣хато ча суттасса ча джа̄гарасса ча сататам̣ самитам̣ н̃а̄н̣адассанам̣ паччупат̣т̣хита’’нти евама̄дина̄ бханте таттха а̄йасмата̄ а̄нандаттхерена дхаммабхан̣д̣а̄га̄рикена чатта̄ри анасса̄сика̄ни брахмачарийа̄ни вибхаджитва̄ пака̄сита̄ни.

пуччха̄ – атха

кхо а̄вусо сандако парибба̄джако а̄йасмантам̣ а̄нандаттхерам̣ катхам̣ пуччхи, татхан̃часса̄йасма̄нандаттхеро бйа̄ка̄си.

виссаджджана̄ – атха кхо бханте сандако парибба̄джако ‘‘со пана бхо а̄нанда саттха̄ ким̣ва̄дӣ ким̣ аккха̄йӣ’’ти евама̄дина̄ а̄йасмантам̣ а̄нандаттхерам̣ пуччхи, а̄йасма̄ ча бханте а̄нандаттхеро ‘‘идха сандака татха̄гато локе уппаджджати арахам̣ самма̄самбуддхо виджджа̄чаран̣асампанно’’ти евама̄дина̄ сандакасса парибба̄джакасса вибхаджитва̄ вибхаджитва̄ бйа̄ка̄си.

пуччха̄ – иман̃ча пана̄вусо дхаммадесанам̣ сутва̄ сандако парибба̄джако имасмим̣ дхаммавинайе пасанно кӣдисам̣ пасанна̄ка̄рамака̄си.

виссаджджана̄ – иман̃ча бханте дхаммадесанам̣ сутва̄ сандако парибба̄джако ‘‘аччхарийам̣ бхо а̄нанда, аббхутам̣ бхо а̄нанда, на ча на̄ма садхаммоккам̣сана̄ бхависсати, на парадхаммавамбхана̄, а̄йатане ча дхаммадесана̄, та̄ва бахука̄ ча ниййа̄та̄ро пан̃н̃а̄йиссантӣ’’ти евама̄дина̄ имасмим̣ дхаммавинайе пасанно пасанна̄ка̄рамака̄си.

маха̄сакулуда̄йӣсутта

пуччха̄ – маха̄сакулуда̄йисуттам̣ пана̄вусо бхагавата̄ каттха кам̣ а̄раббха кисмим̣ ваттхусмим̣ бха̄ситам̣.