брахмаджа̄ласутта

пуччха̄ – са̄дху са̄дху а̄вусо майампи да̄ни татойева пат̣т̣ха̄йа сам̣га̄йитум̣ пуббакичча̄ни сама̄рабха̄ма…, тена̄вусо бхагавата̄ джа̄ната̄ пассата̄ арахата̄ самма̄самбуддхена брахмаджа̄ласуттам̣ каттха бха̄ситам̣.

виссаджджана̄ – антара̄ ча бханте ра̄джагахам̣ антара̄ ча на̄л̣андам̣ амбалат̣т̣хика̄йам̣ ра̄джа̄га̄раке бха̄ситам̣.

пуччха̄ – кам̣ а̄вусо а̄раббха бха̄ситам̣.

виссаджджана̄ – суппийан̃ча бханте парибба̄джакам̣ брахмадаттан̃ча ма̄н̣авам̣ а̄раббха бха̄ситам̣.

пуччха̄ – кисмим̣ а̄вусо ваттхусмим̣ бха̄ситам̣.

виссаджджана̄ – ван̣н̣а̄ван̣н̣е бханте, суппийо хи бханте анекапарийа̄йена буддхасса аван̣н̣ам̣ бха̄сати дхаммасса аван̣н̣ам̣ бха̄сати сан̇гхасса аван̣н̣ам̣ бха̄сати, суппийасса пана парибба̄джакасса антева̄сӣ брахмадатто ма̄н̣аво анекапарийа̄йена буддхасса ван̣н̣ам̣ бха̄сати дхаммасса ван̣н̣ам̣ бха̄сати сан̇гхасса ван̣н̣ам̣ бха̄сати, тасмим̣ бханте ваттхусмим̣ бха̄ситам̣.

анусандхе

пуччха̄ – кати а̄вусо таттха анусандхайо.

виссаджджана̄ – тайо бханте таттха анусандхайо, еко аван̣н̣а̄нусандхи, две ван̣н̣а̄нусандхийо.

пат̣хама анусандхе

пуччха̄ – таттха̄вусо пат̣хаме анусандхимхи катхам̣ бхагавата̄ бха̄ситам̣, там̣ сам̣кхепато катхехи.

виссаджджана̄ – пат̣хаме бханте анусандхимхи аван̣н̣е манопадосам̣ нива̄ретва̄, таттха ча а̄дӣнавам̣ дассетва̄, таттха пат̣ипаджджитабба̄ка̄ро бхагавата̄ бха̄сито.

мамам̣ ва̄ бхиккхаве паре аван̣н̣ам̣ бха̄сеййум̣, дхаммасса ва̄ аван̣н̣ам̣ бха̄сеййум̣ сан̇гхасса ва̄ аван̣н̣ам̣ бха̄сеййум̣, татра тумхехи на а̄гха̄то аппаччайо на четасо анабхираддхи каран̣ӣйа̄…

дутийа анусандхе

пуччха̄ – са̄дху са̄дху а̄вусо, са̄дху кхо бхагава̄ аттана̄ парамуккам̣ са̄гатакхантӣгун̣асаманна̄гато аттано са̄вакабхӯте амхепи таттха сама̄да̄песи, аттана̄ ча локадхаммесу анин̃джанасабха̄во амха̄кампи татхатта̄йа ова̄дамада̄си, дутийепана̄вусо анусандхимхи катхам̣ бхагавата̄ бха̄ситам̣, тампи сам̣кхепато пака̄сехи.

виссаджджана̄ – дутийе пана бханте анусандхимхи ван̣н̣е четасо уппила̄витаттам̣ ниседхетва̄, таттха ча а̄дӣнавам̣ дассетва̄, таттха ча пат̣ипаджджана̄ка̄рам̣ дассетва̄, путхуджджанасса ван̣н̣абхӯмибхӯта̄ни тӣн̣и сӣла̄ни виттха̄рато бхагавата̄ бха̄сита̄ни.

мамам̣ ва̄ бхиккхаве паре ван̣н̣ам̣ бха̄сеййум̣, дхаммасса ва̄ ван̣н̣ам̣ бха̄сеййум̣, сан̇гхасса ва̄ ван̣н̣ам̣ бха̄сеййум̣, татра тумхехи на а̄нандо на соманассам̣ на четасо абхираддхи каран̣ӣйа̄ –

татийа анусандхе

пуччха̄ – са̄дху са̄дху а̄вусо, са̄дху кхо бхагава̄ аттана̄ парамуккам̣сагатасупарисуддхасӣласаманна̄гато, там̣ аттано супарисуддхасӣлам̣ дассетва̄ парепи таттха нийоджеси, татийе пана̄вусо анусандхимхи катхам̣ бхагавата̄ бха̄ситам̣, там̣ сам̣кхепато пака̄сехи.

виссаджджана̄ – татийе пана бханте анусандхимхи два̄сат̣т̣хи дит̣т̣хийо саббан̃н̃ута н̃а̄н̣ена виттха̄рато вибхаджитва̄, та̄сан̃ча чха пхасса̄йатанападат̣т̣ха̄набха̄вам̣ вибха̄ветва̄, миччха̄дит̣т̣хигатика̄дхит̣т̣ха̄ нан̃ча ват̣т̣ам̣ катхетва̄, йуттайогабхиккхуадхит̣т̣ха̄нан̃ча виват̣т̣ам̣ катхетва̄, миччха̄дит̣т̣хигатикасса десана̄джа̄лато авимуттабха̄вам̣ десана̄джа̄лато вимуттасса наттхикабха̄ван̃ча вибха̄ветва̄, аттано ча каттхачи апарийа̄паннабха̄вам̣ дассетва̄, упа̄дисесанибба̄надха̄тум̣ па̄петва̄ десана̄ бхагавата̄ нит̣т̣ха̄пита̄.

уччхиннабха̄ванеттико бхиккхаве татха̄гатасса ка̄йо тит̣т̣хати, йа̄васса ка̄йо т̣хассати та̄ва нам̣ даккханти деваманусса̄, ка̄йасса бхеда̄ уддхам̣ джӣвитапарийа̄да̄на̄ на нам̣ даккханти деваманусса̄.

суттанидесана̄

пуччха̄ – са̄дху са̄дху а̄вусо, са̄дху кхо бхагава̄ аттана̄ два̄сат̣т̣хи дит̣т̣хийо ча чха пхасса̄йатана̄ни ча два̄даса пат̣иччасамуппа̄дан̇га̄ни ча саббасо париджа̄нитва̄ тесам̣ париджа̄нанаттха̄йа паресампи татхатта̄йа дхаммам̣ пака̄сети, суттан̃ча на̄ма а̄вусо чатуннам̣ суттаниккхепа̄нам̣ ан̃н̃атаравасенева никкхиттам̣, тасма̄ тесу идам̣ суттам̣ катарена суттаниккхепена бхагавата̄ никкхиттам̣.

виссаджджана̄ – чатӯсу бханте суттаниккхепесу ат̣т̣хуппаттиниккхепана идам̣ суттам̣ никкхиттам̣.

пуччха̄ – касса а̄вусо вачанам̣.

виссаджджана̄ – бхагавато бханте вачанам̣ арахато самма̄самбуддхасса.

пуччха̄ – кена̄вусо а̄бхатам̣.

виссаджджана̄ – парампара̄йа бханте а̄бхатам̣.

пуччха̄ – аттхи ну кхо а̄вусо еттха кочи вираддхадоса̄, йена паччхима̄ джана̄ миччха̄аттхам̣ ган̣хеййум̣.

виссаджджана̄ – наттхи бханте.