сӣлаккхандхаваггасутта

сам̣га̄йанасса пуччха̄ виссаджджана̄

пуччха̄ – пат̣хамамаха̄дхаммасам̣гӣтика̄ле а̄вусо дхаммасам̣га̄хака̄ маха̄кассапа̄дайо маха̄тхеравара̄ пат̣хамам̣ винайам̣ сам̣га̄йитва̄ таданантарам̣ кам̣ на̄ма па̄вачанам̣ сам̣га̄йим̣су.

виссаджджана̄ – пат̣хамамаха̄дхаммасам̣гӣтийам̣ бханте дхаммасам̣га̄хака̄ маха̄кассапа̄дайо маха̄тхеравара̄ пат̣хамам̣ винайам̣ сам̣га̄йитва̄ таданантарам̣ дхаммам̣ сам̣га̄йим̣су.

пуччха̄ – дхаммо на̄ма а̄вусо суттанта̄бхидхаммавасена дувидхо, таттха катарам̣ дхаммам̣ пат̣хамам̣ сам̣га̄йим̣су.

виссаджджана̄ – двӣсу бханте дхаммесу суттанта̄бхидхаммапит̣акесу пат̣хамам̣ суттантам̣ пит̣акам̣ дхаммам̣ сам̣га̄йим̣су.

пуччха̄ – суттантапит̣аке пи а̄вусо дӣгхамаджджхимасам̣йуттаан̇гуттаракхуддаканика̄йавасена пан̃ча ника̄йа̄, тесу пат̣хамам̣ катарам̣ ника̄йам̣ сам̣га̄йим̣су.

виссаджджана̄ – пан̃часу бханте ника̄йесу пат̣хамам̣ дӣгханика̄йам̣ сам̣га̄йим̣су.

пуччха̄ – дӣгханика̄йепи а̄вусо тайо вагга̄ чатуттим̣са̄ ча сутта̄ни, тесу катарам̣ ваггам̣ катаран̃ча суттам̣ пат̣хамам̣ сам̣га̄йим̣су.

виссаджджана̄ – дӣгханика̄йепи бханте тӣсу ваггесу пат̣хамам̣ сӣлаккхандхаваггам̣, чатуттим̣сатийа̄ ча суттесу пат̣хамам̣ брахмаджа̄ласуттам̣ сам̣га̄йим̣су.